ಸತೀಶ್‌ ಮ್ಯಾಟ್ನಿ ಗೆ ರಚಿತಾ ನಾಯಕಿ ಮತ್ತೆ ಒಂದಾದ ಅಯೋಗ್ಯ ಜೋಡಿ

Team Udayavani, Oct 3, 2020, 12:13 PM IST

ನೀನಾಸಂ ಸತೀಶ್‌ ನಟನೆಯ “ಪೆಟ್ರೋಮ್ಯಾಕ್ಸ್‌’ ಚಿತ್ರಕ್ಕೆ ಮರುಜೀವ ಸಿಕ್ಕಿರುವ ವಿಚಾರ ನಿಮಗೆ ಗೊತ್ತೇ ಇದೆ. ಈಗ ಅವರ ಹೊಸ ಸಿನಿಮಾದ ಟೈಟಲ್‌ ಲಾಂಚ್‌ ಆಗಿದೆ. ಅದು “ಮ್ಯಾಟ್ನಿ’.

ಹೌದು, ಈ ಹಿಂದೆ ಸತೀಶ್‌ ಹೊಸ ಸಿನಿಮಾವೊಂದರಲ್ಲಿ ನಟಿಸಲಿದ್ದಾರೆಂಬ ಸುದ್ದಿಯೊಂದು ಕೇಳಿಬಂದಿತ್ತು. ಆದರೆ, ಈಗ ಆ ಚಿತ್ರಕ್ಕೆ ಟೈಟಲ್‌ “ಮ್ಯಾಟ್ನಿ’ ಎಂದು ಟೈಟಲ್‌ ಇಡಲಾಗಿದೆ. ಮನೋಹರ್‌ಕಾಂಪಳ್ಳಿ ಅವರ ನಿರ್ದೇಶನ, ಎಸ್‌ ಪಾರ್ವತಿ ಅವರ ನಿರ್ಮಾಣ ಈ ಚಿತ್ರಕ್ಕಿದೆ. ಇದೊಂದು ಥ್ರಿಲ್ಲರ್‌ ಜಾನರ್‌ಗೆ ಸೇರಿದ ಸಿನಿಮಾವಾಗಿದ್ದು, ನಿರ್ದೇಶಕರು ಹೇಳಿದ ಕಥೆ ಕೇಳಿದ ಕೂಡಲೇ ಸತೀಶ್‌, ಈ ಚಿತ್ರದಲ್ಲಿ ನಟಿಸಲು ಒಪ್ಪಿಕೊಂಡರಂತೆ. ಮ್ಯಾಟ್ನಿ ಚಿತ್ರಕ್ಕೆ ರಚಿತಾ ರಾಮ್‌ ಹೀರೋಯಿನ್‌ ಆಗಿ ಎಂಟ್ರಿಕೊಟ್ಟಿದ್ದಾರೆ. ಈ ಹಿಂದೆ “ಅಯೋಗ್ಯ’ ಚಿತ್ರದಲ್ಲಿ ಈ ಜೋಡಿ ಮೋಡಿ ಮಾಡಿತು.ಈಗ ಮತ್ತೂಮ್ಮೆ ಒಂದಾಗುತ್ತಿದೆ ಈ ಜೋಡಿ.

ಕೆಲವು ದಿನಗಳ ಹಿಂದಷ್ಟೇ ರಚಿತಾ ದಿನೇಶ್‌ ಬಾಬು ನಿರ್ದೇಶನದ “ಕಸ್ತೂರಿ ಮಹಲ್‌’ನಿಂದ ಹೊರಗಡೆ ಬಂದು ಸುದ್ದಿಯಾಗಿದ್ದರು. ಈಗ ನೇರವಾಗಿ “ಮ್ಯಾಟ್ನಿ’ ಶೋಗೆ ಬಂದಿದ್ದಾರೆ. ಚಿತ್ರಮಂದಿರ ತೆರೆಯುತ್ತಿರುವ ಬಗ್ಗೆಯೂ ಸತೀಶ್‌ ಖುಷಿಯಾಗಿದ್ದಾರೆ. ಈ ಬಗ್ಗೆ ಮಾತನಾಡುವ ಸತೀಶ್‌, ನಾನು ಕೂಡಾ ಚಿತ್ರಮಂದಿರಗಳಲ್ಲಿ ಸಿನಿಮಾ ನೋಡಲು ಕಾಯುತ್ತಿದ್ದೇನೆ. ಜಾತಿ, ಅಂತಸ್ತು, ಧರ್ಮವನ್ನು ಮೀರಿ ಎಲ್ಲರೂ ಒಟ್ಟಾಗಿ ಸೇರೋದು ಅದು ಚಿತ್ರಮಂದಿರದಲ್ಲಿ. ಆ ಚಿತ್ರಮಂದಿರಗಳು ಈಗ ಬಾಗಿಲನ್ನು ತೆರೆಯುತ್ತಿದ್ದು, ಖುಷಿಯ ವಿಚಾರ. ನಾನು ಚಿತ್ರಮಂದಿರ ತೆರೆದ ನಂತರ ರಿಲೀಸ್‌ ಆಗುವ ಮೊದಲ ಸಿನಿಮಾವನ್ನು ಎಲ್ಲರೊಂದಿಗೆ ಚಿತ್ರಮಂದಿರದಲ್ಲೇ ವೀಕ್ಷಿಸಲಿದ್ದೇನೆ’ ಎನ್ನುವ ಮೂಲಕ ಚಿತ್ರಮಂದಿರ ತೆರೆಯುತ್ತಿರುವ ಖುಷಿ ಹಂಚಿಕೊಂಡಿದ್ದಾರೆ.