Trending: ಹೃತಿಕ್ ನಂತೆಯೇ ಆರು ಬೆರಳು; ತನ್ನ ಮಗನಿಗೆ ನೆಚ್ಚಿನ ನಟನ ಹೆಸರನಿಟ್ಟ ಅಭಿಮಾನಿ !

Team Udayavani, Nov 24, 2020, 8:30 PM IST

ನವದೆಹಲಿ: ತಮ್ಮ ನೆಚ್ಚಿನ ನಟನ ಬಗೆಗಿನ ಅಭಿಮಾನವನ್ನು ವ್ಯಕ್ತಪಡಿಸಲು ಅಭಿಮಾನಿಗಳು ಸದಾ ಒಂದಿಲ್ಲೊಂದು ಪ್ರಯತ್ನಕ್ಕೆ ಕೈ ಹಾಕುತ್ತಲೇ ಇರುತ್ತಾರೆ. ಕೆಲವರು ಮೈಮೇಲೆ ಹಚ್ಚೆ ಹಾಕಿಸಿಕೊಂಡರೆ, ಇನ್ನು ಕೆಲವರು ನಟರ ಫೋಟೋ ಇರುವ ಶರ್ಟ್, ಟಿ-ಶರ್ಟ್‌ ತೊಟ್ಟು ಅಭಿಮಾನ ಮೆರೆಯುತ್ತಾರೆ. ಇಲ್ಲೊಬ್ಬ ವ್ಯಕ್ತಿ ತನ್ನ ಮಗನಿಗೆ ಜನಪ್ರಿಯ ನಟನೊಬ್ಬನ ಹೆಸರನ್ನು ಇಡುವ ಮೂಲಕ ತನ್ನ ಅಭಿಮಾನ ತೋರಿಸಿದ್ದಾನೆ.

ಹೌದು ! “ವಿಶ್ವದ ಅತ್ಯಂತ ಸ್ಪುರದ್ರೂಪಿ ವ್ಯಕ್ತಿ” ಎಂದೇ ಖ್ಯಾತಿಯ ನಟ ಹೃತಿಕ್‌ ರೋಶನ್‌ ಹೆಸರನ್ನು ಅಭಿಮಾನಿಯೊಬ್ಬ ತನ್ನ ಮಗನಿಗೂ ಇಟ್ಟಿದ್ದಾನೆ.

ಹೃತಿಕ್ ರೋಶನ್ ಗೆ ಭಾರತ ಸೇರಿದಂತೆ ಜಗತ್ತಿನಾದ್ಯಂತ ಅಪಾರ ಅಭಿಮಾನಿಗಳ ದಂಡೇ ಇದೆ. ಇಂತಹ ಅಭಿಮಾನಿಗಳಲ್ಲಿ ಇಂಪಾಲ್‌ನ ರಿಷಿಕೇಶ್‌ ಕೂಡ ಒಬ್ಬರು. ರಿಷಿಕೇಶ್‌ ದಂಪತಿಗೆ ನವೆಂಬರ್‌ 23ರಂದು ಗಂಡು ಮಗು ಜನಿಸಿತ್ತು.

ಈ ಮಗುವಿನ ಒಂದು ಕೈಯಲ್ಲಿ ಆರು ಬೆರಳುಗಳಿದ್ದು, ವಿಶೇಷವೆಂದರೇ ನಟ ಹೃತಿಕ್‌ ರೋಶನ್ ಗೂ ಒಂದು ಕೈಯಲ್ಲಿ ಎರಡು ಹೆಬ್ಬೆರಳು ಇವೆ.

