ಮಾರ್ಗ ಮಧ್ಯೆ ಸಿಕ್ಕಳು ರೀಷ್ಮಾ

Team Udayavani, Aug 24, 2020, 6:36 PM IST

ಕೆಲವು ನಾಯಕ ನಟಿಯರೇ ಹಾಗೆ. ಚಿತ್ರರಂಗಕ್ಕೆ ಕಾಲಿಟ್ಟು ತಮ್ಮ ಮೊದಲ ಸಿನಿಮಾ ಸ್ಕ್ರೀನ್‌ಗೆ ಬರುವ ಮೊದಲೇ, ಒಂದಷ್ಟು ಗುರುತಿಸಿಕೊಂಡು ಒಂದರ ಹಿಂದೊಂದು ಸಿನಿಮಾ ಗಳಲ್ಲಿ ಬ್ಯುಸಿಯಾಗುತ್ತಾರೆ. ಸದ್ಯ ಆ ಸಾಲಿಗೆ ಸೇರುತ್ತಿರುವ ಮತ್ತೂಬ್ಬ ನಾಯಕಿಯ ಹೆಸರು ರೀಷ್ಮಾ.

ಅಂದಹಾಗೆ, ಯಾರು ಈ ರೀಷ್ಮಾ ಅಂತ ನೀವು ಕೇಳಬಹುದು. ಅದಕ್ಕೆ ಉತ್ತರ ಜೋಗಿ ಪ್ರೇಮ್‌ ನಿರ್ದೇಶನದ “ಏಕ್‌ ಲವ್‌ ಯಾ’. ಹೌದು, ಜೋಗಿ ಪ್ರೇಮ್‌ ನಿರ್ದೇಶನದ ಮತ್ತು ನಟಿ ರಕ್ಷಿತಾ ಸೋದರ ರಾಣಾ ನಾಯಕನಾಗಿ ಬೆಳ್ಳಿತೆರೆಗೆ ಕಾಲಿಡುತ್ತಿರುವ ಹೊಸಚಿತ್ರ “ಏಕ್‌ ಲವ್‌ ಯಾ’ ಚಿತ್ರದ ನಾಯಕಿಯೇ ಈ ರೀಷ್ಮಾ. ಈಗಾಗಲೇ ತಮ್ಮ ಮೊದಲ ಚಿತ್ರ “ಏಕ್‌ ಲವ್‌ ಯಾ’ ಮುಗಿಸಿರುವ ರೀಷ್ಮಾ, ಆ ಚಿತ್ರ ಬಿಡುಗಡೆಯ ನಿರೀಕ್ಷೆಯಲ್ಲಿದ್ದಾರೆ.

