ಗ್ರಾಮೀಣ ಭಾಗದಲ್ಲೂ ಬಸ್‌ ಓಡಿಸಿ

Team Udayavani, Sep 22, 2020, 3:57 PM IST

ಸಾಂದರ್ಭಿಕ ಚಿತ್ರ

ಚನ್ನರಾಯಪಟ್ಟಣ: ಕೇಂದ್ರ ಹಾಗೂ ರಾಜ್ಯ ಸರ್ಕಾರ ಲಾಕ್‌ಡೌನ್‌ ತೆರವು ಮಾಡಿ ಎರಡು ತಿಂಗಳು ಸಮೀಪಿಸಿದೆ. ಆದರೆ, ಗ್ರಾಮೀಣ ಭಾಗಕ್ಕೆ ಇನ್ನೂ ಕೆಎಸ್‌ಆರ್‌ಟಿಸಿ ಬಸ್‌ ಸಂಚರಿಸುತ್ತಿಲ್ಲ. ಇದರಿಂದ ಹಳ್ಳಿಗರು ಗೂಡ್ಸ್‌ ಆಟೋ, ಮಿನಿ ಟೆಂಪೋ, ದಾರಿಯಲ್ಲಿ ಬರುವ ದ್ವಿಚಕ್ರ ವಾಹನಗಳನ್ನು ತಡೆ ಮಾಡಿಕೊಂಡು ತಾಲೂಕು ಕೇಂದ್ರಕ್ಕೆ, ಇತರೆ ಸ್ಥಳಗಳಿಗೆ ಹೋಗಬೇಕಾಗಿದೆ.

ಚನ್ನರಾಯಪಟ್ಟಣ ಘಟಕದಿಂದ 104ಮಾರ್ಗಗಳಲ್ಲಿಬಸ್‌ ಸಂಚಾರ ಮಾಡಬೇಕಿದೆ. ಆದರೆ, ಈಗ 65 ಮಾರ್ಗದಲ್ಲಿ ಮಾತ್ರ ಓಡಾಟ ನಡೆಸುತ್ತಿವೆ. ಉಳಿದ 39 ಮಾರ್ಗದಲ್ಲಿ ಬಸ್‌ ಸಂಚರಿಸದೇ ಜನತೆ ಸರಕು ಸಾಗಣೆ ವಾಹನ ಗಳು, ಪ್ರಯಾಣಿಕರ ಆಟೋ, ಖಾಸಗಿ ವಾಹನ ಅವಲಂಬಿಸುವಂತಾಗಿದೆ.  ಈಗಾಗಲೇ ವಾರದ ಸಂತೆಗಳು ಆರಂಭವಾಗಿರುವುದರಿಂದ ತರಕಾರಿ, ದಿನಸಿ, ಇತರೆ ಪದಾರ್ಥ ಕೊಳ್ಳುವವರು, ಮಾರಾಟ ಮಾಡುವವರ ಪರಿಸ್ಥಿತಿ ಹೇಳ ತೀರದಾಗಿದೆ.

 ಆದಾಯ ಇಲ್ಲ: ಲಾಕ್‌ಡೌನ್‌ ತೆರವು ಮಾಡಿದಮಾರನೇ ದಿನ 85 ಮಾರ್ಗದಲ್ಲಿ ಬಸ್‌ ಸಂಚಾರಮಾಡಿದವು. ಅಲ್ಲಿ ಒಂದು ಕಿ.ಮೀ.ಗೆ6 ರಿಂದ7 ರೂ. ಮಾತ್ರ ಹಣ ಸಂಗ್ರಹವಾಗುತ್ತಿತ್ತು. ಹೀಗಾಗಿ ಅಂತಹ ಮಾರ್ಗಗಳಲ್ಲಿ ಸಂಚಾರ ನಿಲ್ಲಿಸಲಾಗಿದೆ. ಇನ್ನು ಒಂದು ಕಿ.ಮೀ.ಗೆ 25 ರೂ.ಗೂ ಹೆಚ್ಚು ಹಣ ಸಂಗ್ರಹ ಆಗುವ ಕಡೆಯಲ್ಲಿ ಮಾತ್ರ ಬಸ್‌ ಓಡಿಸಲಾಗುತ್ತಿದೆ. ನಿಗಮದ ಪ್ರಕಾರ ಒಂದು ಕಿ.ಮೀ. ಗೆ 35 ರಿಂದ 36 ರೂ. ಆದಾಯ ಬರಬೇಕಿದೆ ಎನ್ನುತ್ತಾರೆ ಅಧಿಕಾರಿಗಳು.