ಇದನ್ನೂ ಓದಿ: ಹುತಾತ್ಮ ಮೇಜರ್‌ ಪತ್ನಿ ಈಗ ಲೆಫ್ಟಿನೆಂಟ್‌! ಪತಿ ಕೌಸ್ತುಭ್‌ ಕನಸು ಈಡೇರಿಸಿದ ಕನ್ನಿಕಾ

ತನ್ನ ನೆಚ್ಚಿನ ನಟನಂತೆ, ಮಗನಿಗೂ ಒಂದು ಕೈಯಲ್ಲಿ ಎರಡು ಹೆಬ್ಬೆರ‌ಳಿರುವುದು ರಿಷಿಕೇಶ್ ಅವರ ಸಂಭ್ರಮಕ್ಕೆ ಕಾರಣವಾಗಿದ್ದು, ಕೂಡಲೇ ಮಗುವಿಗೆ ‘ಹೃತಿಕ್‌’ ಎಂದು ನಾಮಕರಣ ಮಾಡಿದ್ದಾರೆ. ಮಾತ್ರವಲ್ಲದೆ ಒಂದು ಕಡೆ ಮಗುವಿನ ಫೋಟೋ , ಮತ್ತೊಂದು ಕಡೆ ನಟ ಹೃತಿಕ್‌ ರೋಶನ್‌ ಅವರ ಫೋಟೊ ಹಾಕಿ, ಟ್ವೀಟ್ ಮಾಡಿದ್ದು, ಇದು ಕೆಲ ಕಾಲ ಟ್ರೆಂಡಿಂಗ್‌ ಕೂಡ ಆಗಿತ್ತು.

I hv been a big fan of @iHrithik from the time of KNPH. Even added ‘H’ to my name which I wrote earlier as ‘Rishikesh’. Yesterday, I was blessed with a son, saw his thumb only this morning and decided to name my boy as “Hrithik” to be like @ihrithik Sir #BeautifullyImperfect pic.twitter.com/apY2vzU8cI

— Hrishikesh Angom (@hr_angomba) November 23, 2020

ತಮ್ಮ ಟ್ವಿಟರ್‌ ಖಾತೆಯಲ್ಲಿ ರಿಷಿಕೇಶ್‌ ಅವರು ಮತ್ತೊಂದು ರಹಸ್ಯವನ್ನೂ ಬಹಿರಂಗಪಡಿಸಿದ್ದು, ತನ್ನ ಹೆಸರಿನ ಮೊದಲು ಇಂಗ್ಲಿಷ್‌ ಅಕ್ಷರ ‘H’ ಸೇರಿಸಿಕೊಂಡಿರುವುದಾಗಿ ತಿಳಿಸಿದ್ದಾರೆ.

ನಾನು ಹೃತಿಕ್‌ ರೋಶನ್‌ ಅವರ ಅಪ್ಪಟ ಅಭಿಮಾನಿ. ಅವರ “ಕಹೋ ನಾ ಪ್ಯಾರ್‌ ಹೈ’ ಚಿತ್ರದಿಂದಲೂ ನಾನು ಅವರನ್ನು ಅನುಕರಿಸುತ್ತಿದ್ದೇನೆ. ಅವರ ಹೆಸರಿನ ಪ್ರಥಮ ಅಕ್ಷರ ‘ಎಚ್‌’ ಅನ್ನು ನನ್ನ ಹೆಸರಿನ ಮೊದಲು ಸೇರಿಸಿಕೊಂಡಿದ್ದೇನೆ. ಮೊದಲು ರಿಷಿಕೇಶ್‌ ಇದ್ದು ಬಳಿಕ ಹೃಷಿಕೇಶ್‌ ಎಂದು ಬದಲಾಯಿಸಿಕೊಂಡಿದ್ದೇನೆ. ಅಲ್ಲದೇ ನನ್ನ ಮಗುವಿಗೂ ‘ಹೃತಿಕ್‌ ಸರ್’‌ ಅಂತೆಯೇ ಒಂದು ಕೈಯಲ್ಲಿ ಎರಡು ಹೆಬ್ಬೆರಳು ಇದ್ದು ಅವರ ಹೆಸರನ್ನೇ ಇಡಲು ನಿರ್ಧರಿಸಿದೆ ಎಂದು ಟ್ವೀಟ್‌ ಮಾಡಿದ್ದಾರೆ.

ಇದನ್ನೂ ಓದಿ: ಮೂಡುಬಿದ್ರೆ ಶಾಂಭವಿ ನದಿಯಲ್ಲಿ ನಾಲ್ವರು ಮುಳುಗಿದ ಪ್ರಕರಣ : ಇಬ್ಬರ ಮೃತದೇಹ ಪತ್ತೆ