ಕನ್ನಡ ಹುಡುಗಿಯ ಪರಭಾಷಾ ಪಯಣ : ತೆಲುಗಿನತ್ತ ಶ್ರೀಲೀಲಾ

Team Udayavani, Jan 13, 2021, 10:45 AM IST

“ಕಿಸ್‌’ ಚಿತ್ರದ ಮೂಲಕ ಸ್ಯಾಂಡಲ್‌ವುಡ್‌ ಅಂಗಳಕ್ಕೆ ಪರಿಚಯವಾದ ನಟಿ ಶ್ರೀಲೀಲಾ, ನಂತರ “ಭರಾಟೆ’ ಮೂಲಕ
ಸಿನಿಪ್ರಿಯರಿಗೆ ಹತ್ತಿರವಾದ ಹುಡುಗಿ. ಸದ್ಯ ಕನ್ನಡದಲ್ಲಿ ಧ್ರುವ ಸರ್ಜಾ ಅಭಿನಯದ “ದುಬಾರಿ’ ಚಿತ್ರದಲ್ಲಿ ಮತ್ತು ಧನ್ವೀರ್‌ ಗೌಡ ಅಭಿನಯದ “ಬೈಟು ಲವ್‌’ ಚಿತ್ರಗಳಲ್ಲಿ ಶ್ರೀಲೀಲಾ ನಾಯಕಿಯಾಗಿ ಕಾಣಿಸಿಕೊಳ್ಳುತ್ತಿದ್ದಾರೆ. ಇದರ ಹಿಂದೆಯೇ ಶ್ರೀಲೀಲಾ ಸದ್ದಿಲ್ಲದೆ ತೆಲುಗಿನತ್ತ ಮುಖ ಮಾಡಿದ್ದಾರೆ.

ಹೌದು, ಶ್ರೀಲೀಲಾ ತೆಲುಗಿನ “ಪೆಲ್ಲಿಸಂದಡಿ’ ಚಿತ್ರಕ್ಕೆ ನಾಯಕಿಯಾಗಿ ಆಯ್ಕೆಯಾಗಿದ್ದಾರೆ. ತೆಲುಗು ನಟ ಶ್ರೀಕಾಂತ್‌ ಪುತ್ರ ರೋಶನ್‌ ಶ್ರೀಕಾಂತ್‌ ನಾಯಕ ನಟನಾಗಿ ಅಭಿನಯಿಸುತ್ತಿರುವ “ಪೆಲ್ಲಿ ಸಂದಡಿ’ ಚಿತ್ರದಲ್ಲಿ ಶ್ರೀಲೀಲಾ ಹೀರೋಯಿನ್‌ ಆಗಿ ಕಾಣಿಸಿಕೊಳ್ಳುತ್ತಿದ್ದಾರೆ. ಮೊದಲ ಬಾರಿಗೆ ತೆಲುಗು ಚಿತ್ರದ ಮೂಲಕ ಟಾಲಿವುಡ್‌ಗೆ ಎಂಟ್ರಿಯಾಗುತ್ತಿರುವುದರ ಬಗ್ಗೆ ಮಾತನಾಡುವ ಶ್ರೀಲೀಲಾ, “ತೆಲುಗಿನಲ್ಲಿ ಈ ಹಿಂದೆ ಕೂಡ ಒಂದಷ್ಟು ಸಿನಿಮಾಗಳ ಆಫ‌ರ್ ಬಂದಿದ್ದರೂ, ಸಬೆjಕ್ಟ್ ಇಷ್ಟವಾಗದ ಕಾರಣ ಯಾವ ಸಿನಿಮಾಗಳನ್ನೂ ಒಪ್ಪಿಕೊಂಡಿರಲಿಲ್ಲ. “ಪೆಲ್ಲಿ ಸಂದಡಿ’ ಸಿನಿಮಾದ ಸಬ್ಜೆಕ್ಟ್ ಮತ್ತು ಕ್ಯಾರೆಕ್ಟರ್‌ ಎರಡೂ ಇಷ್ಟವಾಗಿದ್ದರಿಂದ, ಈ ಸಿನಿಮಾ ಮಾಡಲು ಒಪ್ಪಿಕೊಂಡೆ. ಈಗಾಗಲೇ ಈ ಸಿನಿಮಾದ ಪ್ರೀ-ಪ್ರೊಡಕ್ಷನ್‌ ಕೆಲಸಗಳು ನಡೆಯುತ್ತಿದ್ದು, ಶೀಘ್ರದಲ್ಲಿಯೇ ಶೂಟಿಂಗ್‌ ಕೂಡ ಆರಂಭವಾಗಲಿದೆ’ ಎಂದಿದ್ದಾರೆ.