ಎಲ್ಲೆಲ್ಲಿ ಸಂಚಾರ?: ಸದ್ಯ ಧರ್ಮಸ್ಥಳ, ಬೆಂಗಳೂರು, ಮೈಸೂರು, ಮಂಡ್ಯ, ಮಡಿಕೇರಿ, ಹಾಸನ, ಶೃಂಗೇರಿ, ತಿಪಟೂರು, ಪಾಂಡವಪುರ, ಕೆ. ಆರ್‌.ಪೇಟೆ, ಶ್ರೀರಂಗಪಟ್ಟಣ, ಎನ್‌.ಆರ್‌.ಪುರ, ಹೊಳೆನರಸೀಪುರ, ಅರಸೀಕೆರೆ, ಅರಕಲಗೂರು, ಮೇಲುಕೋಟೆ ಸೇರಿ 65 ಮಾರ್ಗಕ್ಕೆ ಚನ್ನರಾಯಪ‌ಟ್ಟಣಘಟಕದಿಂದ ‌ ಬಸ್‌ಗಳು ಸಂಚಾಋ ಮಾಡುತ್ತಿದ್ದು, ಇಲ್ಲಿ ಒಂದು ಕಿ.ಮೀ.ಗೆ 20 ರಿಂದ 25 ರೂ. ವರೆಗೆ ಆದಾಯ ಬರುತ್ತಿದೆ.

18 ಕಡೆ ಗ್ರಾಮೀಣ ಮಾರ್ಗ: ಸದ್ಯ ಬಸ್‌ ಸಂಚರಿಸುತ್ತಿರುವ 65 ಮಾರ್ಗದಲ್ಲಿ 18 ಗ್ರಾಮೀಣ ಭಾಗಕ್ಕೆ ಸೇರಿದ್ದು, ಗಂಡಸಿ, ಅರಸೀಕೆರೆ, ನುಗ್ಗೇಹಳ್ಳಿ, ಹಿರೀಸಾವೆ, ಶ್ರವಣಬೆಳಗೊಳ, ಹೊಳೆನರಸೀಪುರ ಭಾಗದ ಗ್ರಾಮೀಣ ಪ್ರದೇಶಗಳಿಗೆ ಬಸ್‌ ಓಡಾಡುತ್ತಿವೆ. ಇನ್ನು ತಾಲೂಕಿನ ಕೆಂಬಾಳು, ಬಾಗೂರು, ಕುಂದೂರು ಮಠ, ದಿಡಗ, ಕಬ್ಬಳಿ, ಅಕ್ಕನಹಳ್ಳಿ, ಚಲ್ಯ, ಹೀಗೆ ಪ್ರಮುಖ ಗ್ರಾಮೀಣ ಭಾಗದಲ್ಲಿ ಸಾರಿಗೆ ಬಸ್‌ ಸಂಚಾರ ಮಾಡುತ್ತಿಲ್ಲ. ಈ ಭಾಗದ ಜನ ಸ್ವಂತ ಬೈಕ್‌, ಆಟೋ ಅವಲಂಬಿಸಬೇಕಿದೆ.

ಘಟಕಕ್ಕೆ ದೂರವಾಣಿ ಕರೆಗಳ ಸುರಿಮಳೆ: ನಿತ್ಯವೂ ಗ್ರಾಮೀಣ ಭಾಗದ ಜನ ಘಟಕಕ್ಕೆ ದೂರವಾಣಿ ಕರೆ ಮಾಡಿ ಬಸ್‌ ಸೌಲಭ್ಯಕಲ್ಪಿಸುವಂತೆ ಮನವಿ ಮಾಡುತ್ತಿದ್ದಾರೆ. ಈ ವೇಳೆ ಘಟಕದ ಸಿಬ್ಬಂದಿ ನಿಗಮದ ನಿಯಮ ಹಾಗೂ ಆದಾಯವಾಗದ ಬಗ್ಗೆ ತಿಳಿಸುವ ಮೂಲಕ ಪ್ರಯಾಣಿಕರನ್ನು ಸಂತೈಸುವಂತಾಗಿದೆ.

