ವೀಕೆಂಡ್‌ ಮಜಾ ಮೂಡ್‌ನ‌ಲ್ಲಿ ಅಖಿಲಾ

Team Udayavani, Nov 13, 2020, 2:13 PM IST

ಸಸ್ಪೆನ್ಸ್‌ – ಥ್ರಿಲ್ಲರ್‌ ಕಥಾ ಹಂದರ ಹೊಂದಿದ್ದ”ರತ್ನಮಂಜರಿ’ ಚಿತ್ರದ ಮೂಲಕ ಸ್ಯಾಂಡಲ್‌ ವುಡ್‌ ಸಿನಿಪ್ರಿಯರ ಗಮನ ಸೆಳೆದಿದ್ದ ನಟಿ ಅಖಿಲಾ ಪ್ರಕಾಶ್‌, ಈಗ ಮತ್ತೂಂದು ಸಸ್ಪೆನ್ಸ್‌ – ಥ್ರಿಲ್ಲರ್‌ ಚಿತ್ರದ ಮೂಲಕ ಪ್ರೇಕ್ಷಕರ ಮುಂದೆ ಬರಲು ತಯಾರಿ ನಡೆಸುತ್ತಿದ್ದಾರೆ. ಅಂದಹಾಗೆ, ಅಖಿಲಾ ಪ್ರಕಾಶ್‌ ಅಭಿನಯಿಸುತ್ತಿರುವ ಹೊಸ ಚಿತ್ರಕ್ಕೆ “ವೀಕೆಂಡ್‌ ಮಜಾ’ ಎಂದು ಹೆಸರಿಡಲಾಗಿದ್ದು, ಇತ್ತೀಚೆಗೆ ಈ ಚಿತ್ರದ ಟೈಟಲ್‌ ಮತ್ತು ಫ‌ಸ್ಟ್‌ಲುಕ್‌ ಪೋಸ್ಟರ್‌ ಹೊರಬಂದಿದೆ.

ಇನ್ನು “ವೀಕೆಂಡ್‌ ಮಜಾ’ ಚಿತ್ರದ ಬಗ್ಗೆ ಮಾತನಾಡುವ ಅಖಿಲಾ, “ಇದೊಂದು ಪಕ್ಕಾ ಇಂದಿನ ಜನರೇಶನ್‌ ಹುಡುಗರ ಲೈಫ್ಟ್ ಸ್ಟೈಲ್‌ ಮತ್ತು ಮಾನಸಿಕತೆ ತೋರಿಸುವಂಥ ಸಿನಿಮಾ. ರೆಸಾರ್ಟ್‌ ಒಂದರಲ್ಲಿ ವೀಕೆಂಡ್‌ನ‌ಲ್ಲಿ ಮೂರು ದಿನದಲ್ಲಿ ನಡೆಯುವ ಘಟನೆಗಳ ಸುತ್ತ ಇಡೀ ಸಿನಿಮಾ ಸಾಗುತ್ತದೆ. ಮಹಿಳಾಕೇಂದ್ರಿತ ಕಥೆಯಾಗಿದ್ದು, ನಾಲ್ವರು ಹುಡುಗ – ಹುಡುಗಿಯರ ಮೇಲೆಕಥೆ ನಡೆಯುತ್ತದೆ. ಸಸ್ಪೆನ್ಸ್‌- ಥ್ರಿಲ್ಲರ್‌, ಹಾರರ್‌ ಹೀಗೆ ಎಲ್ಲ ಎಲಿಮೆಂಟ್ಸ್‌ ಸಿನಿಮಾದಲ್ಲಿದೆ. ಆಡಿಯನ್ಸ್‌ಗೆ ಕಂಪ್ಲೀಟ್‌ ಎಂಟರ್‌ಟೈನ್ಮೆಂಟ್‌ ಇದರಲ್ಲಿ ಸಿಗಲಿದೆ’ ಎನ್ನುತ್ತಾರೆ.