ಇನ್ನು ಸುಮಾರು ಎರಡೂವರೆ ದಶಕದ ಹಿಂದೆಯೇ ಖ್ಯಾತ ನಿರ್ದೇಶಕ ಕೆ. ರಾಘವೇಂದ್ರ ರಾವ್‌ ನಿರ್ದೇಶನದಲ್ಲಿ “ಪೆಲ್ಲಿ
ಸಂದಡಿ’ ಎಂಬ ಹೆಸರಿನ ಚಿತ್ರ ತೆಲುಗಿನಲ್ಲಿ ತೆರೆಕಂಡಿತ್ತು. ಶ್ರೀಕಾಂತ್‌ ಇದರಲ್ಲಿ ನಾಯಕನಾಗಿ ಕಾಣಿಸಿಕೊಂಡಿದ್ದರು. ಈಗ ಮತ್ತೇ ಅದೇ ಹೆಸರಿನಲ್ಲಿ ಚಿತ್ರ ತೆರೆಗೆ ಬರುತ್ತಿದ್ದು, ಶ್ರೀಕಾಂತ್‌ ಪುತ್ರ ರೋಶನ್‌ ನಾಯಕನಾಗಿ ಕಾಣಿಸಿ ಕೊಳ್ಳುತ್ತಿದ್ದಾರೆ. ಅಂದಹಾಗೆ, ಚಿತ್ರದ ಟೈಟಲ್‌ “ಪೆಲ್ಲಿ ಸಂದಡಿ’ ಅಂತಿದ್ದರೂ, ಇದು ರಿಮೇಕ್‌ ಚಿತ್ರ ಅಲ್ಲವಂತೆ. “ಆಗ ಬಂದ “ಪೆಲ್ಲಿ ಸಂದಡಿ’ ಸಿನಿಮಾಕ್ಕೂ ಈಗ
ಬರುತ್ತಿರುವ ಸಿನಿಮಾಕ್ಕೂ ಯಾವುದೇ ಸಂಬಂಧವಿಲ್ಲ. ಇದು ರಿಮೇಕ್‌ ಸಿನಿಮಾವಲ್ಲ. ಎರಡೂ ಸಿನಿಮಾಗಳ ಟೈಟಲ್‌ ಒಂದೇ
ಅನ್ನೋದು ಬಿಟ್ಟರೆ, ಉಳಿದೆಲ್ಲವೂ ಸಂಪೂರ್ಣ ಭಿನ್ನವಾಗಿರುತ್ತದೆ.

