ಆನ್‌ಲೈನ್‌ ಆ್ಯಪ್‌ ಸಾಲ ವಂಚನೆ: ಮತ್ತೆ ಮೂವರ ಸೆರೆ

Team Udayavani, Dec 28, 2020, 1:40 AM IST

ಹೈದರಾಬಾದ್: ಆನ್‌ಲೈನ್‌ ಆ್ಯಪ್‌ ಆಧಾರಿತ ದಿಢೀರ್‌ ಸಾಲ ನೀಡಿ ವಂಚಿಸುವ ಜಾಲದ ವಿರುದ್ಧ ತೆಲಂಗಾಣ ಪೊಲೀಸರು ಕಾರ್ಯಾಚರಣೆ ಮುಂದುವರಿಸಿದ್ದು, ರವಿವಾರ ಚೀನೀ ಮಹಿಳೆಯೊಬ್ಬಳ ಸಹಿತ ಮತ್ತೆ ಮೂವರನ್ನು ಬಂಧಿಸಿದ್ದಾರೆ.

ಪುಣೆ ಮೂಲದ ಕಾಲ್‌ ಸೆಂಟರ್‌ ಮೂಲಕ ಸಾಲ ಪಡೆದವರನ್ನು ಬೆದರಿಸಿ ವಂಚನೆ ನಡೆಸಲಾಗುತ್ತಿತ್ತು. ಅಧಿಕ ಬಡ್ಡಿದರ, ವಸೂಲಾತಿಗಾಗಿ ಬೆದರಿಕೆ ಹಾಕಿದ ಹಿನ್ನೆಲೆಯಲ್ಲಿ ಹೈದರಾಬಾದ್‌ನ ವ್ಯಕ್ತಿಯೊಬ್ಬರು ನೀಡಿದ ದೂರನ್ನು ಆಧರಿಸಿ ಈ ಮೂವರನ್ನು ಬಂಧಿಸಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

ಶುಕ್ರವಾರವಷ್ಟೇ ಚೀನೀ ಪ್ರಜೆಯೊಬ್ಬನ ಸಹಿತ ಇದೇ ವಂಚನೆಯ ಜಾಲದಲ್ಲಿ ಶಾಮೀಲಾಗಿದ್ದ ನಾಲ್ವರನ್ನು ಬಂಧಿಸಲಾಗಿತ್ತು. ಇಂತಹ ವಂಚಕರಿಂದ ಬೆದರಿಕೆಗೆ ಒಳಗಾಗಿ ತೆಲಂಗಾಣದಲ್ಲಿ ಮೂವರು ಆತ್ಮಹತ್ಯೆ ಮಾಡಿಕೊಂಡ ಬಳಿಕ ಪೊಲೀಸರು ಜಾಲವನ್ನು ಬೇಧಿಸಲು ಆರಂಭಿಸಿದ್ದರು.