ಫ್ರೆಂಚ್‌ ಓಪನ್‌-2020; ಮುಗುರುಜಾ 3 ಗಂಟೆ ಹೋರಾಟ

Team Udayavani, Sep 29, 2020, 11:07 PM IST

ಪ್ಯಾರಿಸ್‌: ಸ್ಪೇನಿನ ಮಾಜಿ ಚಾಂಪಿಯನ್‌ ಗಾರ್ಬಿನ್‌ ಮುಗುರುಜಾ 3 ಗಂಟೆಗಳ ಕಾಲ ಹೋರಾಟ ನಡೆಸಿ ಫ್ರೆಂಚ್‌ ಓಪನ್‌ ಗ್ರ್ಯಾಸ್ಲಾಮ್‌ ಮೊದಲ ಸುತ್ತಿನ ಆಘಾತದಿಂದ ಪಾರಾಗಿದ್ದಾರೆ. ವನಿತಾ ಸಿಂಗಲ್ಸ್‌ನಲ್ಲಿ ಸ್ಲೊವೇನಿಯಾದ ಟಮರಾ ಜಿದಾನ್ಸೆಕ್‌ ವಿರುದ್ಧದ ಪಂದ್ಯವನ್ನು ಅವರು 7-5, 4-6, 8-6 ಅಂತರದಿಂದ ಗೆದ್ದು ನಿಟ್ಟುಸಿರೆಳೆದರು. 2016ರಲ್ಲಿ ಇಲ್ಲಿ ಪ್ರಶಸ್ತಿ ಜಯಿಸಿದ್ದ ಮಾಜಿ ನಂ.1 ಆಟಗಾರ್ತಿ ಮುಗುರುಜಾ ಇನ್ನು ಜೆಕ್‌ ಆಟಗಾರ್ತಿ ಕ್ರಿಸ್ಟಿನಾ ಪ್ಲಿಸ್ಕೋವಾ ವಿರುದ್ಧ ಆಡಲಿದ್ದಾರೆ. ಅವರು ಸ್ಲೊವಾಕಿಯಾದ ವಿಕ್ಟೋರಿಯಾ ಕುಜೊವಾ ವಿರುದ್ಧ 6-1, 6-2ರಿಂದ ಗೆದ್ದು ಬಂದರು.

ಸೆರೆನಾ ಗೆಲುವು
ಕೂಟದ ನೆಚ್ಚಿನ ಆಟಗಾರ್ತಿಯರಲ್ಲಿ ಒಬ್ಬರಾಗಿರುವ ಸೆರೆನಾ ವಿಲಿಯಮ್ಸ್‌ ಮೊದಲ ಸುತ್ತಿನಲ್ಲಿ ಅಮೆರಿಕದವರೇ ಆದ ಕ್ರಿಸ್ಟಿ ಆ್ಯನ್‌ ವಿರುದ್ಧ 7-6 (2), 6-0 ಅಂತರದ ಜಯ ಸಾಧಿಸಿದರು. ಇವರ ಮುಂದಿನ ಎದುರಾಳಿ ಬಲ್ಗೇರಿಯಾದ ಸ್ವೆತಾನಾ ಪಿರೊಂಕೋವಾ. ಅವರು ಜರ್ಮನಿಯ ಆ್ಯಂಡ್ರಿಯಾ ಪೆಟ್ಕೊವಿಕ್‌ ವಿರುದ್ಧ 6-3, 6-3 ಅಂತರದ ಮೇಲುಗೈ ಸಾಧಿಸಿದರು.

ನಡಾಲ್‌ ಗೆಲುವು
“ಕ್ಲೇ ಕೋರ್ಟ್‌ ಮಾಸ್ಟರ್‌’ ರಫೆಲ್‌ ನಡಾಲ್‌ ಕೂಡ ಗೆಲುವಿನ ಓಟ ಆರಂಭಿಸಿದ್ದಾರೆ. ಅವರು ಮೊದಲ ಸುತ್ತಿನಲ್ಲಿ ಬೆಲರೂಸ್‌ನ ಈಗರ್‌ ಗೆರಸಿಮೋವ್‌ ವಿರುದ್ಧ 6-4, 6-4, 6-2 ನೇರ ಸೆಟ್‌ ಜಯ ಸಾಧಿಸಿದರು. ದ್ವಿತೀಯ ಸುತ್ತಿನಲ್ಲಿ ಅಮೆರಿಕದ ಮೆಕೆಂಜಿ ಮೆಕ್‌ಡೊನಾಲ್ಡ್‌ ವಿರುದ್ಧ ಆಡಲಿದ್ದಾರೆ.