ಹರೀಶನ ವಯಸ್ಸು ಮತ್ತು ಮದುವೆ ಕನಸು

Team Udayavani, Dec 11, 2020, 5:30 PM IST

ಹರೀಶ ವಯಸ್ಸು 36 -ಹೀಗೊಂದು ವಿಭಿನ್ನ ಶೀರ್ಷಿಕೆಯ ಸಿನಿಮಾ ಸದ್ದಿಲ್ಲದೇ ಆರಂಭವಾಗುತ್ತಿದೆ. ಹೆಸರು ಕೇಳಿದ ಕೂಡಲೇ ಇದೊಂದು ಮದುವೆಗೆ ಸಂಬಂಧಿಸಿದ ಸಿನಿಮಾವಾಗಿರಬಹುದು ಎಂದು ನೀವು ಊಹಿಸಿಕೊಂಡರೆ, ನಿಮ್ಮ ಊಹೆ ಸರಿ.

ಹೌದು, ಯುವಕನೋರ್ವ ಹುಡುಗಿ ಹುಡುಕಲು ಪರದಾಡುವ ಅಂಶವನ್ನು ಕಾಮಿಡಿ ಹಿನ್ನೆಲೆಯಲ್ಲಿ ಹೇಳಲು ತಂಡ ಹೊರಟಿದೆ. ಈ ಚಿತ್ರವನ್ನು ಗುರುರಾಜ್‌ ಜೇಷ್ಠ ನಿರ್ದೇಶಿಸುತ್ತಿದ್ದಾರೆ. ಇತ್ತೀಚೆಗೆ ಚಿತ್ರದ ಟೈಟಲ್‌ ಪೋಸ್ಟರ್‌ಬಿಡುಗಡೆಯಾಗಿದೆ. ಅಂದಹಾಗೆ, ಇದು ನೈಜ ಘಟನೆಯಾಧರಿತ ಸಿನಿಮಾ. ಅದನ್ನು ನಿರ್ದೇಶಕರು ಕಾಮಿಡಿ ರೂಪದಲ್ಲಿ ತರಲು ಹೊರಟಿದ್ದಾರೆ. ಇಡೀ ಸಿನಿಮಾ ಮಂಗಳೂರು ಸುತ್ತಮುತ್ತ ಚಿತ್ರೀಕರಣವಾಗಲಿದೆ. ಯೋಗೀಶ್‌ ಈ ಚಿತ್ರದ ನಾಯಕರಾದರೆ ಶ್ವೇತಾ ಅರೆಹೊಳೆ ನಾಯಕಿ. ಉಳಿದಂತೆ ಹಿರಿಯ ನಟ ಉಮೇಶ್‌, ಪ್ರಕಾಶ್‌ ತುಮಿನಾಡು ಸೇರಿದಂತೆ ಅನೇಕರು ನಟಿಸುತ್ತಿದ್ದಾರೆ.

ಇದನ್ನೂ ಓದಿ : ಫಿಟ್ ನೆಸ್ ಟೆಸ್ಟ್ ನಲ್ಲಿ ತೇರ್ಗಡೆಯಾದ ರೋಹಿತ್: ಆಸೀಸ್ ಗೆ ಹಾರಲಿದ್ದಾರೆ ಹಿಟ್ ಮ್ಯಾನ್

ನಿರ್ದೇಶಕ ಗುರುರಾಜ್‌ ಅವರೇ ಈ ಚಿತ್ರಕ್ಕೆ ಸಂಗೀತ ನೀಡುತ್ತಿದ್ದಾರೆ. ಈ ಚಿತ್ರದ ಮತ್ತೂಂದು ವಿಶೇಷವೆಂದರೆ ಚಿತ್ರದ ಒಂದು ಹಾಡನ್ನು ಪುನೀತ್‌ ರಾಜ್‌ಕುಮಾರ್‌ ಹಾಡಿದ್ದಾರೆ. ಈ ಚಿತ್ರವನ್ನು ಲಕ್ಷ್ಮೀಕಾಂತ್‌ ರಾವ್‌, ತ್ರಿಲೋಕ್‌ಕುಮಾರ್‌, ಆರ್‌ ದೀಪಾ, ಶ್ರೀದೇವಿ ಹಾಗೂ ರಜಿನಿ ಸೇರಿ ನಿರ್ಮಿಸುತ್ತಿದ್ದಾರೆ.ಚಿತ್ರಕ್ಕೆ ರಾಜೇಶ್‌ಕುಡ್ಲಕಾರ್ಯಕಾರಿ ನಿರ್ಮಾಪಕರು.