ರಾಜ್ಯ ವಿಭಜನೆ ಅಪಾಯ ತಪ್ಪಿಸಿದವರು ದೇವರಾಜ ಅರಸು

Team Udayavani, Aug 21, 2020, 6:13 PM IST

ವಿಜಯಪುರ: ಉಳುವವನೇ ಹೊಲದೊಡೆಯ ಎಂಬ ಕ್ರಾಂತಿಕಾರಿ ಕಾರ್ಯಕ್ರಮದ ಮೂಲಕ ಮಾಜಿ ಮುಖ್ಯಮಂತ್ರಿ ದೇವರಾಜ ಅರಸರು ರಾಜ್ಯ ವಿಭಜನೆಯ ಅಪಾಯವನ್ನು ತಪ್ಪಿಸಿದರು ಎಂದು ಹಿರಿಯ ಪತ್ರಕರ್ತ ಆರ್‌.ಟಿ. ವಿಠ್ಠಲಮೂರ್ತಿ ಅಭಿಪ್ರಾಯ ಪಟ್ಟಿದ್ದಾರೆ.

ದಿ| ದೇವರಾಜ ಅರಸು ಅವರ 105ನೇ ಜನ್ಮ ದಿನಾಚರಣೆ ಪ್ರಯುಕ್ತ ಕರ್ನಾಟಕ ರಾಜ್ಯ ಅಕ್ಕಮಹಾದೇವಿ ಮಹಿಳಾ ವಿವಿ ಏರ್ಪಡಿಸಿದ್ದ ದೇವರಾಜ ಅರಸು-ಸಾಮಾಜಿಕ ನ್ಯಾಯ ಆನ್‌ಲೈನ್‌ ಕಾರ್ಯಕ್ರಮದಲ್ಲಿ ಅವರು ಉಪನ್ಯಾಸ ನೀಡಿದರು. ಏಕೀಕರಣಕ್ಕಿಂತ ಮುಂಚೆ ಹಳೆ ಮೈಸೂರಿನ ಪ್ರಬಲ ಸಮುದಾಯದವರು ಮುಖ್ಯಮಂತ್ರಿ ಹುದ್ದೆಯನ್ನು ಅಲಂಕರಿಸುತ್ತಿದ್ದರು. ಏಕೀಕರಣದ ನಂತರ ಉತ್ತರ ಕರ್ನಾಟಕದ ಒಂದು ಪ್ರಬಲ ಸಮುದಾಯದವರು ಮುಖ್ಯಮಂತ್ರಿ ಹುದ್ದೆಯನ್ನು ಅಲಂಕರಿಸತೊಡಗಿದರು. ಇದರಿಂದಾಗಿ ಸಹಜವಾಗಿಯೇ ಎರಡು ಸಮುದಾಯಗಳಲ್ಲಿ ಅಧಿಕಾರಕ್ಕಾಗಿ ಭಿನ್ನಾಭಿಪ್ರಾಯ ಶುರುವಾಯಿತು. ಮುಖ್ಯಮಂತ್ರಿ ಹುದ್ದೆ ತಮಗೆ ದಕ್ಕಬೇಕೆಂದರೆ ಅಧಿಕಾರದಲ್ಲಿ ಹೆಚ್ಚು ಪಾಲು ತಮಗೆ ಸಿಗಬೇಕೆಂದರೆ ವಿಭಜನೆ ಸೂಕ್ತ ಎಂಬ ಅಭಿಪ್ರಾಯಗಳು ಕೇಳಿ ಬರತೊಡಗಿದವು ಎಂದರು.

ಆದರೆ ದೇವರಾಜ ಅರಸರು ಮುಖ್ಯಮಂತ್ರಿಯಾದ ನಂತರ ಭೂ ಸುಧಾರಣಾ ಕಾಯ್ದೆಗೆ ತಿದ್ದುಪಡಿ ತಂದು ಜಾರಿಗೆ ತಂದು ಉಳುವವನೇ ಹೊಲದೊಡೆಯ ಎಂಬ ಕಾರ್ಯಕ್ರಮ ದುರ್ಬಲ ವರ್ಗಗಳಲ್ಲೂ ರಾಜಕೀಯ ಪ್ರಜ್ಞೆಯನ್ನು ಹೆಚ್ಚಿಸಿತು. ರಾಜಕೀಯ ಪ್ರಜ್ಞೆ ಇರುವ ವರ್ಗ ಸಹಜವಾಗಿಯೇ ತಮ್ಮನ್ನು ಆಳುವವರು ಯಾರಿರಬೇಕು ಎಂಬ ಕಡೆ ಗಮನ ಹರಿಸುತ್ತದೆ. ಅದುವರೆಗೆರಾಜಕೀಯ ಪ್ರಜ್ಞೆ ಇಲ್ಲದ ವರ್ಗಗಳು ಯಾವಾಗ ಆ ಪ್ರಜ್ಞೆ ಪಡೆದವೋ ಅದಾದ ನಂತರ ಅಧಿಕಾರ ಪಡೆಯಲು ವಿಭಜನೆಯ ಬಗ್ಗೆ ಒಲವು ತೋರಿಸುತ್ತಿದ್ದ ನಾಯಕರ ಧ್ವನಿ ಕ್ಷೀಣವಾಯಿತು ಎಂದು ವಿಶ್ಲೇಷಿಸಿದರು.

