ನನಗೆ ಸೋಂಕು ತಾಗಿದರೆ ಮಮತಾ ಬ್ಯಾನರ್ಜಿಯನ್ನು ತಬ್ಬಿಕೊಳ್ಳುವೆ ಎಂದ ಬಿಜೆಪಿ ನಾಯಕನಿಗೆ ಸೋಂಕು

Team Udayavani, Oct 2, 2020, 4:54 PM IST

ಕೋಲ್ಕತ್ತಾ: ಒಂದು ವೇಳೆ ನನಗೇನಾದರೂ ಕೋವಿಡ್-19 ಸೋಂಕು ತಾಗಿದರೆ ಮುಖ್ಯಮಂತ್ರಿ ಮಮತಾ ಬ್ಯಾನರ್ಜಿಯವನ್ನು ತಬ್ಬಿಕೊಳ್ಳುವೆ ಎಂದು ವಿವಾದಾತ್ಮಕ ಹೇಳಿಕೆ ನೀಡಿದ್ದ ಪಶ್ಚಿಮ ಬಂಗಾಳ ಬಿಜೆಪಿ ಮುಖಂಡನಿಗೆ ಈಗ ಕೋವಿಡ್-19 ಸೋಂಕು ದೃಢವಾಗಿದೆ!

ಬಿಜೆಪಿ ರಾಷ್ಟ್ರೀಯ ಕಾರ್ಯದರ್ಶಿ ಅನುಪಮ್ ಹಜ್ರಾ ಇತ್ತೀಚೆಗೆ ಈ ವಿವಾದಾತ್ಮಕ ಹೇಳಿಕೆ ನೀಡಿದ್ದರು. ಇದಾಗಿ ಕೆಲವೇ ದಿನಗಳಲ್ಲಿ ಅನುಪಮ್ ಹಜ್ರಾಗೆ ಸೋಂಕು ದೃಢವಾಗಿದೆ. ಈ ಬಗ್ಗೆ ಸ್ವತಃ ಅವರೇ ತಮ್ಮ ಫೇಸ್ ಬುಕ್ ಖಾತೆಯಲ್ಲಿ ಹೇಳಿಕೊಂಡಿದ್ದಾರೆ.

ಅನುಪಮ್ ಹಜ್ರಾ ಅವರಿಗೆ ಅನಾರೋಗ್ಯ ಕಂಡುಬಂದಿತ್ತು. ಹಾಗಾಗಿ ಅವರಿಗೆ ಕೋವಿಡ್ ಪರೀಕ್ಷೆ ಮಾಡಲಾಗಿದೆ. ಇದರಲ್ಲಿ ಕೋವಿಡ್ ಪಾಸಿಟಿವ್ ವರಿಯಾಗಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಸದ್ಯ ಅನುಪಮ್ ಹಜ್ರಾ ಖಾಸಗಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ.

ಇದನ್ನೂ ಓದಿ:Live streamನಲ್ಲೇ ಸೋಶಿಯಲ್ ಮೀಡಿಯಾ ಸ್ಟಾರ್ ಮೈಮೇಲೆ ಪೆಟ್ರೋಲ್ ಸುರಿದು ಹತ್ಯೆಗೈದ ಮಾಜಿ ಪತಿ

ಈ ಮೊದಲು ಟಿಎಂಸಿ ಸಂಸದರಾಗಿದ್ದ ಅನುಪಮ್ 2019ರ ಜನವರಿ ಬಿಜೆಪಿ ಸೇರಿದ್ದರು. ಒಂದು ವೇಳೆ ನನಗೆ ಕೋವಿಡ್ ಸೋಂಕು ತಾಗಿದರೆ ನಾನು ಮುಖ್ಯಮಂತ್ರಿ ಮಮತಾ ಬ್ಯಾನರ್ಜಿ ಬಳಿ ತೆರಳಿ ಅವರನ್ನು ತಬ್ಬಿಕೊಳ್ಳುತ್ತೇನೆ. ಆಗ ಅವರಿಗೆ ಸೋಂಕಿನಿಂದ ಕಷ್ಟಪಟ್ಟವರ ಸಂಕಷ್ಟ ಅರ್ಥವಾಗಬಹುದು ಎಂದಿದ್ದರು.