ಬಜೆಟ್‌ನಲ್ಲಿ “ಗುಜರಿ ನೀತಿ’ ಘೋಷಣೆ?

Team Udayavani, Jan 13, 2021, 6:56 AM IST

ಹೊಸದಿಲ್ಲಿ: ಕೋವಿಡ್ ಲಾಕ್‌ಡೌನ್‌ನಿಂದ ಆರ್ಥಿಕ ಬಿಕ್ಕಟ್ಟಿಗೆ ಸಿಲುಕಿರುವ ಆಟೋಮೊಬೈಲ್‌ ಕ್ಷೇತ್ರವನ್ನು ಮರಳಿ ಹಳಿಗೆ ತರುವ ಉದ್ದೇಶದಿಂದ ಕೇಂದ್ರ ಸರಕಾರವು ಬಜೆಟ್‌ನಲ್ಲಿ “ವಾಹನಗಳ ಗುಜರಿ ನೀತಿ’ಯನ್ನು ಘೋಷಿಸುವ ಸಾಧ್ಯತೆ ಇದೆ.

ಬಜೆಟ್‌ನಲ್ಲಿ ವಿತ್ತ ಸಚಿವೆ ನಿರ್ಮಲಾ ಸೀತಾರಾಮನ್‌ ಅವರು ಗುಜರಿ ನೀತಿಯನ್ನು ಘೋಷಿಸಿ, ಅದು ಜಾರಿಯಾಗಿದ್ದೇ ಆದಲ್ಲಿ, ಹಳೆಯ ವಾಹನಗಳು ರಸ್ತೆಗಳಿಂದ ಹೊರಗುಳಿಯಲಿವೆ. ಪರಿಸರ ಮಾಲಿನ್ಯಕ್ಕೆ ಹೆಚ್ಚಿನ ಕೊಡುಗೆ ನೀಡುತ್ತಿರುವಂತಹ ವಾಹನಗಳ ಸಂಚಾರಕ್ಕೆ ನಿರ್ಬಂಧ ಹೇರಲಾಗುತ್ತದೆ. ಬಹುತೇಕ 15-20 ವರ್ಷಗಳಷ್ಟು ಹಳೆಯ ವಾಹನಗಳಿಗೆ ಈ ನೀತಿ ಅನ್ವಯವಾಗುವ ಸಾಧ್ಯತೆಯಿದೆ.

ಕಳೆದ ವರ್ಷದ ಮೇ ತಿಂಗಳಲ್ಲಿ ಕೇಂದ್ರ ಸಾರಿಗೆ ಸಚಿವ ನಿತಿನ್‌ ಗಡ್ಕರಿ ಅವರೂ ಈ ಬಗ್ಗೆ ಸುಳಿವು ನೀಡಿದ್ದರು. ಸರಕಾರವು ಗುಜರಿ ನೀತಿಯನ್ನು ಜಾರಿಗೆ ತರಲು ಚಿಂತನೆ ನಡೆಸಿದ್ದು, ಬಂದರುಗಳ ಸಮೀಪ ವಾಹನಗಳ ಮರುಬಳಕೆ ಕ್ಲಸ್ಟರ್‌ಗಳನ್ನು ಆರಂಭಿಸಲಿದ್ದೇವೆ. ಅದರಿಂದ ದೇಶದ ಆಟೋಮೊಬೈಲ್‌ ಉದ್ಯಮಗಳಿಗೆ ನೆರವಾಗಲಿದೆ ಎಂದು ಹೇಳಿದ್ದರು. ಈ ನೀತಿ ಜಾರಿಗೆ ಬಂದರೆ, ಹಳೆಯ ವಾಹನಗಳೆಲ್ಲ ಗುಜರಿಗೆ ಸೇರುತ್ತವೆ ಮತ್ತು ಗ್ರಾಹಕರು ಹೆಚ್ಚು ಹೆಚ್ಚು ಹೊಸ ವಾಹನಗಳನ್ನು ಖರೀದಿಸುತ್ತಾರೆ. ಆಗ ಆಟೋ ಕ್ಷೇತ್ರಕ್ಕೆ ಉತ್ತೇಜನ ಸಿಗಲಿದೆ ಎನ್ನುವುದು ಸರಕಾರದ ಲೆಕ್ಕಾಚಾರವಾಗಿದೆ.