ಮಾವನ ಮನೆಗೆ ಬಂದಿದ್ದ ಅಳಿಯನ ನಿಗೂಢ ಸಾವು : ಕಲ್ಲಿನಿಂದ ಜಜ್ಜಿ ಕೊಲೆ ಶಂಕೆ

Team Udayavani, Nov 25, 2020, 2:52 PM IST

ಹುಬ್ಬಳ್ಳಿ: ತಾಲೂಕಿನ ಅಂಚಟಗೇರಿ ಗ್ರಾಮದ ಚನ್ನಾಪೂರ ರಸ್ತೆಯಲ್ಲಿ ವ್ಯಕ್ತಿಯೊಬ್ಬನ ತಲೆಗೆ ಕಲ್ಲಿನಿಂದ ಜಜ್ಜಿ ಬರ್ಬರ ಕೊಲೆ ಮಾಡಿದ ಘಟನೆ ಮಂಗಳವಾರ ನಡೆದಿದೆ.

ಘಟನೆಯಲ್ಲಿ ಹಾವೇರಿ ಜಿಲ್ಲೆ ಹಾನಗಲ್ಲ ಪಟ್ಟಣದ ಕುಮಾರೇಶ್ವರ ಮಠ ಬಳಿಯ ನಿವಾಸಿ ಜಗದೀಶ ಮನೋಹರ ಕೊಲ್ಲಾಪುರ (31) ಕೊಲೆಯಾಗಿದ್ದಾರೆ.

ಅಂಚಟಗೇರಿ ಗ್ರಾಮದ ಸಿದ್ಧಾರೂಢ ನಗರದ ಮಂಜುನಾಥ ಅಳಿಯನಾದ ಜಗದೀಶ ಅವರು ಪತ್ನಿ, ಮಗುವನ್ನು ಭೇಟಿ ಮಾಡಲು 4-5 ದಿನಗಳ ಹಿಂದೆ ಮಾವನ ಮನೆಗೆ ಬಂದಿದ್ದರು. ಸೋಮವಾರ ಸಂಜೆ ಮನೆಯಿಂದ ಹೊರಗೆ ಹೋಗಿದ್ದ ಅವರು ಮಂಗಳವಾರ ಬೆಳಗ್ಗೆ ಶವವಾಗಿ ಸಿಕ್ಕಿದ್ದಾರೆ. ಕೊಲೆಗೆ ನಿಖರ ಕಾರಣ ತಿಳಿದು ಬಂದಿಲ್ಲ ಎಂದು ಪೊಲೀಸ್‌ ಮೂಲಗಳು ತಿಳಿಸಿವೆ.

ಎಸ್‌ಪಿ ಪಿ. ಕೃಷ್ಣಕಾಂತ ಹಾಗೂ ಗ್ರಾಮೀಣ ಠಾಣೆ ಇನ್ಸ್‌ಪೆಕ್ಟರ್‌ ರಮೇಶ ಗೋಕಾಕ ಸ್ಥಳಕ್ಕೆ ಭೇಟಿ ಕೊಟ್ಟು ಪರಿಶೀಲಿಸಿದ್ದಾರೆ. ಗ್ರಾಮೀಣ ಠಾಣೆ ಪೊಲೀಸರು ಪ್ರಕರಣ ದಾಖಲಿಸಿಕೊಂಡು, ಕೊಲೆ ಆರೋಪಿಗಳ ಪತ್ತೆ ನಡೆಸಿದ್ದಾರೆ.

