ತಾಯಿಯ ಸಾವಿಗೆ ಕಾರಣವಾಯ್ತು ಮಗನ ವಿಡಿಯೋ ಕಾಲ್ !

Team Udayavani, Nov 23, 2020, 11:42 AM IST

ಬಾಗಲಕೋಟೆ: ಮಗನ ವಿಡಿಯೋ ಕಾಲ್, ತಾಯಿಯ ಸಾವಿಗೆ ಕಾರಣವಾದ ಘಟನೆ ಸೋಮವಾರ ಬೆಳಗ್ಗೆ ಜಿಲ್ಲೆಯಲ್ಲಿ ಸಂಭವಿಸಿದೆ.

ಹೌದು, ಯೋಧ ಶೇಖರಯ್ಯ ವಿಭೂತಿ ಮತ್ತು ಪತ್ನಿ ಪುಷ್ಪಾವತಿ ಅವರು ಬೈಕನಲ್ಲಿ ಹುನಗುಂದ ತಾಲೂಕು ಮುಗನೂರ ಬಳಿ ಹೊರಟಿದ್ದರು. ಈ ವೇಳೆ ಯೋಧ ಶೇಖರಯ್ಯ ಅವರ ಪುತ್ರನ ವಿಡಿಯೋ ಕಾಲ್ ಬಂದಿದ್ದು, ಬೈಕ್ ಓಡಿಸುತ್ತಲೇ ವಿಡಿಯೋ ಕಾಲ್ ನಲ್ಲಿ ಮಾತನಾಡುತ್ತ ಹೊರಟಿದ್ದರು.

ಈ ವೇಳೆ ಮುಗನೂರ ಗ್ರಾಮದ ಬಳಿ ರಸ್ತೆಯಲ್ಲಿ ಹಂಪ್ಸ್ ಇದ್ದು, ಅದನ್ನು ಗಮನಿಸದೆ ಶೇಖರಯ್ಯ ಅವರು ವೇಗವಾಗಿ ಹಂಪ್ಸ್ ಮೇಲಿನಿಂದ ಬೈಕ್ ಜಿಗಿಸಿದ್ದಾರೆ. ಇದರಿಂದ ಬೈಕ್ ನ ಹಿಂಬದಿ ಕುಳುತಿದ್ದ ಪುಷ್ಪಾವತಿ (35) ಆಯತಪ್ಪಿ ರಸ್ತೆಯ ಮೇಲೆ ಬಿದ್ದಿದ್ದಾರೆ. ಆಗ ತಲೆಗೆ ತೀವ್ರ ಪೆಟ್ಟುಬಿದ್ದು ಪುಷ್ಪಾವತಿ ಸ್ಥಳದಲ್ಲೇ ಮೃತಪಟ್ಟಿದ್ದಾರೆ.

ಇದನ್ನೂ ಓದಿ:ಸಿಎಂಗೆ ತಮ್ಮ ಸರ್ಕಾರ ಉಳಿಸಿಕೊಳ್ಳುವುದು ಮುಖ್ಯ, ರೈತರ ಹಿತವಲ್ಲ: ಡಿ ಕೆ‌ ಶಿವಕುಮಾರ್

ಹಿಂಬದಿ ಕುಳಿತ ಪತ್ನಿ ರಸ್ತೆಯ ಮೇಲೆ ಬಿದ್ದು ಸಾವನ್ನಪ್ಪಿರುವುದು ಕಂಡ ಯೋಧ ಶೇಖರಯ್ಯ, ಪತ್ನಿಯ ಶವವನ್ನು ಅಪ್ಪಿ ಗೋಳಾಡಿ ಅಳುತ್ತಿದ್ದ ದೃಶ್ಯ ಮನಕಲುಕುವಂತಿತ್ತು.

ಇಂದು ಬೆಳಿಗ್ಗೆ ಜಮ್ಮು ಕಾಶ್ಮೀರದಲ್ಲಿ ಕರ್ತವ್ಯಕ್ಕೆ ಹೊರಡಬೇಕಿದ್ದ ಯೋಧ, ಪತ್ನಿಯನ್ನು ತವರು ಮನೆ ಹಿರೆಮಳಗಾವಿ ಗ್ರಾಮಕ್ಕೆ ಬಿಡಲು ಹೊರಟಿದ್ದರು.

ಸ್ಥಳಕ್ಕೆ ಅಮೀನಗಡ ಪೊಲೀಸರು ಭೇಟಿ ಪರಿಶೀಲಿಸಿದ್ದು, ಪ್ರಕರಣ ದಾಖಲಾಗಿದೆ