ಭಾರತ-ಆಸೀಸ್‌ ಪಂದ್ಯಗಳಿಗೆ ಸಿಡ್ನಿ ಸಮ್ಮತಿ: ಆಸೀಸ್ ಗೆ ತೆರಳಲಿದೆ 32 ಸದಸ್ಯರ ಜಂಬೋ ತಂಡ

Team Udayavani, Oct 23, 2020, 8:33 AM IST

ಸಿಡ್ನಿ: ಪ್ರವಾಸಿ ಭಾರತ ಮತ್ತು ಆಸ್ಟ್ರೇಲಿಯ ನಡುವಿನ ವರ್ಷಾಂತ್ಯದ ಸೀಮಿತ ಓವರ್‌ಗಳ ಸರಣಿಗೆ ನ್ಯೂ ಸೌತ್‌ ವೇಲ್ಸ್‌ ಸರಕಾರ ಅನುಮತಿ ನೀಡಿದೆ. ಇದರಂತೆ ಇತ್ತಂಡಗಳ ನಡುವಿನ ಏಕದಿನ ಹಾಗೂ ಟಿ20 ಸರಣಿ ಸಿಡ್ನಿ ಮತ್ತು ಕ್ಯಾನ್‌ಬೆರಾದಲ್ಲಿ ನಡೆಯುವುದು ಖಾತ್ರಿಯಾಗಿದೆ.

ಇದೇ ವೇಳೆ ಐಪಿಎಲ್‌ ಮುಗಿಸಿ ಆಗಮಿಸಲಿರುವ ಭಾರತ ಮತ್ತು ಆಸ್ಟ್ರೇಲಿಯ ತಂಡದ ಆಟಗಾರರು ಸಿಡ್ನಿಯಲ್ಲೇ ಕ್ವಾರಂಟೈನ್‌ ನಲ್ಲಿ ಇರಬೇಕಾಗುತ್ತದೆ. ಯುಎಇಯಿಂದ ನೇರವಾಗಿ ಬ್ರಿಸ್ಬೇನ್‌ಗೆ ಆಗಮಿಸಿ, 72 ಗಂಟೆಗಳ ಬಳಿಕ ಸಿಡ್ನಿಗೆ ಬರುವಂತೆ ಇವರಿಗೆ ಸೂಚಿಸಲಾಗಿತ್ತು. ಆದರೆ ಇದರಲ್ಲೀಗ ಬದಲಾವಣೆ ಮಾಡಲಾಗಿದ್ದು, ಕ್ರಿಕೆಟಿಗರೆಲ್ಲ ನೇರವಾಗಿ ಸಿಡ್ನಿಗೆ ಆಗಮಿಸಲಿದ್ದಾರೆ. ಐಪಿಎಲ್‌ ಆಡದ ಚೇತೇಶ್ವರ್‌ ಪೂಜಾರ, ಹನುಮ ವಿಹಾರಿ ಮೊದಲಾದ ಕ್ರಿಕೆಟಿಗರು ನೇರವಾಗಿ ಯುಎಇಗೆ ಹೋಗಿ, ಅಲ್ಲಿಯೇ ಕ್ವಾರಂಟೈನ್‌ ಪೂರೈಸಿ ತಂಡವನ್ನು ಕೂಡಿಕೊಳ್ಳಲಿದ್ದಾರೆ.

