ಐಪಿಎಲ್ ನಲ್ಲಿ ಈ ಬಾರಿ ಬೆನ್ ಸ್ಟೋಕ್ಸ್ ಆಟ ಅನುಮಾನ

Team Udayavani, Sep 15, 2020, 8:10 PM IST

ನವದೆಹಲಿ : ಐಪಿಎಲ್ 13 ನೇ ಆವೃತ್ತಿಗೆ ಇನ್ನೇನು ದಿನಗಣನೆ ಆರಂಭವಾಗಿದೆ. ಒಂದಿಷ್ಟು ಸ್ಟಾರ್ ಆಟಗಾರರು ಈಗಾಗಲೇ ಕೂಟದಿಂದ ಹಿಂಜರಿದಿರುವುದು ಕ್ರಿಕೆಟ್ ಪ್ರೇಮಿಗಳಿಗೆ ನಿರಾಶೆಯ ಹೊಡೆತ ನೀಡಿದೆ. ಈ ಪಟ್ಟಿಗೆ ಸದ್ಯ ರಾಜಸ್ಥಾನ್ ರಾಯಲ್ಸ್ ತಂಡದ ಸ್ಟಾರ್ ಆಟಗಾರ ಇಂಗ್ಗೆಂಡ್ ನ ಬೆನ್ ಸ್ಟೋಕ್ಸ್ ಸೇರಿದ್ದಾರೆ.

ಈ ಬಗ್ಗೆ ಸಂದರ್ಶನವೊಂದರಲ್ಲಿ ರಾಜಸ್ಥಾನ್ ರಾಯಲ್ಸ್ ತಂಡದ ಮುಖ್ಯ ಕೋಚ್ ಆಂಡ್ರ್ಯೂ ಮೆಕ್ ಡೊನಾಲ್ಡ್ ಮಾತಾಡುತ್ತಾ ಬೆನ್ ಸ್ಟೋಕ್ಸ್  ಈ ಬಾರಿಯ ಐಪಿಎಲ್ ನಲ್ಲಿ ಆಡುವುದು ಅನುಮಾನ ಎಂದು ಹೇಳಿದ್ದಾರೆ. ನಾವು ಈಗಾಗಲೇ ಸ್ಟೋಕ್ಸ್ ಅವರಿಗೆ ಬೇಕಾದ ಸಮಯವನ್ನು ನೀಡಿದ್ದೇವೆ. ಇದು ಅವರಿಗೆ ಸಂಕಷ್ಟದ ಸನ್ನಿವೇಶ. ಇಂಥ ಸಮಯದಲ್ಲಿ ಬೇಕಾದ ಸಮಯವನ್ನು ನಾವು ನೀಡಿದ್ದೇವೆ.ನಾನು ಈಗಲೇ ಸ್ಟೋಕ್ಸ್ ಈ ಬಾರಿ ತಂಡಕ್ಕೆ ಸೇರಿಕೊಳ್ಳುತ್ತಾರೆ ಎನ್ನುವುದನ್ನು ಖಚಿತವಾಗಿ ಹೇಳಲಾರೆ ಎಂದು ಹೇಳಿದ್ದಾರೆ.

ಸ್ಟೋಕ್ಸ್ ಅವರ ಕೌಟುಂಬಿಕ ವಿಚಾರವಾಗಿರುವ ಕಾರಣ. ನಾವು ಖಚಿತವಾಗಿ ಏನನ್ನು ಹೇಳಲು ಸಾಧ್ಯವಿಲ್ಲ.. ಅವರು ಯಾವಾಗ ತರಬೇತಿಗೆ ಸೇರಿಕೊಳ್ಳುತ್ತಾರೆ ಎನ್ನುವುದು ಗೊತ್ತಿಲ್ಲ.ನಾವು ಅವರೊಂದಿಗೆ ನಿರಂತರ ಸಂಪರ್ಕ ಸಾಧಿಸಲು ಪ್ರಯತ್ನ ಪಟ್ಟಿದ್ದೇವೆ. ಕೌಟುಂಬಿಕ ವಿಚಾರ ಬಗೆ ಹರಿದ ಮೇಲೆ ಅವರ ಕುರಿತು ನಿರ್ಧಾರ ತೆಗೆದುಕೊಳ್ಳಬಹುದೆಂದು ಕೋಚ್ ಹೇಳಿದ್ದಾರೆ.

ರಾಜಸ್ಥಾನ್ ತಂಡದ ಮತ್ತೊರ್ವ ಆಟಗಾರ ಆಸ್ಟೇಲಿಯಾದ ಸ್ಟೀವ್ ಸ್ಮಿತ್ ಗಾಯದಿಂದ ಹೊರ ಉಳಿದಿದ್ದು ಅವರ ಲಭ್ಯತೆಯ ಬಗ್ಗೆ ಇನ್ನಷ್ಟೇ ವರದಿ ಬರಬೇಕಿದೆ.

ರಾಜಸ್ಥಾನ್ ರಾಯಲ್ಸ್  22 ಸೆಪ್ಟೆಂಬರ್ ರಂದು ಚೆನ್ನೈ ವಿರುದ್ಧ ತನ್ನ ಮೊದಲ ಪಂದ್ಯವನ್ನು ಆಡಲಿದೆ.