ಕೋವಿಡ್‌ ಸೋಂಕು ಇಳಿಕೆ ಗುರಿ: ಜಿಲ್ಲಾಧಿಕಾರಿ

Team Udayavani, Aug 16, 2020, 6:10 AM IST

ಉಡುಪಿ: ಈ ಮಾಸಾಂತ್ಯಕ್ಕೆ ಜಿಲ್ಲೆಯಲ್ಲಿ ಕೋವಿಡ್‌-19 ಸೋಂಕು ದೃಢ ಪ್ರಕರಣಗಳ ದರ ಶೇ. 5ಕ್ಕೆ ಇಳಿಸುವ ಗುರಿ ಹೊಂದಲಾಗಿದೆ. ಆರೋಗ್ಯ ಇಲಾಖೆ ಶ್ರಮವಹಿಸಿ ಕೆಲಸ ಮಾಡಿದರೆ, ಸಾರ್ವ ಜನಿಕರು ಸಹಕರಿಸಿದರೆ ಇದು ಸಾಧ್ಯವಾಗಲಿದೆ ಎಂದು ಜಿಲ್ಲಾ ಧಿಕಾರಿ ಜಿ. ಜಗದೀಶ್‌ ತಿಳಿಸಿದ್ದಾರೆ.

ಸ್ವಾತಂತ್ರ್ಯೋತ್ಸವ ಸಮಾರಂಭದ ಬಳಿಕ ಮಾಧ್ಯಮ ಪ್ರತಿನಿಧಿಗಳೊಂದಿಗೆ ಅವರು ಮಾತನಾಡಿದರು. ಜಿಲ್ಲೆಯಲ್ಲಿ 300ಕ್ಕೂ ಅಧಿಕ ಕೋವಿಡ್‌ ಪ್ರಕರಣಗಳು ಪತ್ತೆಯಾಗುತ್ತಿರುವುದರಿಂದ ನಿಯಂತ್ರಣ ಕೈಮೀರಿದೆ ಎಂಬ ಮನೋಭಾವದಲ್ಲಿ ಸಾರ್ವಜನಿಕರು ಆತಂಕಗೊಳ್ಳಬಾರದು ಎಂದು ಮನವಿ ಮಾಡಿದರು.

ಪ್ರಕರಣ ಏರಿಕೆಯಾಗಿಲ್ಲ
ಉಡುಪಿ ಜಿಲ್ಲೆಯಲ್ಲಿ ಮೊದಲು ಪ್ರತಿದಿನ 500 ಮಂದಿಯ ಪರೀಕ್ಷೆ ಮಾಡಲಾಗುತ್ತಿತ್ತು. ಆಗ 100 ಪ್ರಕರಣಗಳು ಬರುತ್ತಿದ್ದವು. ಈಗ 2,000-2,200 ಮಂದಿಯ ಪರೀಕ್ಷೆ ನಡೆಸುತ್ತಿದ್ದೇವೆ. ಅದರಲ್ಲಿ 300 ಪ್ರಕರಣಗಳು ಕಂಡುಬರುತ್ತಿವೆ. ಹಿಂದೆ ಯಾವ ಪ್ರಮಾಣದಲ್ಲಿ ಪ್ರಕರಣಗಳು ಪತ್ತೆಯಾಗುತ್ತಿದ್ದವೋ ಅಷ್ಟೇ ಪ್ರಮಾಣದಲ್ಲಿ ಈಗಲೂ ಪತ್ತೆಯಾಗುತ್ತಿವೆ. ಕೋವಿಡ್‌ ಸೋಂಕು ಇರುವವರನ್ನು ಮುಂಚಿತವಾಗಿ ಗುರುತಿಸಿ, ಅವರಿಗೆ ಚಿಕಿತ್ಸೆ ನೀಡಿ, ಜೀವ ಉಳಿಸಬೇಕೆನ್ನುವ ಉದ್ದೇಶದಿಂದ ಪರೀಕ್ಷೆ ಹೆಚ್ಚಿಸಲಾಗಿದೆ ಎಂದರು.

