2022ರ ಕಾಮನ್ವೆಲ್ತ್‌ ಗೇಮ್ಸ್‌ನಲ್ಲಿ ಮಹಿಳಾ ಟಿ20 ಕ್ರಿಕೆಟ್‌; ಖಚಿತಪಡಿಸಿದ ICC

Team Udayavani, Nov 18, 2020, 9:09 PM IST

ಸಾಂದರ್ಭಿಕ ಚಿತ್ರ

ನವದೆಹಲಿ: 2022ರ ಕಾಮನ್ವೆಲ್ತ್‌ ಕ್ರೀಡಾಕೂಟದಲ್ಲಿ ಮಹಿಳಾ ಟಿ20 ಕ್ರೀಡಾಕೂಟವೂ ಸೇರ್ಪಡೆಯಾಗಲಿದೆ ಎಂದು ಅಂತಾರಾಷ್ಟ್ರೀಯ ಕ್ರಿಕೆಟ್‌ ಮಂಡಳಿ ಖಚಿತಪಡಿಸಿದೆ. ಬುಧವಾರ ಕಾಮನ್ವೆಲ್ತ್‌ ಗೇಮ್ಸ್‌ ಫೇಡರೇಶನ್‌ ಮತ್ತು ಅಂತಾರಾಷ್ಟ್ರೀಯ ಕ್ರಿಕೆಟ್‌ ಮಂಡಳಿಗಳು ಜಂಟಿಯಾಗಿ ಈ ಕ್ರೀಡಾಕೂಟದ ಅರ್ಹತಾ ಪ್ರಕ್ರಿಯೆಯನ್ನು ಘೋಷಿಸಿವೆ.

ಮೊದಲು ಆರು ಶ್ರೇಯಾಂಕಿತ ತಂಡಗಳು ಈ ಕೂಟಕ್ಕೆ ನೇರವಾಗಿ ಪ್ರವೇಶ ಪಡೆಯಲಿವೆ. ಆತಿಥ್ಯ ವಹಿಸಲಿರುವ ಇಂಗ್ಲೆಂಡ್‌ಗೂ ನೇರ ಪ್ರವೇಶದ ಅವಕಾಶವಿದೆ. ಉಳಿದ ಒಂದು ತಂಡ ಅರ್ಹತಾ ಸುತ್ತಿನಲ್ಲಿ ತೇರ್ಗಡೆಯಾಗಿ ಪ್ರವೇಶಿಸಬೇಕಿದೆ. ಈ ಕ್ರೀಡಾಕೂಟವು 2022ರ ಜುಲೈ 28ರಿಂದ ಆ.8ರ ವರೆಗೆ ನಡೆಯಲಿದೆ.

ಕಾಮನ್ವೆಲ್ತ್‌ ಗೇಮ್ಸ್‌ನಲ್ಲಿ ಮಹಿಳಾ ಕ್ರಿಕೆಟ್‌ ತಂಡಗಳು ಭಾಗಿಯಾಗುತ್ತಿರುವುದು ಇದು ಮೊದಲ ಬಾರಿ. 1998ಲ್ಲಿ ಕೌಲಾಲಂಪುರದಲ್ಲಿ ನಡೆದ ಕ್ರೀಡಾಕೂಟದಲ್ಲಿ ಪುರುಷರ ತಂಡಗಳು ಭಾಗಿಯಾಗಿದ್ದವು.

ಅರ್ಹತೆ ಹೇಗೆ?
ಈ ಕೂಟದಲ್ಲಿ ಒಟ್ಟು 8 ತಂಡಗಳು ಭಾಗಿಯಾಗಲಿವೆ. 2021ರ ಏಪ್ರಿಲ್‌ 1ರ ರ್‍ಯಾಂಕಿಂಗ್‌ನಂತೆ ಮೊದಲ ಆರು ಶ್ರೇಯಾಂಕಿತ ತಂಡಗಳು ಈ ಕೂಟಕ್ಕೆ ನೇರ ಅರ್ಹತೆ ಪಡೆಯಲಿವೆ. ಆತಿಥ್ಯ ವಹಿಸಲಿರುವ ಇಂಗ್ಲೆಂಡ್‌ಗೆ ನೇರ ಪ್ರವೇಶ ಸಿಗಲಿದ್ದರೆ, ಮತ್ತೂಂದು ತಂಡ ಅರ್ಹತಾ ಸುತ್ತಿನಲ್ಲಿ ಆಡಿ ಕೂಟ ಪ್ರವೇಶಿಸಬೇಕು. ಇದು 2022ರ ಜನವರಿ 31ರ ಒಳಗೆ ನಡೆಯಲಿದೆ.

ಕಾಮನ್ವೆಲ್ತ್‌ ಕ್ರೀಡಾಕೂಟದಲ್ಲಿ ಮಹಿಳಾ ಕ್ರಿಕೆಟ್‌ ಸೇರ್ಪಡೆಯಾಗಿರುವುದು ಅತ್ಯಂತ ದೊಡ್ಡ ವಿಚಾರ. ಇಂಥ ಕ್ರೀಡಾಕೂಟದಲ್ಲಿ ದೇಶವನ್ನು ಪ್ರತಿನಿಧಿಸುವುದು ಹೆಮ್ಮೆಯ ವಿಚಾರ.
ಹರ್ಮನ್‌ಪ್ರೀತ್‌ ಕೌರ್‌, ಭಾರತ ಮಹಿಳಾ ಕ್ರಿಕೆಟ್‌ ತಂಡದ ನಾಯಕಿ