ಜೂಜುಕೋರರ ಬಂಧನ: ತಾಲೂಕಿನ ಮಾವನೂರ ಗ್ರಾಮದ ಸೇತುವೆ ಬಳಿ ಸೋಮವಾರ ರಾತ್ರಿ ಜೂಜಾಡುತ್ತಿದ್ದ ಏಳು ಜನರನ್ನು ಗ್ರಾಮೀಣ ಠಾಣೆ ಪೊಲೀಸರು ಬಂಧಿಸಿ, ಅವರಿಂದ ಒಂದು ಆಟೋರಿಕ್ಷಾ, ಐದು ಬೈಕ್‌ ಹಾಗೂ 5200ರೂ. ನಗದು ವಶಪಡಿಸಿಕೊಂಡಿದ್ದಾರೆ. ಓರ್ವ ಪರಾರಿಯಾಗಿದ್ದಾನೆ.
ಅಬ್ದುಲ್‌ ಗಫಾರ, ಚಂದ್ರು, ಪರಶುರಾಮ, ಮಾಬುಸಾಬ, ಮಾರುತಿ, ಅಪ್ಪಯ್ಯ, ನಾಗೇಶ ಬಂಧಿತರಾಗಿದ್ದಾರೆ. ಗ್ರಾಮೀಣ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಇದನ್ನೂ ಓದಿ:ಅಶ್ಲೀಲ ಚಿತ್ರ ಸಂಗ್ರಹಿಸಿ ಪೊಲೀಸ್ ಅಧಿಕಾರಿಯ ಹೆಸರಿನಲ್ಲಿ ಬೆದರಿಕೆ ಕರೆ: ಇಬ್ಬರ ಬಂಧನ

ಲಕ್ಷಾಂತರ ರೂ. ಮೌಲ್ಯದ ಸಾಮಗ್ರಿ ಕಳುವು:
ತಾಲೂಕಿನ ಪಾಳೆ ಗ್ರಾಮದ ಹತ್ತಿರ ರಸ್ತೆ ಕಾಮಗಾರಿ ನಡೆಸುತ್ತಿರುವ ಪ್ರೀತಿ ಪಾಲ ಸಿಂಗ ಎಂಬುವರಿಗೆ ಸೇರಿದ ಅನೇಗಾ ಕಂಪನಿಯ ಲಕ್ಷಾಂತರ ರೂ. ಮೌಲ್ಯದ ಸಾಮಗ್ರಿಗಳನ್ನು ಕಾರ್ಮಿಕರು ಕಳುವು ಮಾಡಿದ್ದಾರೆಂದು ಗ್ರಾಮೀಣ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ಉತ್ತರ ಪ್ರದೇಶ ಮೂಲದ ಕಾರ್ಮಿಕರಾದ ರಂಜಿತಾ ಬಾಯ, ಮುಖೀಮ ಅನ್ಸಾರಿ, ಸುನಿಲಕುಮಾರ ಶರ್ಮಾ, ಸೂರಜ, ಅಜಯಕುಮಾರ ರಾಮ ಬಾಯ ಎಂಬುವರು ಕಳುವು ಮಾಡಿದ್ದಾರೆಂದು ಚನ್ನಪ್ಪ ಸಾಲಗಾರ ಠಾಣೆಯಲ್ಲಿ ದೂರು ಸಲ್ಲಿಸಿದ್ದಾರೆ. ಕಂಪನಿಯ ಹೈಡ್ರೋಲಿಕ್‌ ಜಾಕ್‌, 1150 ಲೀಟರ್‌ ಡೀಸೆಲ್‌, ಟಿಪ್ಪರ್‌ ಟಾಯರ್‌ ಹಾಗೂ 50ಗ್ರಾಂ ಚಿನ್ನದ ಖಡಗ ಕಳುವು ಮಾಡಿಕೊಂಡು ಪರಾರಿಯಾಗಿದ್ದಾರೆಂದು ದೂರು ದಾಖಲಿಸಿದ್ದಾರೆ. ಗ್ರಾಮೀಣ ಠಾಣೆ ಪೊಲೀಸರು ಪ್ರಕರಣ
ದಾಖಲಿಸಿಕೊಂಡು ತನಿಖೆ ಕೈಗೊಂಡಿದ್ದಾರೆ.