ಇನ್ನೂ ಬಗೆಹರಿದಿಲ್ಲ ದ.ಆಫ್ರಿಕಾ- ಇಂಗ್ಲೆಂಡ್‌ ಕ್ರಿಕೆಟ್‌ ಸರಣಿ ಗೊಂದಲ

Team Udayavani, Nov 15, 2020, 2:30 PM IST

ಜೊಹಾನ್ಸ್‌ಬರ್ಗ್‌: ದಕ್ಷಿಣ ಆಫ್ರಿಕಾ ಕ್ರಿಕೆಟ್‌ ಮಂಡಳಿಯಲ್ಲಿ ಉದ್ಭವಿಸಿರುವ ಆಂತರಿಕ ಬಿಕ್ಕಟ್ಟು ಇನ್ನೂ ಹೊಗೆ ಆಡುತ್ತಲೇ ಇರುವುದರಿಂದ ಮುಂಬರುವ ಪ್ರವಾಸಿ ಇಂಗ್ಲೆಂಡ್‌ ಎದುರಿನ ಸೀಮಿತ ಓವರ್‌ಗ ಸರಣಿ ತೂಗುಯ್ನಾಲೆಗೆ ಸಿಲುಕಿದೆ.

ಈ ಸರಣಿ ನಡೆಯುವ ಬಗ್ಗೆ ಯಾವುದೇ ಖಚಿತ ಮಾಹಿತಿ ದೊರೆತಿಲ್ಲ. ಆದರೆ ಐಸಿಸಿ ಹಾಗೂ ದಕ್ಷಿಣ ಆಫ್ರಿಕಾ ಕಡೆಯಿಂದ ಈ ಸರಣಿಗೆ ಸಂಬಂಧಿಸಿದಂತೆ ಯಾವುದೇ ಅಧಿಕೃತ ಮಾಹಿತಿ ಬಂದಿಲ್ಲ. ಹೀಗಾಗಿ ಇಂಗ್ಲೆಂಡ್‌ ಸೋಮವಾರ ಬಾಡಿಗೆ ವಿಮಾನವೊಂದರಲ್ಲಿ ಕೇಪ್‌ಟೌನ್‌ಗೆ ಪ್ರಯಾಣ ಬೆಳೆಸಲಿದೆ.

ಭಾರೀ ಪ್ರಮಾಣದ ನಷ್ಟ

ಒಂದು ವೇಳೆ “ಸೌತ್‌ ಆಫ್ರಿಕಾಸ್‌ ಮೆಂಬರ್ ಕೌನ್ಸಿಲ್‌’ ಮಧ್ಯಂತರ ಕ್ರಿಕೆಟ್‌ ಮಂಡಳಿಗೆ ಅಂಗೀಕಾರ ನೀಡದೇ ಹೋದರೆ ಈ ಸರಣಿ ನಡೆಯುವ ಸಾಧ್ಯತೆ ಇಲ್ಲ. ಆಗ ದಕ್ಷಿಣ ಆಫ್ರಿಕಾ ಕ್ರಿಕೆಟ್‌ ಮಂಡಳಿಗೆ ಭಾರೀ ಪ್ರಮಾಣದ ನಷ್ಟ ಸಂಭವಿಸಲಿದೆ.

“ಮಂಡಳಿ ರಾಜಕೀಯದಿಂದ ಈಗಾಗಲೇ ಪ್ರಮುಖ ಪ್ರಾಯೋಜಕರು ದಕ್ಷಿಣ ಆಫ್ರಿಕಾ ಕ್ರಿಕೆಟ್‌ ನಂಟನ್ನು ಮುರಿದುಕೊಂಡಿದ್ದಾರೆ. ಟಿವಿ ಪ್ರಸಾರದಿಂದ ಬರಬೇಕಾದ ಸುಮಾರು 4.2 ಮಿ. ಡಾಲರ್‌ ಮೊತ್ತ ಕೈತಪ್ಪಲಿದೆ.

ನವೆಂಬರ್ 27ರಿಂದ ದ.ಆಫ್ರಿಕಾ- ಇಂಗ್ಲೆಂಡ್ ಸರಣಿ ನಡೆಯಲಿದ್ದು, ಮೂರು ಏಕದಿನ ಮತ್ತು ಮೂರು ಟಿ20 ಪಂದ್ಯಗಳು ನಡೆಯಲಿದೆ. ದಕ್ಷಿಣ ಆಫ್ರಿಕಾ ತನ್ನ ಕೊನೆಯ ಅಂತಾರಾಷ್ಟ್ರೀಯ ಸರಣಿಯನ್ನು ಮಾರ್ಚ್‌ನಲ್ಲಿ ಆಸ್ಟ್ರೇಲಿಯ ವಿರುದ್ಧ ಆಡಿತ್ತು. ಅನಂತರ ಭಾರತಕ್ಕೆ ಆಗಮಿಸಿತು. ಆದರೆ ಕೋವಿಡ್‌-19 ಕಾರಣ ಈ ಸರಣಿಯನ್ನು ಮುಂದೂಡಲಾಯಿತು.