2,100 ಪರೀಕ್ಷೆಯ ಗುರಿ
ಸರಕಾರ ಉಡುಪಿ ಜಿಲ್ಲೆಗೆ ಪ್ರತಿದಿನ 2,100 ಜನರ ಪರೀಕ್ಷೆ ನಡೆಸಲು ಗುರಿ ನೀಡಿದೆ. ಅದರಂತೆ ಹೆಚ್ಚೆಚ್ಚು ಪರೀಕ್ಷೆ ನಡೆಸಿ, ಸೋಂಕಿತರನ್ನು ಪತ್ತೆಹಚ್ಚಿ, ಅವರ ಪ್ರಾಥಮಿಕ ಸಂಪರ್ಕಿತರನ್ನು ಗುರುತಿಸಿದರೆ, ವ್ಯಾ ಪಿಸುವುದನ್ನು ಬಹುಬೇಗನೆ ತಡೆಯಲು ಸಾಧ್ಯವಾಗುತ್ತದೆ. ಆರೋಗ್ಯ ಇಲಾಖೆಯ ಅಧಿಕಾರಿಗಳು ಅತ್ಯುತ್ತಮವಾಗಿ ಕರ್ತವ್ಯ ನಿರ್ವಹಿಸುತ್ತಿದ್ದಾರೆ. ಕಳೆದ ತಿಂಗಳು ಶೇ. 25ರಷ್ಟಿದ್ದ ಪಾಸಿಟಿವ್‌ ಪ್ರಕರಣಗಳು, ಪ್ರಸ್ತುತ ಶೇ. 12ಕ್ಕೆ ಇಳಿಕೆಯಾಗಿವೆ. ನಿಧಾನವಾಗಿ ದೃಢ ಪ್ರಕರಣಗಳ ದರ ಕಡಿಮೆಯಾಗುತ್ತಿದೆ. ಇದೇ ರೀತಿ ಇನ್ನೊಂದು ತಿಂಗಳು ಕಷ್ಟಪಟ್ಟು ಕೆಲಸ ಮಾಡಿದರೆ, ಈ ತಿಂಗಳಾಂತ್ಯಕ್ಕೆ ಕೋವಿಡ್‌ ದೃಢ ಪ್ರಕರಣಗಳ ದರವನ್ನು ಶೇ. 5ಕ್ಕೆ ಇಳಿಸಬಹುದಾಗಿದೆ ಎಂದರು.

ರೋಗ ಲಕ್ಷಣವಿರುವ ಪ್ರಕರಣ ಶೇ. 10ಕ್ಕೆ ಇಳಿಕೆ!
ಕಳೆದ ತಿಂಗಳು ಉಡುಪಿಯಲ್ಲಿ ಕೋವಿಡ್‌ ಪಾಸಿಟಿವ್‌ ಬಂದ ಪ್ರಕರಣಗಳಲ್ಲಿ ರೋಗಲಕ್ಷಣಗಳಿರುವ ಪ್ರಕರಣಗಳು ಶೇ. 50 ಮೀರಿದ್ದವು. ಪ್ರಸಕ್ತ ರೋಗ ಲಕ್ಷಣಗಳಿರುವ ಪ್ರಕರಣಗಳು ಶೇ. 10ರಷ್ಟು ಮಾತ್ರ ಬರುತ್ತಿವೆ. ಜಿಲ್ಲೆಯಲ್ಲಿರುವ ಐಸಿಯು ಬೆಡ್‌ಗಳು ಕಳೆದ 15 ದಿನಗಳ ಹಿಂದೆ ತುಂಬಿತ್ತು. ಈಗ ಐಸಿಯು ಬೆಡ್‌ಗಳು ಖಾಲಿ ಇವೆ. ಆಕ್ಸಿಜನ್‌, ಎಚ್‌ಡಿಯು ಬೆಡ್‌ಗಳು ಖಾಲಿ ಇವೆ. ಹಾಗಾಗಿ ಯಾರೂ ಆತಂಕಗೊಳ್ಳಬೇಕಾಗಿಲ್ಲ. ನಿಯಮಗಳ ಕಟ್ಟುನಿಟ್ಟಿನ ಪಾಲನೆ ಯಿಂದ ಈ ಮಾಸಾಂತ್ಯದ ಅನಂತರ ನಿಧಾನವಾಗಿ ಪ್ರಕರಣಗಳು ಕಡಿಮೆಯಾಗುವುದನ್ನು ನಾವು ನೋಡಬಹುದು ಎಂದರು. ಜಿಲ್ಲೆಯಲ್ಲಿ ಸಮೀಕ್ಷೆ, ಗಂಟಲ ದ್ರವ ಸಂಗ್ರಹಕ್ಕೆ ಹೆಚ್ಚುವರಿಯಾಗಿ 20 ಮೊಬೈಲ್‌ ಟೀಂಗಳನ್ನು ಮಾಡಲು ಸರಕಾರ ಅನುಮತಿಸಿದೆ ಎಂದರು.