ಅಟಲ್‌ 97ನೇ ಜನ್ಮದಿನ; ಬಿಜೆಪಿ 6 ಅಂಶ‌ ಅಜೆಂಡಾ

Team Udayavani, Dec 18, 2020, 11:12 PM IST

ಹೊಸದಿಲ್ಲಿ: ಡಿ.25ಕ್ಕೆ “ಅಜಾತಶತ್ರು’, ಮಾಜಿ ಪ್ರಧಾನಿ ಅಟಲ್‌ ಬಿಹಾರಿ ವಾಜಪೇಯಿ ಅವರ 97ನೇ ಹುಟ್ಟುಹಬ್ಬ ಹಿನ್ನೆಲೆಯಲ್ಲಿ ಬಿಜೆಪಿ ಅಧ್ಯಕ್ಷ ಜೆ.ಪಿ. ನಡ್ಡಾ 6 ಅಂಶಗಳ ಅಜೆಂಡಾ ರೂಪಿಸಿದ್ದಾರೆ.

ಕೇಂದ್ರದಿಂದ ಬೂತ್‌ ಮಟ್ಟದವರೆಗೆ ಬಿಜೆಪಿಯ ಎಲ್ಲ ಮುಖಂಡರೂ, ಕಾರ್ಯಕರ್ತರಿಗೆ ಅಂದು “ಉತ್ತಮ ಆಡಳಿತದ ದಿನ’ ಆಚರಿಸಲು ಸೂಚಿಸಲಾಗಿದೆ. ಪುಷ್ಪನಮನ, ವಾಜಪೇಯಿ ಅವರ ಬದುಕು- ಸಾಧನೆ ಕುರಿತ ಚರ್ಚೆ, ಅಟಲ್‌ ಕವನ ಆಧಾರಿತ ಕವಿ ಸಮ್ಮೇಳನ, ಪಕ್ಷದ ಸಾಧನೆ ಕುರಿತಾದ ಜಿಲ್ಲಾ ಮಟ್ಟದ ವೆಬಿನಾರ್‌ ಸೇರಿದಂತೆ 6 ಅಂಶಗಳ ಕಾರ್ಯಕ್ರಮವನ್ನು ದೇಶಾದ್ಯಂತ ಸಂಘಟಿಸಲು ನಡ್ಡಾ ಸೂಚಿಸಿದ್ದಾರೆ.

ರಕ್ತದಾನ, ಆಸ್ಪತ್ರೆಗಳಲ್ಲಿ ಹಣ್ಣು ವಿತರಣೆ ಮತ್ತು ಇತರೆ ಸಾಮಾಜಿಕ ಚಟುವಟಿಕೆ ಹಮ್ಮಿಕೊಳ್ಳಲು ನಿರ್ದೇಶಿಸಿದ್ದಾರೆ. ಈ ಕುರಿತಂತೆ ಬಿಜೆಪಿ ಪ್ರಧಾನ ಕಾರ್ಯದರ್ಶಿ ಅರುಣ್‌ ಸಿಂಗ್‌ ಪ್ರತಿ ರಾಜ್ಯಗಳಿಗೆ ಸೂಚನಾಪತ್ರ ರವಾನಿಸಿದ್ದಾರೆ.