ಪಿಂಕ್‌ ಬಾಲ್‌ ಟೆಸ್ಟ್‌

ಸರಣಿಯ ಮೊದಲ ಟೆಸ್ಟ್‌ “ಅಡಿಲೇಡ್‌ ಓವಲ್‌’ನಲ್ಲಿ ನಡೆಯಲಿದ್ದು (ಡಿ. 17-21), ಇದು ಹಗಲು-ರಾತ್ರಿ ಸಾಗುವ ಪಿಂಕ್‌ ಬಾಲ್‌ ಪಂದ್ಯವಾಗಿರಲಿದೆ. ಅನಂತರದ ಬಾಕ್ಸಿಂಗ್‌ ಡೇ ಟೆಸ್ಟ್‌ (ಡಿ. 26-30) ಆತಿಥ್ಯ ಕೂಡ ಅಡಿಲೇಡ್‌ ಪಾಲಾಗಿದೆ. ಸಂಪ್ರದಾಯದಂತೆ ಇದು ಮೆಲ್ಬರ್ನ್ನಲಿ ನಡೆಯಬೇಕಿತ್ತು. ಆದರೆ ಅಲ್ಲಿ ಕೋವಿಡ್‌-19 ಪ್ರಕರಣ ಜಾಸ್ತಿ ಇರುವುದರಿಂದ ಎಂಸಿಜಿಗೆ ಈ ಅವಕಾಶ ತಪ್ಪಿದೆ. ಉಳಿದೆರಡು ಟೆಸ್ಟ್‌ ಪಂದ್ಯಗಳು ಸಿಡ್ನಿ ಮತ್ತು ಬ್ರಿಸ್ಬೇನ್‌ನಲ್ಲಿ ನಡೆಯಲಿದೆ.

ಇದನ್ನೂ ಓದಿ:IPL 2020: ಪಾಂಡೆ-ಶಂಕರ್‌ ಅಬ್ಬರ; ಹೈದರಾಬಾದ್‌ಗೆ 8 ವಿಕೆಟ್‌ ಜಯ

32 ಸದಸ್ಯರ ಜಂಬೋ ತಂಡ

ಈ ಸರಣಿಗಾಗಿ ಭಾರತ 32 ಆಟಗಾರರ ಬೃಹತ್‌ ತಂಡವೊಂದನ್ನು ಪ್ರಕಟಿಸುವ ಸಾಧ್ಯತೆ ಇದೆ. ಕೋವಿಡ್ ಮುನ್ನೆಚ್ಚರಿಕೆಯ ಕಾರಣ ತಂಡದಲ್ಲಿ ಆಗಾಗ ಬದಲಾವಣೆ ಮಾಡಿಕೊಳ್ಳಲು ಅಸಾಧ್ಯವಾಗಿರುವುದರಿಂದ ಒಮ್ಮೆಲೇ ಅಧಿಕ ಸಂಖ್ಯೆಯ ಆಟಗಾರರನ್ನು ಆರಿಸುವುದು ಬಿಸಿಸಿಐ ಯೋಜನೆ. ಈ ವಾರಾಂತ್ಯದೊಳಗೆ ತಂಡ ಪ್ರಕಟಗೊಳ್ಳುವ ನಿರೀಕ್ಷೆ ಇದೆ.

ನ. 27ರಿಂದ ಸರಣಿ ಆರಂಭ

ಭಾರತ ಏಕದಿನ ಸರಣಿಯೊಂದಿಗೆ ಆಸ್ಟ್ರೇಲಿಯ ಪ್ರವಾಸವನ್ನು ಆರಂಭಿಸಲಿದೆ. ಮೊದಲೆರಡು ಪಂದ್ಯಗಳನ್ನು ನ. 27 ಮತ್ತು 29ರಂದು “ಸಿಡ್ನಿ ಕ್ರಿಕೆಟ್‌ ಗ್ರೌಂಡ್‌’ನಲ್ಲಿ ಆಡಲಾಗುವುದು. ಕ್ಯಾನ್‌ಬೆರಾದಲ್ಲಿ ಅಂತಿಮ ಏಕದಿನ (ಡಿ.1) ಮತ್ತು ಮೊದಲ ಟಿ20 ಪಂದ್ಯ (ಡಿ. 4) ನಡೆಯಲಿದೆ. ಬಳಿಕ ಎರಡೂ ತಂಡಗಳು ಸಿಡ್ನಿಗೆ ವಾಪಸಾಗಿ ಉಳಿದೆರಡು ಟಿ20 ಪಂದ್ಯಗಳಲ್ಲಿ ಪಾಲ್ಗೊಳ್ಳಲಿವೆ (ಡಿ. 6 ಮತ್ತು ಡಿ. 8)