ಪಾಸ್‌ ಪಡೆಯುವವರ ಸಂಖ್ಯೆಯೂ ಕ್ಷೀಣ : ಕೋವಿಡ್ ಗೆ ಮೊದಲು ಮಾಸಿಕ ಪಾಸ್‌ ವಿತರಣೆಯಿಂದ ನಿತ್ಯವೂ50 ಸಾವಿರ ರೂ. ಹಣ ಸಂಗ್ರಹ ಆಗುತ್ತಿತ್ತು. ಲಾಕ್‌ಡೌನ್‌ ತೆರವಾದ ಮೇಲೆ ಮಾಸಿಕ ಪಾಸ್‌ ನಿಂದ 20 ರಿಂದ 25 ಸಾವಿರ ರೂ. ಹಣ ನಿತ್ಯ ಸಂಗ್ರಹವಾಗುತ್ತಿದೆ. ಇನ್ನು ಕಳೆದ ಸಾಲಿನಲ್ಲಿ90 ಸಾವಿರ ವಿದ್ಯಾರ್ಥಿಗಳು ವಾರ್ಷಿಕ ಪಾಸ್‌ ಪಡೆದಿದ್ದರಿಂದ ಲಕ್ಷಾಂತರ ರೂ. ಹಣನಿಗಮಕ್ಕೆ ಬಂದಿತ್ತು. ಪ್ರಸಕ್ತ ವರ್ಷ ಶಾಲಾಕಾಲೇಜು ಬಾಗಿಲು ತೆರೆಯದೆ ಇರುವುದರಿಂದ ವಿದ್ಯಾರ್ಥಿ ಪಾಸ್‌ ವಿತರಣೆ ಆಗಿಲ್ಲ, ಆದಾಯವೂ ಶೂನ್ಯ.

ತರಬೇತಿ, ರಜೆ : ಘಟಕದಲ್ಲಿ430 ಚಾಲಕ, ನಿರ್ವಾಹಕರು,59 ಮಂದಿ ತಾಂತ್ರಿಕ ಸಿಬ್ಬಂದಿ ಇದ್ದಾರೆ. ಇವರಲ್ಲಿ ಗ್ರಾಮೀಣ ಪ್ರದೇಶದಲ್ಲಿ ಸಂಚಾರ ಮಾಡುವ ಬಸ್‌ನ ಚಾಲಕ ಹಾಗೂ ನಿರ್ವಾಹಕರು ತರಬೇತಿಯಲ್ಲಿದ್ದಾರೆ. ಇನ್ನು ಕೆಲವರು ರಜೆ ಮೇಲೆ ಊರಿಗೆ ತೆರಳಿದ್ದಾರೆ, ಇವರಿಗೆಲ್ಲ ಸರ್ಕಾರ ಆಗಸ್ಟ್‌ ಅಂತ್ಯದವರೆಗೆ ವೇತನ ನೀಡಿಲ್ಲ,59 ಮಂದಿ ತಾಂತ್ರಿಕ ಸಿಬ್ಬಂದಿ ಸೆ.1ರಿಂದಕರ್ತವ್ಯಕ್ಕೆ ಹಾಜರಾಗಿದ್ದಾರೆ.

ಶಾಲಾಕಾಲೇಜು ಪ್ರಾರಂಭ ಆಗುವವರೆಗೆ ಗ್ರಾಮೀಣ ಭಾಗದಲ್ಲಿ ಬಸ್‌ ಸಂಚಾರ ಮಾಡುವುದು ಬೇಡ ಎಂದು ಮೇಲಧಿಕಾರಿಗಳು ಆದೇಶಿಸಿದ್ದಾರೆ,ಕ್ಷೇತ್ರದ ಶಾಸಕ ಬಾಲಕೃಷ್ಣ ಈಗಾಗಲೆ ಸಭೆ ಮಾಡಿ ಅಗತ್ಯ ಇರುವ ಗ್ರಾಮಕ್ಕೆ ಹಂತವಾಗಿ ಬಸ್‌ ಓಡಿಸಲು ಸೂಚಿಸಿದ್ದಾರೆ. ಆದಾಯ ನೋಡಿ ಸಂಚಾರ ಆರಂಭಿಸಲಾಗುವುದು. –ಎಸ್‌.ಬಿ.ಶ್ರೀಧರ್‌, ಸಹಾಯಕ ಕಾರ್ಯಧೀಶಕರು.

ಗ್ರಾಮೀಣ ಭಾಗಕ್ಕೆ ಬಸ್‌ ಸಂಚಾರ ಮಾಡದೇ ಇರುವುದರಿಂದ ಅನೇಕ ಮಂದಿಗೆ ತೊಂದರೆ ಆಗುತ್ತಿದೆ. ಆದಷ್ಟು, ಬೇಗ ಬಸ್‌ಗಳು ಹಳ್ಳಿಕಡೆಗೆ ಸಂಚರಿಸುವಂ ತಾಗಲಿ, ಸ್ವಂತ ವಾಹನ ಹೊಂದಿಲ್ಲದವರ ಪಾಡು ಹೇಳತೀರದಂತಾಗಿದೆ. –ಶೇಖರ್‌, ಅಂಗವಿಕಲ, ಬಾಗೂರು.

ಶಾಮಸುಂದರ್‌ ಕೆ. ಅಣ್ಣೇನಹಳ್ಳಿ