ಹದಗೆಟ್ಟ ರಸ್ತೆಯಿಂದ ನರಕ ದರ್ಶನ : ಸ್ವಲ್ಪ ಆಯ ತಪ್ಪಿದರೂ ಅಪಘಾತ

Team Udayavani, Nov 10, 2020, 1:14 PM IST

ನರೇಗಲ್ಲ: ಇತ್ತೀಚೆಗೆ ಸುರಿದ ಮಳೆಯಿಂದ ಹೋಬಳಿ ವ್ಯಾಪ್ತಿಯ ಪ್ರತಿಯೊಂದು ಊರು, ಪಟ್ಟಣಕ್ಕೆ ತೆರಳುವ ರಸ್ತೆಗಳು ಹದಗೆಟ್ಟಿದ್ದು, ವಾಹನ ಸವಾರರಿಗೆ ನಿತ್ಯ ನರಕವಾಗಿ ಪರಿಣಮಿಸುತ್ತಿದ್ದು, ಅಪಾಯಕ್ಕೆ ಆಹ್ವಾನ ನೀಡುತ್ತಿವೆ.

ಅಬ್ಬಿಗೇರಿ-ಡ.ಸ ಹಡಗಲಿ 10 ಕಿ.ಮೀ, ಜಕ್ಕಲಿ- ಬೂದಿಹಾಳ 1 ಕಿ.ಮೀ, ಬೂದಿಹಾಳ-ಮಾರನಬಸರಿ 1.5 ಕಿ.ಮೀ, ನರೇಗಲ್ಲ-ಗಜೇಂದ್ರಗಡ 16 ಕಿ.ಮೀ, ಕೋಟಮಚಗಿ-ರೋಣ 43 ಕಿ.ಮೀ, ಮಾರನಬಸರಿ-ಹಾಲಕೆರೆ 22 ಕಿ.ಮೀ, ಅಬ್ಬಿಗೇರಿ-ಯರೇಬೇಲೇರಿ 8 ಕಿ.ಮೀ ಹಾಗೂ ಮಧ್ಯದಲ್ಲಿರುವ ಸೇತುವೆ, ಅಬ್ಬಿಗೇರಿ- ಜಕ್ಕಲಿ 5 ಕಿ.ಮೀ, ನರೇಗಲ್ಲ-ಜಕ್ಕಲಿ 16 ಕಿ.ಮೀ, ನಿಡಗುಂದಿ-ಕಳಕಾಪುರ 6 ಕಿ.ಮೀ, ನರೇಗಲ್ಲ- ದ್ಯಾಂಪುರ 8 ಕಿ.ಮೀ, ಅಬ್ಬಿಗೇರಿ- ನಾಗರಾಳ 6 ಕಿ.ಮೀ, ಹಾಲಕೆರೆ ಕ್ರಾಸ್‌ದಿಂದ- ಹಾಲಕೆರೆ ವರೆಗೂ ಸುಮಾರು 8 ಕಿ.ಮೀ ರಸ್ತೆಗಳಲ್ಲಿ ಗುಂಡಿಗಳ ದರ್ಬಾರು ಹೆಚ್ಚಾಗಿದೆ.

ಈ ಗುಂಡಿಗಳಲ್ಲಿ ಈಗಾಗಲೇ ಸಾಕಷ್ಟು ಅಪಘಾತಗಳು ಸಂಭವಿಸಿವೆ. ರಸ್ತೆಗಳಲ್ಲಿ ದೊಡ್ಡ ದೊಡ್ಡ ಗುಂಡಿಗಳು ಬಿದ್ದ, ಕಿತ್ತು ಹೋಗಿದ್ದು, ಒಂದು ಬುಟ್ಟಿ ಗರಸು ಕೂಡ ಹಾಕಿಲ್ಲ. ನಿತ್ಯ ಸಂಚರಿಸುವ ವಾಹನ ಸವಾರರು ಜನಪ್ರತಿನಿಧಿಗಳು- ಅಧಿಕಾರಿಗಳಿಗೆ ಹಿಡಿ ಶಾಪ ಹಾಕುತ್ತಿದ್ದಾರೆ.

ಇದನ್ನೂ ಓದಿ:ಕೂಡಲೇ ಸಿದ್ದರಾಮಯ್ಯ ರಾಜ್ಯದ ಜನರ ಕ್ಷಮೆ ಯಾಚಿಸಬೇಕು: ಕೆಎಸ್ ಈಶ್ವರಪ್ಪ ಆಗ್ರಹ

ಜನಪ್ರತಿನಿಧಿಗಳು- ಅಧಿಕಾರಿಗಳ ಬೇಜವಾಬ್ದಾರಿ:
ಮಳೆಯಿಂದ ಹದಗೆಟ್ಟಿರುವ ಎಲ್ಲ ರಸ್ತೆ ದುರಸ್ತಿಗೊಳಿಸಲು ಸಂಬಂಧಪಟ್ಟ ಅಧಿಕಾರಿಗಳು ಬೇಜವಾಬ್ದಾರಿಯಿಂದ ವರ್ತಿಸುತ್ತಿದ್ದಾರೆ. ಸಾರ್ವಜನಿಕರು, ರೈತರು ಹಲವು ಬಾರಿ ಮನವಿ, ಪ್ರತಿಭಟನೆ ಕೈಗೊಂಡರೂ ಅಧಿಕಾರಿಗಳು ಮಾತ್ರ
ಮೌನ ವಹಿಸುತ್ತಿದ್ದಾರೆ.

