“ಸಾಲಕ್ಕೆ ಸುಪ್ರೀಂ” ನೆಮ್ಮದಿ ; ಸದ್ಯ ಸುಸ್ತಿದಾರರೆಂದು ಘೋಷಿಸದಿರಲು ಸೂಚನೆ

Team Udayavani, Sep 4, 2020, 6:20 AM IST

ಹೊಸದಿಲ್ಲಿ: ಲಾಕ್‌ಡೌನ್‌ ಅವಧಿಯಲ್ಲಿ ಕಷ್ಟ ಅನುಭವಿಸಿ, ಇನ್ನೂ ಸಾಲದ ಇಎಂಐ ಕಟ್ಟಲು ಕಷ್ಟಪಡುತ್ತಿರುವ ಸಾಲಗಾರರಿಗೆ ಸುಪ್ರೀಂ ಕೋರ್ಟ್‌ ಅಭಯ ನೀಡಿದೆ. ಮುಂದಿನ ಆದೇಶದ ವರೆಗೆ ಯಾರನ್ನೂ ಸುಸ್ತಿದಾರರು ಎಂದು ಘೋಷಿಸಬೇಡಿ ಎಂದು ಬ್ಯಾಂಕ್‌ಗಳಿಗೆ ಸುಪ್ರೀಂ ಕೋರ್ಟ್‌ ಮಧ್ಯಾಂತರ ಆದೇಶದಲ್ಲಿ ಸೂಚಿಸಿದೆ.

ಸಾಲ ಮುಂದೂಡಿಕೆ ಅವಧಿ ವಿಸ್ತರಣೆ ಮತ್ತು ಮೊರಟೋರಿಯಂ ಅವಧಿಯ ಬಡ್ಡಿ ವಿನಾಯಿತಿ ಕೋರಿ ಸಲ್ಲಿಕೆಯಾಗಿರುವ ಅರ್ಜಿಗಳ ವಿಚಾರಣೆ ನಡೆಸಿದ ಸುಪ್ರೀಂ ಕೋರ್ಟ್‌ನ ತ್ರಿಸದಸ್ಯ ಪೀಠವು ಈ ಆದೇಶ ಹೊರಡಿಸಿದೆ. ಜತೆಗೆ, ಆ. 31ರ ವರೆಗೆ ಅನ್ವಯವಾಗುವಂತೆ ಯಾವುದೇ ಸಾಲದ ಅಕೌಂಟ್‌ಗಳನ್ನು ಅನುತ್ಪಾದಕ ಆಸ್ತಿ ಎಂದು ಘೋಷಿಸಬಾರದು ಎಂದಿದೆ. ಈ ವಿಚಾರಣೆಯನ್ನು ಕೇವಲ ಬಡ್ಡಿ ಮೇಲೆ ಬಡ್ಡಿ ವಿಧಿಸುವುದಕ್ಕೆ ಮಾತ್ರ ಸೀಮಿತ ಮಾಡಲು ಸಾಧ್ಯವಿಲ್ಲ, ಸಾಲಗಾರರ ಹಿತವನ್ನೂ ಕಾಯಬೇಕಿದೆ ಎಂದಿದೆ.

ಈ ಮಧ್ಯೆ ಬ್ಯಾಂಕ್‌ಗಳು ಮತ್ತು ಬ್ಯಾಂಕೇತರ ಹಣಕಾಸು ಸಂಸ್ಥೆಗಳ ಮುಖ್ಯಸ್ಥರೊಂದಿಗೆ ಸಂವಾದ ನಡೆಸಿರುವ ವಿತ್ತ ಸಚಿವೆ ನಿರ್ಮಲಾ ಸೀತಾರಾಮನ್‌, ಸಾಲಗಾರರ ಹಿತ ಕಾಯಲು ಮತ್ತು ಕುಸಿದಿರುವ ಉದ್ದಿಮೆಗಳನ್ನು ಪುನಶ್ಚೇತನಗೊಳಿಸಲು ಸೆ. 15ರೊಳಗೆ ಕಾರ್ಯಯೋಜನೆ ರೂಪಿಸಿ ಎಂದು ಸೂಚಿಸಿದ್ದಾರೆ.