ಇನ್ನು ಹಿಂದಿನ ಚಿತ್ರಕ್ಕಿಂತಲೂ ತುಂಬ ಬೋಲ್ಡ್‌ ಲುಕ್‌ನಲ್ಲಿ ಅಖಿಲಾ ಈ ಚಿತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರಂತೆ. “ಇದರಲ್ಲಿ ನಾನು ತುಂಬಾ ಫ್ಯಾಷನೆಬಲ್‌ ಮತ್ತು ಬೋಲ್ಡ್‌ ಹುಡುಗಿಯ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದೇನೆ. ಇಂದಿನಜನರೇಶನ್‌ ಪ್ರತಿನಿಧಿಸುವ ಮಾಡುವಂಥಕ್ಯಾರೆಕ್ಟರ್‌ ನನ್ನದು. ಹಿಂದೆಂದೂ ಈ ಥರದ ಪಾತ್ರದಲ್ಲಿ ಕಾಣಿಸಿಕೊಂಡಿರಲಿಲ್ಲ. ಮೊದಲ ಬಾರಿಗೆ ಈ ಥರದ ಪಾತ್ರ ಮಾಡುತ್ತಿದ್ದು, ಪಾತ್ರದ ಮೇಲೆ ನನಗೂ ಸಾಕಷ್ಟು ನಿರೀಕ್ಷೆ ಇದೆ’ ಎನ್ನುತ್ತಾರೆ. “ವೀಕೆಂಡ್‌ ಮಜಾ’ ಚಿತ್ರದಲ್ಲಿ ಅಖಿಲಾ ಪ್ರಕಾಶ್‌ ಅವರೊಂದಿಗೆ, ನಟ ಡ್ಯಾನಿ ಕುಟ್ಟಪ್ಪ ಮತ್ತೂಂದು ಪ್ರಮುಖ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಾರಂತೆ. ಉಳಿದಂತೆ ಬಹುತೇಕ ಹೊಸ ಪ್ರತಿಭೆಗಳು ಚಿತ್ರದ ಇತರ ಪ್ರಮುಖ ಪಾತ್ರಗಳಲ್ಲಿ ಅಭಿನಯಿಸುತ್ತಿದ್ದಾರೆ. ಕನ್ನಡ, ತಮಿಳು, ತೆಲುಗು ಮತ್ತು ಹಿಂದಿ ಭಾಷೆಗಳಲ್ಲಿ ಈ ಚಿತ್ರ ತೆರೆಗೆ ಬರುತ್ತಿದೆ.

ಸದ್ಯ “ವೀಕೆಂಡ್‌ ಮಜಾ’ ಚಿತ್ರದ ಪ್ರೀ- ಪ್ರೊಡಕ್ಷನ್‌ ಕೆಲಸಗಳು ಭರದಿಂದ ನಡೆಯುತ್ತಿದ್ದು, ಈಗಾಗಲೇ ಚಿತ್ರತಂಡ ಸ್ಕ್ರೀಪ್ಟ್ ಮತ್ತು ಎರಡು ಹಾಡುಗಳ ರೆಕಾರ್ಡಿಂಗ್‌ಕೆಲಸಗಳನ್ನು ಪೂರ್ಣಗೊಳಿಸಿದೆ. ಮುಂಬರುವ ಜನವರಿ ಮೊದಲ ವಾರದಿಂದ “ವೀಕೆಂಡ್‌ ಮಜಾ’ ಶೂಟಿಂಗ್‌ ಪ್ರಾರಂಭವಾಗಲಿದ್ದು, ಮಾರ್ಚ್‌ ವೇಳೆಗೆ ಈ ಚಿತ್ರ ತೆರೆಗೆ ಬರುವ ಸಾಧ್ಯತೆ ಇದೆ. “ಮಿಲೇನಿಯಮ್‌ ಆ್ಯಡ್‌ ಮೀಡಿಯಾ’ ಬ್ಯಾನರ್‌ ನಲ್ಲಿ ವ್ಯಾಲರೀನಾ ಮರೀಯಾ ರೋಜಸ್‌ ನಿರ್ಮಿಸುತ್ತಿರುವ ಚಿತ್ರಕ್ಕೆ ಡಾ. ನೆಲ್ಸನ್‌ ರೋಜಸ್‌, ರಮೇಶ್‌ಕೃಷ್ಣ ಜಂಟಿ ಯಾಗಿ ನಿರ್ದೇಶನ ಮಾಡುತ್ತಿದ್ದಾರೆ.