ಅತೀ ಎತ್ತರದ ಹನುಮನ ಪ್ರತಿಮೆ; ಹನುಮದ್‌ ಜನ್ಮಭೂಮಿ ತೀರ್ಥ ಕ್ಷೇತ್ರ ಟ್ರಸ್ಟ್‌ನಿಂದ ಮಾಹಿತಿ

Team Udayavani, Nov 18, 2020, 6:11 AM IST

ಸಾಂದರ್ಭಿಕ ಚಿತ್ರ

ಅಯೋಧ್ಯೆ: ಕಿಷ್ಕಿಂಧೆ ಎಂದೇ ಖ್ಯಾತಿವೆತ್ತಿರುವ ಕರ್ನಾಟಕದ ಹಂಪಿಯಲ್ಲಿ ಜಗತ್ತಿನ ಅತೀ ಎತ್ತರದ ಹನುಮನ ಪ್ರತಿಮೆಯನ್ನು ನಿರ್ಮಾಣ ಮಾಡಲಾಗುವುದು ಎಂದು ಹಂಪಿಯ ಹನುಮದ್‌ ಜನ್ಮಭೂಮಿ ತೀರ್ಥ ಕ್ಷೇತ್ರ ಟ್ರಸ್ಟ್‌ನ ಅಧ್ಯಕ್ಷ ಸ್ವಾಮಿ ಗೋವಿಂದ್‌ ಆನಂದ್‌ ಸರಸ್ವತಿ ತಿಳಿಸಿದ್ದಾರೆ.

ಅಯೋಧ್ಯೆಯ ರಾಮ ದೇಗುಲದ ಪ್ರಮುಖ ಪೂಜಾರಿ ಆಚಾರ್ಯ ಸತ್ಯೇಂದ್ರ ದಾಸ್‌ ಅವರನ್ನು ಭೇಟಿ ಮಾಡಿದ ಅನಂತರ ಮಾತನಾಡಿದ ಆನಂದ್‌ ಸರಸ್ವತಿ ಅವರು, ಈ ಮಾಹಿತಿ ಬಹಿರಂಗಪಡಿಸಿದ್ದಾರೆ. ಪ್ರತಿಮೆಯು 215 ಮೀಟರ್‌ ಎತ್ತರವಿರಲಿದ್ದು, ಇದಕ್ಕಾಗಿ ದೇಶದ್ಯಾಂತ ರಥಯಾತ್ರೆ ಮಾಡಿ ಹಣ ಸಂಗ್ರಹಿಸಲಾಗುವುದು ಎಂದರು. ಈ ಪ್ರತಿಮೆಗಾಗಿ ಸುಮಾರು 1,200 ಕೋಟಿ ರೂ. ವೆಚ್ಚವಾಗಲಿದೆ ಎಂದೂ ತಿಳಿಸಿದರು.

ಅಯೋಧ್ಯೆಯಲ್ಲಿ 221 ಮೀಟರ್‌ ಎತ್ತರದ ರಾಮನ ಪ್ರತಿಮೆಯನ್ನು ನಿರ್ಮಾಣ ಮಾಡಲಾಗುತ್ತಿದೆ. ಹೀಗಾಗಿ ರಾಮ ಭಕ್ತ ಹನುಮಂತನ ಪ್ರತಿಮೆಯನ್ನು ಅದಕ್ಕಿಂತ ಕಡಿಮೆ ಎತ್ತರದ ಪ್ರತಿಮೆಯನ್ನು ನಿರ್ಮಾಣ ಮಾಡಲಾಗುವುದು ಎಂದು ಆನಂದ್‌ ಸರಸ್ವತಿ ಅವರು ತಿಳಿಸಿದರು.

80 ಅಡಿ ಎತ್ತರದ ರಥ
ಅಯೋಧ್ಯೆಯ ರಾಮ ದೇಗುಲಕ್ಕಾಗಿ ಹಂಪಿಯ ಹನುಮದ್‌ ಜನ್ಮಭೂಮಿ ತೀರ್ಥ ಕ್ಷೇತ್ರ ಟ್ರಸ್ಟ್‌ ವತಿಯಿಂದ 80 ಅಡಿ ಎತ್ತರದ ರಥವೊಂದನ್ನು ಕೊಡುಗೆಯಾಗಿ ನೀಡಲಾಗುವುದು ಎಂದು ಆನಂದ್‌ ಸರಸ್ವತಿ ಘೋಷಿಸಿದ್ದಾರೆ. ಇದನ್ನು 2 ವರ್ಷದ ಒಳಗಾಗಿ 2 ಕೋಟಿ ರೂ. ವೆಚ್ಚದಲ್ಲಿ ನಿರ್ಮಾಣ ಮಾಡಲಾಗುವುದು ಎಂದು ಆನಂದ್‌ ಸರಸ್ವತಿ ತಿಳಿಸಿದರು.