“ಐಎನ್‌ಎಸ್‌ ವಿರಾಟ್‌’ 100 ಕೋಟಿ ರೂ.ಗೆ ಮಾರಾಟ?

Team Udayavani, Oct 2, 2020, 6:32 AM IST

ಹೊಸದಿಲ್ಲಿ: 30 ವರ್ಷ ನೌಕಾಪಡೆಯಲ್ಲಿ ಸೇವೆ ಸಲ್ಲಿಸಿ, ನಿವೃತ್ತಿಯಾಗಿರುವ ಐಎನ್‌ಎಸ್‌ ವಿರಾಟ್‌ ರಕ್ಷಣೆಗೆ 100 ಕೋಟಿ ರೂ. ಅಗತ್ಯವಿದೆ!

ಈ ಹಿಂದೆ ಐಎನ್‌ಎಸ್‌ ವಿರಾಟ್‌ ಹಡಗನ್ನು ಖರೀದಿಸಿದ್ದ ಶ್ರೀರಾಂ ಗ್ರೂಪ್‌, “ಹಡಗು ಒಡೆಯುವ ಪ್ರಕ್ರಿಯೆ’ಗೆ ಇದನ್ನು ಮುಂಬೈನಿಂದ ಗುಜರಾತ್‌ನ ಅಲಾಂಗ್‌ನಲ್ಲಿನ ಕಾರ್ಖಾನೆಗೆ ಕಳುಹಿಸಿಕೊಟ್ಟಿದೆ. ಈ ನೌಕಾ ಆಸ್ತಿಯನ್ನು ಮುಂಬೈ ಮೂಲದ ಕಂಪನಿಯೊಂದು ಖರೀದಿಸಲು ಮುಂದಾಗಿದ್ದು, ಶ್ರೀರಾಂ ಗ್ರೂಪ್‌ ಇದಕ್ಕೆ 100 ಕೋಟಿ ರೂ. ಹಣ ಮತ್ತು ನಿರಪೇಕ್ಷಣಾ ಪತ್ರದ ಬೇಡಿಕೆ ಮುಂದಿಟ್ಟಿದೆ.

“ಮುಂಬೈನ ಕಂಪನಿ ನಮ್ಮಿಂದ ಐಎನ್‌ಎಸ್‌ ವಿರಾಟ ಖರೀದಿಸಲು ಮುಂದೆ ಬಂದಿದೆ. ನಾನು ಇದನ್ನು ಹರಾಜಿನಲ್ಲಿ ಖರೀದಿಸಿದ್ದೆ. ಆದ ಕಾರಣ, ಅವರಿಗೆ ಕೇಂದ್ರ ಸರಕಾರದಿಂದ ನಿರಪೇಕ್ಷಣಾ ಪತ್ರ ಸಲ್ಲಿಸಲು ತಿಳಿಸಿದ್ದೇನೆ. ಮುಂದೆ ಯಾರೂ ಈ ಬಗ್ಗೆ ವಿವಾದ ಸೃಷ್ಟಿಸಬಾರದು ಎಂಬ ಕಾರಣಕ್ಕೆ ಹೀಗೆ ಹೇಳಿದ್ದೇನೆ’ ಎಂದು ಶ್ರೀರಾಂ ಗ್ರೂಪ್‌ ಮುಖ್ಯಸ್ಥ ಮುಖೇಶ್‌ ಪಟೇಲ್‌ ಸ್ಪಷ್ಟಪಡಿಸಿದ್ದಾರೆ.

ಹಣದ ಆಸೆಯಿಲ್ಲ: “ನಮ್ಮ ಸಂಸ್ಥೆಗೆ ಯಾವುದೇ ಹಣದ ಆಸೆಯಿಲ್ಲ. ನಾವೂ ದೇಶಭಕ್ತರು. ಪ್ರಸ್ತುತ ಈ ಹಡಗಿನ ಮೌಲ್ಯ 125 ಕೋಟಿ ರೂಪಾಯಿ. ಆದರೂ ನಾವು ಕನಿಷ್ಠ 100 ಕೋಟಿ ರೂ.ಗೆ ಬೇಡಿಕೆ ಇಟ್ಟಿದ್ದೇವೆ. ನಮ್ಮ ಖಾತೆಗೆ ಹಣ ಬಿದ್ದ ಕೂಡಲೇ ಅವರಿಗೆ ಹಸ್ತಾಂತರಿಸುತ್ತೇವೆ’ ಎಂದು ತಿಳಿಸಿದ್ದಾರೆ. ಐಎನ್‌ಎಸ್‌ ಅನ್ನು ಎನ್ವಿಟೆಕ್‌ ಮರೈನ್‌ ಕನ್ಸಲ್ಟಂಟ್ಸ್‌ ಪ್ರೈ.ಲಿ. ಸಂಸ್ಥೆ ಖರೀದಿಸಲು ಮುಂದಾಗಿದೆ. ಆರ್ಥಿಕ ಹಿತಾಸಕ್ತಿಯಿಲ್ಲದೆ, ವಿರಾಟ್‌ ಅನ್ನು ಮ್ಯೂಸಿಯಂ ಆಗಿಸುವ ಏಕೈಕ ಉದ್ದೇಶದಿಂದ ಖರೀದಿಸುತ್ತಿರುವುದಾಗಿ ಹೇಳಿಕೊಂಡಿದೆ.