ರಾಜಕೀಯ ಪ್ರಜ್ಞೆ ಇಲ್ಲದ ವರ್ಗಗಳನ್ನು ಹಿಡಿತದಲ್ಲಿಟ್ಟುಕೊಂಡು ಅಧಿಕಾರ ಪಡೆಯಬಹುದು. ಆದರೆ ರಾಜಕೀಯ ಪ್ರಜ್ಞೆ ಬೆಳೆದ ವರ್ಗಗಳನ್ನು ಹಿಡಿತದಲ್ಲಿಟ್ಟುಕೊಂಡು ಆಸೆ ಈಡೇರಿಸಿಕೊಳ್ಳುವುದು ಕಷ್ಟ. ಇದು ಗೊತ್ತಾಗಿದ್ದರಿಂದಲೇ ವಿಭಜನೆ ಮೂಲಕ ಅಧಿಕಾರ ಪಡೆಯುವ ನಿರೀಕ್ಷೆ ಇರಿಸಿಕೊಂಡಿದ್ದವರ ಧ್ವನಿ ಕ್ಷೀಣವಾಯಿತು ಎಂದು ಹೇಳಿದರು.

ಅರಸರ ಬದುಕಿನ ಮುಖ್ಯ ಗುರಿ ಸಂಪತ್ತಿನ ಕೇಂದ್ರೀಕರಣದ ವಿರುದ್ಧ ಹೋರಾಡುವುದೇ ಆಗಿತ್ತು. ಕೆಲವೇ ಪ್ರಮಾಣದ ಜನ ವ್ಯವಸ್ಥೆಯ ಬಹುಪಾಲು ಸಂಪತ್ತನ್ನು ತಮ್ಮ ಹಿಡಿತದಲ್ಲಿಟ್ಟುಕೊಂಡಾಗ ಬಹುಸಂಖ್ಯಾತ ವರ್ಗ ಅಸಹಾಯಕವಾಗುತ್ತದೆ. ವಿಪರ್ಯಾಸವೆಂದರೆ ಸಂಪತ್ತನ್ನು ಕೇಂದ್ರೀಕರಿಸಿಕೊಂಡವರಿಗೆ ತಮ್ಮ ವಿರುದ್ಧ ನಿಂತವರನ್ನು ಎದುರಿಸಲು ಸಲಕರಣೆಗಳಿವೆ. ಆದರೆ ಅವರ ವಿರುದ್ಧ ಹೋರಾಡುವವರ ಕೈಲಿ ಯಾವ ಸಲಕರಣೆಗಳೂ ಇರುವುದಿಲ್ಲ .ಹೀಗಾಗಿ ದುರ್ಬಲ ವರ್ಗಗಳನ್ನು ಹಿಂದಿಟ್ಟುಕೊಂಡು ಹೋರಾಟ ನಡೆಸುವುದು ಬಹಳ ಕಷ್ಟ.ಆದರೆ ದೇವರಾಜ ಅರಸರು ಆ ಕೆಲಸ ಮಾಡಿದರು ಎಂದರು.

ಇವತ್ತು ಕೂಡಾ ಸಂಪತ್ತಿನ ಕೇಂದ್ರೀಕರಣದ ಕ್ರಿಯೆ ನಿರಂತರವಾಗಿ ನಡೆಯುತ್ತಿದೆ.ಬಹು ಸಂಖ್ಯಾತರು ಅಸಹಾಯಕರಾಗುತ್ತಿದ್ದಾರೆ.ಹೀಗಾಗಿ ಯಾವ ಉದ್ದೇಶವಿಟ್ಟುಕೊಂಡು ದೇವರಾಜ ಅರಸರು ಹೋರಾಡಿದರೋ ಅಂತಹ ಹೋರಾಟ ನೆನಪಿಸಿಕೊಂಡು ವ್ಯವಸ್ಥೆಯ ಬಹುಪಾಲು ಜನರು ಮೇಲೆದ್ದು ನಿಲ್ಲಬೇಕಾದ ಅಗತ್ಯವಿದೆ ಎಂದು ಹೇಳಿದರು.

ಅಕ್ಕಮಹಾದೇವಿ ಮಹಿಳಾ ವಿವಿ ಪ್ರಭಾರ ಕುಲಪತಿ ಪ್ರೊ| ಓಂಕಾರಗೌಡ ಕಾಕಡೆ ಅಧ್ಯಕ್ಷತೆ ವಹಿಸಿದ್ದರು. ಕುಲ ಸಚಿವೆ ಪ್ರೊ| ಆರ್‌. ಸುನಂದಮ್ಮ, ಡಾ| ಶ್ರೀನಿವಾಸ್‌ ಇದ್ದರು.