ರಸ್ತೆ ಅಭಿವೃದ್ಧಿಗೆ ಕೊರೊನಾ ನೆಪ: ಹದಗೆಟ್ಟ ರಸ್ತೆ ಸುಧಾರಣೆ ಮಾಡಿ ಎಂದು ಸಾರ್ವಜನಿಕರು ಜನಪ್ರತಿನಿಧಿಗಳು- ಅಧಿಕಾರಿಗಳ ಹತ್ತಿರ ಹೇಳಿದರೆ ಕೊರೊನಾ ವೈರಸ್‌ನಿಂದ ರಾಜ್ಯದ ಆರ್ಥಿಕ ಪರಿಸ್ಥಿತಿ ಕುಂಠಿತವಾಗಿದೆ. ರಸ್ತೆ ಅಭಿವೃದ್ಧಿಗೆ ಸರ್ಕಾರದಲ್ಲಿ ಹಣ ಇಲ್ಲ ಎಂದು ಹೇಳುತ್ತ ಅಧಿಕಾರಿಗಳು ಜಜಾರಿಕೊಳ್ಳುತ್ತಿದ್ದಾರೆ.

ಪ್ರತಿ ವರ್ಷ ರಸ್ತೆ ಅಭಿವೃದ್ಧಿ ನೆಪದಲ್ಲಿ ಕೋಟಿ- ಕೋಟಿ ಹಣ ಬಿಡುಗಡೆಯಾಗಿ ರಸ್ತೆಗಳು ಸಿಸಿ ಮತ್ತು ಡಾಂಬರ್‌ ಕಂಡರೂ ರಸ್ತೆಯ
ಗುಣಮಟ್ಟದಲ್ಲಿ ಇನ್ನೂ ಸುಧಾರಣೆ ಕಂಡಿಲ್ಲ. ರಸ್ತೆ ಅಭಿವೃದ್ಧಿ ಕೆಲಸ ಗುತ್ತಿಗೆ ಪಡೆದ ಗುತ್ತಿಗೆದಾರರು ಲಾಭಕ್ಕಾಗಿ ಬೇಕಾಬಿಟ್ಟಿಯಾಗಿ ರಸ್ತೆ ಮಾಡಿ ಕೈತೊಳೆದುಕೊಳ್ಳುತ್ತಿದ್ದಾರೆ. ಪ್ರತಿಯೊಂದು ರಸ್ತೆಯುದ್ದಕ್ಕೂ ತಗ್ಗು-ದಿನ್ನೆಗಳು ಬಿದ್ದಿವೆ. ರಸ್ತೆಗಳ
ಮಧ್ಯ ಭಾಗ ಸಂಪೂರ್ಣ ಹಾಳಾಗಿದ್ದು, ಗುಂಡಿ ಬಿದ್ದಿದೆ. ಕಿತ್ತುಹೋದ ಸೇತುವೆಗಳು ಪಟ್ಟಣದಿಂದ ಗ್ರಾಮಕ್ಕೆ ಸಂಪರ್ಕ ಕಲ್ಪಿಸುವ ರಸ್ತೆಗಳು ಸಂಪೂರ್ಣ ಹದಗೆಟ್ಟಿವೆ. ಕೆಲ ರಸ್ತೆ ಎರಡು ಬದಿಯಲ್ಲೂ ಜಾಲಿಗಿಡಗಳು ಬೆಳೆದು ನಿಂತಿವೆ.

ಸಂಬಂಧಿಸಿದ ಜನಪ್ರತಿನಿಧಿಗಳು- ಅಧಿಕಾರಿಗಳು ಈ ಬಗ್ಗೆ ಕಿಂಚಿತ್ತೂ ಗಮನ ಹರಿಸುತ್ತಿಲ್ಲ ಎನ್ನುತ್ತಾರೆ ಸಾರ್ವಜನಿಕರು.

ಇದನ್ನೂ ಓದಿ:ಬೆಂಗಳೂರು: ಹೊಸಗುಡ್ಡದಹಳ್ಳಿಯ ಕೆಮಿಕಲ್ ಫ್ಯಾಕ್ಟರಿಯಲ್ಲಿ ಭಾರಿ ಅಗ್ನಿ ಅವಘಡ

ರಸ್ತೆ ದುರಸ್ತಿಗೆ ಒತ್ತಾಯ
ರೋಣ- ಗಜೇಂದ್ರಗಡ ತಾಲೂಕಿನಿಂದ ನರೇಗಲ್ಲ ಹೋಬಳಿ ಸುತ್ತಲಿನ ಗ್ರಾಮಗಳಿಗೆ ಸಂಪರ್ಕ ಕಲ್ಪಿಸುವ ರಸ್ತೆಗಳು ಹದಗೆಟ್ಟಿವೆ. ಹಿಂಗಾರು ಹಂಗಾಮಿನ ಕೃಷಿ ಚುಟುವಟಿಕೆಗಳು ಭರದಿಂದ ಸಾಗಿದ್ದು, ರಸ್ತೆಯಲ್ಲಿ ಸಂಚರಿಸುವುದು ಕಷ್ಟಸಾಧ್ಯವಾಗಿದೆ. ಕೂಡಲೇ
ಸಂಬಂಧಪಟ್ಟ ಅ ಧಿಕಾರಿಗಳು ರಸ್ತೆ ದುರಸ್ತಿ ಕಾರ್ಯ ಕೈಗೊಳ್ಳುವಂತೆ ಅಬ್ಬಿಗೇರಿ ಗ್ರಾಮದ ರೈತ ಮಲ್ಲಪ್ಪ ಬಿಲ್ಲ, ಮಲ್ಲಪ್ಪ ಹೊಂಬಳಿ, ಅಶೋಕ ಬಸವರಡ್ಡೇರ ಒತ್ತಾಯಿಸಿದ್ದಾರೆ.

– ಸಿಕಂದರ ಎಂ. ಆರಿ