“ಬುಟ್ಟ ಬೊಮ್ಮ’ ಮತ್ತೆ ಟ್ರೆಂಡಿಂಗ್‌; ಟಾಲಿವುಡ್ ನಲ್ಲಿ ಹೊಸ ಮೈಲಿಗಲ್ಲು ಸೃಷ್ಟಿ

Team Udayavani, Nov 24, 2020, 5:34 PM IST

ಹೈದರಾಬಾದ್‌: ಹೊಸ ಚಿತ್ರ ಬಿಡುಗಡೆ, ಟೀಸರ್‌, ಹಾಡು, ಪೋಸ್ಟರ್‌ ಬಿಡುಗಡೆ, ನಟ ನಟಿಯರ ಗಾಸಿಪ್‌, ಹೀಗೆ ಒಂದಿಲ್ಲೊಂದು ವಿಷಯಕ್ಕೆ ಸದಾ ಸುದ್ದಿಯಲ್ಲಿರುವಂತ ಕ್ಷೇತ್ರ ಸಿನೆಮಾ ಕ್ಷೇತ್ರ. ಇಲ್ಲಿ ದಿನವೂ ಹೊಸದೊಂದು ವಿಶೇಷ ಇರುತ್ತದೆ. ಹಳೆಯ ದಾಖಲೆಗಳನ್ನು ಮುರಿದು ಹೊಸ ದಾಖಲೆಗಳು ನಿರ್ಮಾಣವಾಗುತ್ತವೆ.

ಹೀಗೆ ಸದ್ಯಕ್ಕೆ ಟ್ರೆಂಡಿಂಗ್‌ ಆಗುತ್ತಿರುವುದು ಬುಟ್ಟ ಬೊಮ್ಮ ಹಾಡು. ಇದೇ ವರ್ಷದ ಜನವರಿ ತಿಂಗಳಿನಲ್ಲಿ ಬಿಡುಗಡೆಯಾದ “ಅಲಾ ವೈಕುಂಠಪುರ್ರಮುಲೊ’ ಚಿತ್ರದ ಹಾಡು ಬಿಡುಗಡೆಯಾಗಿ ಭಾರೀ ಸದ್ದು ಮಾಡಿತ್ತು. ಕೆಲ ಕಾಲ ಸಂಗೀತ ಪ್ರಿಯರಿಗೆ ಇದು ತುಂಬಾ ಇಷ್ಟವಾಗಿತ್ತಲ್ಲದೇ ಭಾಷೆಗಳ ಗಡಿಗಳನ್ನೂ ಮೀರಿ ಎಲ್ಲ ಭಾಷಿಕರೂ ಈ ಹಾಡು ಕೇಳಿ, ಹಾಡಿಗೆ ಹೆಜ್ಜೆಹಾಕಿ ಸಂಭ್ರಮಿಸುವಂತೆ ಮಾಡಿತ್ತು.

ಇತ್ತೀಚೆಗೆ ಸನ್‌ ರೈಸರ್ ಹೈದರಾಬಾದ್‌ ತಂಡದ ಕಪ್ತಾನ, ಆಸ್ಟ್ರೇಲಿಯ ಕ್ರಿಕೆಟ್‌ ತಂಡದ ಆಟಗಾರ ಡೆವಿಡ್‌ ವಾರ್ನರ್‌ ಪತ್ನಿ ಮತ್ತು ಮಗುವಿನೊಂದಿಗೆ ಈ ಹಾಡಿಗೆ ನೃತ್ಯ ಮಾಡಿದ್ದರು. ನೃತ್ಯದ ವೀಡಿಯೋ ತುಣುಕನ್ನು ಸಾಮಾಜಿಕ ಜಾಲ ತಾಣದಲ್ಲಿ ಹಂಚಿಕೊಂಡು ಅಲ್ಲು ಅರ್ಜುನ್‌ಗೆ ಹುಟ್ಟು ಹಬ್ಬದ ಶುಭಾಶಯ ತಿಳಿಸಿದ್ದರು. ಈ ಮೂಲಕ ವಿದೇಶಿಗರನ್ನೂ ಆಕರ್ಷಿಸಿ ಜಾಗತಿಕವಾಗಿ ಈ ಹಾಡು ಜನಪ್ರಿಯವಾಗಿತ್ತು.

ಮತ್ತೆ ಮತ್ತೆ ಸುದ್ದಿಯಾಗುತ್ತಿದ್ದ ಬುಟ್ಟ ಬೊಮ್ಮ ಹಾಡು ಈಗ ಮತ್ತೆ ಟ್ವೀಟರ್‌ ಸೇರಿದಂತೆ ಇತರ ಸಾಮಾಜಿಕ ಜಾಲತಾಣಗಳಲ್ಲಿ ಸುದ್ದಿಯಲ್ಲಿದೆ. ಇದಕ್ಕೆ ಕಾರಣ ಈ ಹಾಡು ಹೊಸ ಮೈಲುಗಲ್ಲೊಂದನ್ನು ಸೃಷ್ಟಿಸಿರುವುದು. ಅದೇನೆಂದರೆ ಯೂಟ್ಯೂಬ್‌ನಲ್ಲಿ 450 ಮಿಲಿಯನ್‌ಗೂ ಹೆಚ್ಚು ಮಂದಿ ವೀಕ್ಷಿಸಿದ್ದು ಮತ್ತು 2.99 ಮಿಲಿಯನ್‌ ಗೂ ಹೆಚ್ಚು ಲೈಕ್ಸ್‌ ಈ ಹಾಡು ಪಡೆದುಕೊಂಡಿರುವುದು. ಅಲ್ಲದೇ ಇದುವರೆಗೆ ಇದ್ದ ಎಲ್ಲ ದಾಖಲೆಗಳನ್ನು ಮುರಿದು ಈಗ ಅತೀ ಹೆಚ್ಚು ವೀಕ್ಷಣೆಯಾದ ತೆಲುಗು ಚಿತ್ರದ ಹಾಡು ಎಂಬ ಖ್ಯಾತಿಗೆ ಪಾತ್ರವಾಗಿದೆ.

ಎಸ್‌. ತಮನ್‌ ನಿರ್ದೇಶನದಲ್ಲಿ ಖ್ಯಾತ ಗಾಯಕ ಅರ್ಮಾನ್‌ ಮಲಿಕ್‌ ಕಂಠಸಿರಿಯಲ್ಲಿ ಮೂಡಿಬಂದಿರುವ ಈ ಗೀತೆ ಬಿಡುಗಡೆಯಾಗಿ ತಿಂಗಳುಗಳೇ ಕಳೆದಿವೆ. ಆದರೂ ಯುಟ್ಯೂಬ್‌ನಲ್ಲಿ ಇದಕ್ಕೆ ವೀಕ್ಷಕರ ಕೊರತೆ ಉಂಟಾಗಿಲ್ಲ. ಎಸ್‌. ತಮನ್‌, ಅಲ್ಲು ಅರ್ಜುನ್‌, ಅರ್ಮಾನ್‌ ಮಲಿಕ್‌ ಸೆರಿದಂತೆ ಇತರರು ಟ್ವೀಟ್‌ ಮಾಡುವ ಮೂಲಕ ಹಾಡು ಸೃಷ್ಟಿಸಿರುವ ಹೊಸ ದಾಖಲೆಯ ಖುಷಿಯನ್ನು ಹಂಚಿಕೊಂಡಿದ್ದು, ಟ್ವೀಟರ್‌ನಲ್ಲಿ ಟ್ರೆಂಡಿಂಗ್ ‌ ಆಗಿದೆ.