ಅದರ ನಡುವೆಯೇ ರೀಷ್ಮಾ ಮತ್ತೂಂದು ಚಿತ್ರಕ್ಕೆ ನಾಯಕಿಯಾಗಿ ಆಯ್ಕೆಯಾಗಿದ್ದಾರೆ. ಆ ಚಿತ್ರದ ಹೆಸರು “ಮಾರ್ಗ’. “ಆ ದಿನಗಳು’ ಖ್ಯಾತಿಯ ಚೇತನ್‌ ನಾಯಕನಾಗಿ ಅಭಿನಯಿಸುತ್ತಿರುವ “ಮಾರ್ಗ’ ಚಿತ್ರ ಇತ್ತೀಚೆಗೆ ಸೆಟ್ಟೇರಿದೆ. ಈ ಚಿತ್ರದಲ್ಲಿ ರೀಷ್ಮಾ ನಾಯಕಿಯಾಗಿ ಅಭಿನಯಿಸುತ್ತಿದ್ದಾರೆ. ತಮ್ಮ ಹೊಸಚಿತ್ರದ ಪಾತ್ರದ ಬಗ್ಗೆ ಮಾತನಾಡುವ ರೀಷ್ಮಾ, “”ಏಕ್‌ ಲವ್‌ ಯಾ’ ಆದಮೇಲೆ ನಾನು ನಿರೀಕ್ಷಿಸುತ್ತಿದ್ದಂಥ ಪಾತ್ರ ಈ ಸಿನಿಮಾದಲ್ಲಿ ಸಿಕ್ಕಿದೆ. ಆಫೀಸ್‌ ವರ್ಕ್‌ ಮಾಡುವ ಹುಡುಗಿಯಾಗಿ ಇದರಲ್ಲಿ ಕಾಣಿಸಿಕೊಳ್ಳುತ್ತಿದ್ದೇನೆ. ಒಂಥರಾ ಫಾರ್ಮಲ್‌ ಲುಕ್‌ ಇರುವಂಥ ಡಿಫ‌ರೆಂಟ್‌ ಕ್ಯಾರೆಕ್ಟರ್‌ ಇದರಲ್ಲಿದೆ. ಈಗಾಗಲೇ ಈ ಸಿನಿಮಾದ ಕ್ಯಾರೆಕ್ಟರ್‌ಗೆ ಒಂದಷ್ಟು ಹೋಂ ವರ್ಕ್‌ ಮಾಡಿಕೊಳ್ಳುತ್ತಿದ್ದೇನೆ. ಇದೇ ಸೆಪ್ಟೆಂಬರ್‌ ನಿಂದ ಈ ಸಿನಿಮಾದ ಶೂಟಿಂಗ್‌ ಶುರುವಾಗಲಿದೆ.

ಇದೊಂದು ಸಸ್ಪೆನ್ಸ್‌ – ಥ್ರಿಲ್ಲರ್‌ ಸಬ್ಜೆಕ್ಟ್ ಸಿನಿಮಾ. ಆಡಿಯನ್ಸ್‌ಗೆ ಅನೇಕ ಅನಿರೀಕ್ಷಿತ ಅಚ್ಚರಿಗಳು ಇದರಲ್ಲಿರುತ್ತವೆ’ ಎನ್ನುತ್ತಾರೆ. ಇನ್ನು “ಮಾರ್ಗ’ ಚಿತ್ರದಲ್ಲಿ ಚೇತನ್‌ ಅವರಿಗೆ ನಾಯಕಿಯಾಗಿ ಜೋಡಿಯಾಗುತ್ತಿರುವ ರೀಷ್ಮಾ ಅವರಿಗೆ ಚಿತ್ರದಲ್ಲಿ ಬ್ಯುಟಿಫ‌ುಲ್‌ ಸಾಂಗ್ಸ್‌ ಕೂಡ ಇದೆಯಂತೆ. “ಚೇತನ್‌ ಮತ್ತು ನನ್ನ ಕೆಮಿಸ್ಟ್ರಿ ಸ್ಕ್ರೀನ್‌ ಮೇಲೆ ವರ್ಕೌಟ್ ಆಗಲಿದೆ. ಇಂಡಸ್ಟ್ರಿಗೆ ಬರುತ್ತಿದ್ದಂತೆ, ಇಂಥ ಒಳ್ಳೆಯ ಸಿನಿಮಾಗಳು, ಕ್ಯಾರೆಕ್ಟರ್‌ಗಳು ಸಿಗುತ್ತಿರುವುದು ನಿಜಕ್ಕೂ ಖುಷಿಯಾಗುತ್ತಿದೆ. ಎಲ್ಲವೂ ಅಂದುಕೊಂಡಂತೆ ಆದ್ರೆ, ಈ ವರ್ಷದ ಕೊನೆಗೆ ಅಥವಾ ಮುಂದಿನ ವರ್ಷದ ಆರಂಭದಲ್ಲಿ ಕನ್ನಡ ಪ್ರೇಕ್ಷಕರ ಮುಂದೆ ಬರೋದು ಗ್ಯಾರೆಂಟಿ’ ಎನ್ನುತ್ತಾರೆ ರೀಷ್ಮಾ.