ಉಡುಪಿ: ಬೆಳ್ಳಂಪಳ್ಳಿ ಸೇತುವೆ ಬಳಿ ಕೊಳಲನೂದುವ ಗೋಪಾಲಕೃಷ್ಣನ ಪಂಚಲೋಹದ ವಿಗ್ರಹ ಪತ್ತೆ!

Team Udayavani, Sep 1, 2020, 9:32 AM IST

ಉಡುಪಿ:  ಬೆಳ್ಳಂಪಳ್ಳಿಯ ಸ್ವರ್ಣ ನದಿಗೆ ಅಡ್ಡಲಾಗಿ ಕಟ್ಟಿರುವ ಸೇತುವೆ ಕೆಳಗಡೆ ಆಗಸ್ಟ್ 31ರ ಸೋಮವಾರ ರಾತ್ರಿ ಕೊಳಲನೂದುವ ಗೋಪಾಲ ಕೃಷ್ಣನ ಪಂಚಲೋಹದ ವಿಗ್ರಹ ಪತ್ತೆಯಾಗಿದೆ.

ರಾತ್ರಿ  8:00 ಗಂಟೆ ಸುಮಾರಿಗೆ ಹವ್ಯಾಸಿ ಸ್ಥಳೀಯ ಮೀನುಗಾರು ಗಾಳ ಹಾಕುತ್ತಿದ್ದ ಸಂದರ್ಭ ಸೇತುವೆ ಕೆಳಗಡೆ ನೀರಿನಲ್ಲಿ ಹೊಳೆಯುತ್ತಿರುವ ವಸ್ತುವೊಂದನ್ನು ಕಂಡಿದ್ದಾರೆ.

ಕೂಡಲೇ ಸ್ಥಳೀಯರಾದ ಪುರಂದರ ಕೋಟ್ಯಾನ್ ರಾಕೇಶ್, ನಿಶಾನ್, ರಿತಿಕ್, ನವೀನ್ , ಆತ್ರಾಡಿ ದಿನೇಶ್ ಪೂಜಾರಿ ಮತ್ತು ಅವರ ತಂಡ ತಟ್ಟನೆ ಸ್ವರ್ಣ ನದಿಗೆ ಜಿಗಿದು ವಸ್ತುವನ್ನು ಮೇಲೆತ್ತಿದಾಗ, ಕೊಳಲನೂದುವ ಗೋಪಾಲಕೃಷ್ಣನ ಪಂಚಲೋಹದ ವಿಗ್ರಹ ಕಂಡುಬಂದಿದೆ.

ಈ ವಿಗ್ರಹ   ಸುಮಾರು ಎಂಟು ಕೆ.ಜಿ ತೂಕ ಹೊಂದಿದೆ ಸ್ಥಳೀಯ ಮುಖಂಡರಾದ ಬೆಳ್ಳಂಪಳ್ಳಿ ಭೂತರಾಜ ಸನ್ನಿಧಿಯ ಅಧ್ಯಕ್ಷರಾದ ಪ್ರವೀಣ್ ಶೆಟ್ಟಿ ಬೆಳ್ಳಂಪಳ್ಳಿ ತಿಳಿಸಿದ್ದಾರೆ. ಇದೀಗ ಈ ವಿಗ್ರಹವನ್ನು ಹಿರಿಯಡ್ಕ ಠಾಣೆಗೆ ಒಪ್ಪಿಸಲಾಗಿದ್ದು, ಮುಂದಿನ ತನಿಖೆ ನಡೆಯಲಿದೆಯೆಂದು ಪ್ರವೀಣ್ ಶೆಟ್ಟಿ ತಿಳಿಸಿದ್ದಾರೆ.