ರಿಯಲ್‌ಸ್ಟಾರ್‌ ಅಣ್ಣನ ಮಗ ಈಗ ಸೂಪರ್‌ ಸ್ಟಾರ್‌!

Team Udayavani, Aug 19, 2020, 7:31 PM IST

ರಿಯಲ್‌ ಸ್ಟಾರ್‌ ಉಪೇಂದ್ರ ತೆರೆಮೇಲೆ “ಸೂಪರ್‌ ಸ್ಟಾರ್‌’ ಚಿತ್ರದಲ್ಲಿ ಕಾಣಿಸಿಕೊಂಡಿದ್ದು ನಿಮಗೆ ನೆನಪಿರಬಹುದು ಈಗ ಉಪೇಂದ್ರ ಅಣ್ಣನ ಮಗ ನಿರಂಜನ್‌ ಸುಧೀಂದ್ರ “ಸೂಪರ್‌ ಸ್ಟಾರ್‌’ ಲುಕ್‌ನಲ್ಲಿ ತೆರೆಮೇಲೆ ಎಂಟ್ರಿ ಕೊಡೋಕೆ ರೆಡಿಯಾಗಿದ್ದಾರೆ.

ಹೌದು, ಈಗಾಗಲೇ “ಸೆಕೆಂಡ್‌ ಹಾಫ್’ ಚಿತ್ರದ ಮೂಲಕ ಸ್ಯಾಂಡಲ್‌ವುಡ್‌ಗೆ ನಟನಾಗಿ ಪರಿಚಯವಾಗಿದ್ದ ನಿರಂಜನ್‌ ಸುಧೀಂದ್ರ, ಈಗ ಪೂರ್ಣ ಪ್ರಮಾಣದಲ್ಲಿ ನಾಯಕ ನಟನಾಗಿ ಕಾಣಿಸಿಕೊಳ್ಳುತ್ತಿರುವ ಮತ್ತೂಂದು ಚಿತ್ರ ಅನೌನ್ಸ್‌ ಆಗಿದೆ. ಅಂದಹಾಗೆ, ಆ ಚಿತ್ರದ ಹೆಸರು “ಸೂಪರ್‌ ಸ್ಟಾರ್‌’. ಕೆಲ ವರ್ಷಗಳ ಹಿಂದೆ ಉಪೇಂದ್ರ ಅಭಿನಯಿಸಿದ್ದ ಚಿತ್ರದ ಹೆಸರನ್ನೇ ಇಟ್ಟುಕೊಂಡು ಈ ಚಿತ್ರ ಬರುತ್ತಿದೆಯಾದರೂ, ಇದಕ್ಕೂ ಆ ಚಿತ್ರಕ್ಕೂ ಯಾವುದೇ ಸಂಬಂಧವಿಲ್ಲ ಅನ್ನೋದು ಚಿತ್ರತಂಡದ ಮಾತು.

“ಆರ್‌ವಿಬಿ ಸಿನಿಮಾಸ್‌’ ಬ್ಯಾನರ್‌ನಲ್ಲಿ ನಿರ್ಮಾಣವಾಗುತ್ತಿರುವ “ಸೂಪರ್‌ ಸ್ಟಾರ್‌’ ಚಿತ್ರಕ್ಕೆ ರಮೇಶ್‌ ವೆಂಕಟೇಶ್‌ ಬಾಬು ಕಥೆ, ಚಿತ್ರಕಥೆ ಬರೆದು ನಿರ್ದೇಶನ ಮಾಡುತ್ತಿದ್ದಾರೆ. ಇತ್ತೀಚೆಗಷ್ಟೇ “ಸೂಪರ್‌ ಸ್ಟಾರ್‌’ ಚಿತ್ರದ ಪೋಸ್ಟರ್‌ ಬಿಡುಗಡೆಯಾಗಿದ್ದು, ಆ.20ರಂದು ಚಿತ್ರದ ಕ್ಯಾರೆಕ್ಟರ್‌ ಟೀಸರ್‌ ಬಿಡುಗಡೆ ಮಾಡಲು ಚಿತ್ರತಂಡ ಪ್ಲಾನ್‌ ಹಾಕಿಕೊಂಡಿದೆ. ಸದ್ಯ ಪೋಸ್ಟರ್‌ ಮತ್ತು ಗೆಟಪ್‌ ಮೂಲಕ ಒಂದಷ್ಟು ಸಿನಿಪ್ರಿಯರ ಗಮನ ಸೆಳೆದಿರುವ “ಸೂಪರ್‌ ಸ್ಟಾರ್‌’ ತೆರೆಮೇಲೆ ಹೇಗೆ ಕಾಣಲಿದ್ದಾನೆ ಅನ್ನೋದು ಚಿತ್ರ ರಿಲೀಸ್‌ ಆದ ಮೇಲಷ್ಟೇ ಗೊತ್ತಾಗಲಿದೆ.