ಇದು ಕಂಪ್ಲೀಟ್‌ ಇಂದಿನ ಜನರೇಶನ್‌ ಸಬೆjಕ್ಟ್ ಸಿನಿಮಾ. ಆಡಿಯನ್ಸ್‌ಗೆ ಇಷ್ಟವಾಗುವಂಥ ಎಲ್ಲ ಎಂಟರ್‌ಟೈನ್ಮೆಂಟ್ಸ್‌ ಇದರಲ್ಲಿದೆ’ ಅನ್ನೋದು ಶ್ರೀಲೀಲಾ ಮಾತು. “ನನಗೂ ಇದು ಮೊದಲ ತೆಲುಗು ಸಿನಿಮಾವಾಗಿದ್ದರಿಂದ, ಒಂದಷ್ಟು ನಿರೀಕ್ಷೆ, ಕುತೂಹಲ ಎರಡೂ ಇದೆ. ಈಗಾಗಲೇ “ಪೆಲ್ಲಿ ಸಂದಡಿ’ ಸಿನಿಮಾದ ಶೂಟಿಂಗ್‌ ಶುರುವಾಗಿದ್ದು, ಸಿನಿಮಾದ ಕ್ಯಾರೆಕ್ಟರ್‌ಗಾಗಿ ಒಂದಷ್ಟು ತಯಾರಿ ಮಾಡಿಕೊಳ್ಳುತ್ತಿದ್ದೇನೆ. ಇದೇ ವರ್ಷದ ಮಧ್ಯ ಭಾಗದಲ್ಲಿ ಈ ಸಿನಿಮಾ ಸ್ಕ್ರೀನ್‌ಗೆ ಬರುವ ಸಾಧ್ಯತೆ ಇದೆ’ ಎಂದು ಮಾಹಿತಿ ನೀಡಿದ್ದಾರೆ ಶ್ರೀಲೀಲಾ.

ನಿರ್ದೇಶಕ ಗೌರಿ ರೊನಾಂಕಿ ಈ “ಪೆಲ್ಲಿ ಸಂದಡಿ’ ಚಿತ್ರವನ್ನು ನಿರ್ದೇಶನ ಮಾಡುತ್ತಿದ್ದು, ತೆಲುಗಿನ ಖ್ಯಾತ ನಿರ್ದೇಶಕ ಕೆ.
ರಾಘವೇಂದ್ರ ರಾವ್‌ ಈ ಚಿತ್ರದ ನಿರ್ದೇಶನ ನಿರ್ವಹಣೆ ಮಾಡುತ್ತಿದ್ದಾರೆ. ಕಳೆದ ವರ್ಷವೇ ಚಿತ್ರತಂಡ ಈ ಚಿತ್ರದ ಟೈಟಲ್‌ ಅನೌನ್ಸ್‌ ಮಾಡಿತ್ತು. ಆದರೆ ಆನಂತರ ಬಂದ ಕೋವಿಡ್‌ ಲಾಕ್‌ ಡೌನ್‌ನಿಂದಾಗಿ ಚಿತ್ರದ ಕೆಲಸಗಳಿಗೆ ಬ್ರೇಕ್‌ ಬಿದ್ದಿತ್ತು. ಇದೀಗ ಮತ್ತೆ “ಪೆಲ್ಲಿ ಸಂದಡಿ’ ಚಿತ್ರದ ಕೆಲಸಗಳು ರೀ-ಸ್ಟಾರ್ಟ್‌ ಆಗಿದ್ದು, ಚಿತ್ರದ ಹೀರೋಯಿನ್‌ ಆಗಿ ಚಿತ್ರತಂಡಕ್ಕೆ ಶ್ರೀಲೀಲಾ ಎಂಟ್ರಿಯಾಗಿದ್ದಾರೆ. ಇದರ ನಡುವೆ ಕನ್ನಡದಲ್ಲಿ ಶ್ರೀಲೀಲಾ ನಾಯಕಿಯಾಗಿ ಅಭಿನಯಿಸುತ್ತಿರುವ ಎರಡೂ ಚಿತ್ರಗಳು ಈಗಾಗಲೇ
ಸೆಟ್ಟೇರಿದ್ದು, ಈ ಚಿತ್ರಗಳ ಚಿತ್ರೀಕರಣ ಕೂಡ ಆರಂಭವಾಗಿದೆ. ಒಟ್ಟಾರೆ ಈ ವರ್ಷಾಂತ್ಯದೊಳಗೆ ತಾನು ಅಭಿನಯದ ಈ ಎಲ್ಲಚಿತ್ರಗಳೂ ಪ್ರೇಕ್ಷಕರ ಮುಂದೆ ಬರಬಹುದು ಎಂಬ ನಿರೀಕ್ಷೆಯಲ್ಲಿದ್ದಾರೆ ಶ್ರೀಲೀಲಾ.