ಪಾಕ್‌-ಚೀನ ಜಂಟಿ ಪಿತೂರಿ: ಜ| ನರವಣೆ

Team Udayavani, Jan 13, 2021, 6:32 AM IST

ಹೊಸದಿಲ್ಲಿ: ಭಾರತದ ರಾಷ್ಟ್ರೀಯ ಭದ್ರತೆ ವಿರುದ್ಧ ಪಾಕಿಸ್ಥಾನ ಮತ್ತು ಚೀನ ಒಟ್ಟಾಗಿ ಪ್ರಬಲ ಬೆದರಿಕೆ ರೂಪಿಸುತ್ತಿವೆ. ಮುಂಚೂಣಿ ನೆಲೆಗಳಲ್ಲಿ ಇವರ ಜಂಟಿ ಬೆದರಿಕೆಗಳಿಗೆ ಪ್ರತ್ಯುತ್ತರಿಸಲು ಭಾರತೀಯ ಸೇನೆ ಸರ್ವಸನ್ನದ್ಧವಾಗಿದೆ ಎಂದು ಸೇನಾ ಮುಖ್ಯಸ್ಥ ಜ| ಎಂ.ಎಂ. ನರವಣೆ ವಿಶ್ವಾಸ ವ್ಯಕ್ತಪಡಿಸಿದರು. “ಸೇನಾ ದಿನ’ ಪ್ರಯುಕ್ತ ಮಂಗಳವಾರ ಪತ್ರಿಕಾಗೋಷ್ಠಿಯಲ್ಲಿ ಅವರು, “ಇತ್ತೀಚಿನ ದಿನಗಳಲ್ಲಿ ಚೀನ ಮತ್ತು ಪಾಕಿಸ್ಥಾನ ನಡುವೆ ಮಿಲಿಟರಿ ಮತ್ತು ರಕ್ಷಣೇತರ ಕ್ಷೇತ್ರಗಳಲ್ಲೂ ಸಹಕಾರ, ಬಾಂಧವ್ಯ ಹೆಚ್ಚುತ್ತಿದೆ. ಅದರಲ್ಲೂ ಪಾಕಿಸ್ಥಾನ ಭಯೋತ್ಪಾದನೆಯನ್ನೇ ವಿದೇ ಶಾಂಗ ನೀತಿಯ ಸಾಧನ ಮಾಡಿಕೊಂಡಂತೆ ವರ್ತಿಸುತ್ತಿದೆ’ ಎಂದು ಗುಡುಗಿದ್ದಾರೆ.

ಚಳಿ ಲೆಕ್ಕಕ್ಕಿಲ್ಲ!: ಭಾರತೀಯ ಸೇನೆ ಉತ್ತರದ ಗಡಿಯಲ್ಲಿ ಅತ್ಯುನ್ನತ ಭದ್ರತೆ ಕಾಯ್ದುಕೊಂಡಿದೆ. ಚಳಿಗಾಲದ ಸನ್ನಿವೇಶಕ್ಕೆ ತಕ್ಕಂತೆ ತುಕಡಿಗಳು ನಿಯೋಜನೆಗೊಂಡಿವೆ. ಹಿಮಗಾಳಿ ನಡುವೆಯೂ ನಾವು ಗಡಿ ಯುದ್ದಕ್ಕೂ ಬೀಡುಬಿಟ್ಟಿದ್ದೇವೆ. ಭಾರತ- ಚೀನ ನಡುವಿನ ಬಿಕ್ಕಟ್ಟು ಶಾಂತಿಯುತವಾಗಿ ಬಗೆಹರಿಯುತ್ತದೆ ಎಂದು ಭಾವಿಸಿದ್ದೇವೆ. ಒಂದು ವೇಳೆ ಬೇರೆ ಸ್ವರೂಪ ಪಡೆದರೂ, ಅಂಥ ಸನ್ನಿವೇಶಗಳನ್ನು ಎದುರಿಸಲೂ ನಮ್ಮ ಸೇನೆ ಸಮರ್ಥವಾಗಿದೆ ಎಂದು ಚೀನಕ್ಕೆ ಎಚ್ಚರಿಕೆ ರವಾನಿಸಿದರು.