ಟಾಲಿವುಡ್‌ನ‌ತ್ತ ಭಜರಂಗಿ ಲೋಕಿ: ಚಿರಂಜೀವಿ ಅಭಿನಯದ ಆಚಾರ್ಯ ಚಿತ್ರದಲ್ಲಿ ಅಭಿನಯ

Team Udayavani, Jan 24, 2021, 12:03 PM IST

ಹ್ಯಾಟ್ರಿಕ್‌ ಹೀರೋ ಶಿವರಾಜಕುಮಾರ್‌ ಅಭಿನಯದ “ಭಜರಂಗಿ’ ಚಿತ್ರದಲ್ಲಿ ಖಳನಟನಾಗಿ ಅಬ್ಬರಿಸಿ ನೋಡುಗರ ಗಮನ ಸೆಳೆದಿದ್ದ ನಟ ಲೋಕಿ ಆನಂತರ “ಭಜರಂಗಿ’ ಲೋಕಿ ಅಂತಲೇ ಚಿತ್ರರಂಗದಲ್ಲಿ ಜನಪ್ರಿಯವಾದ ನಟ. ತಮ್ಮ ವಿಭಿನ್ನ ಲುಕ್‌, ವಾಯ್ಸ ಮತ್ತು ಮ್ಯಾನರಿಸಂ ನಿಂದ ಕನ್ನಡ ಚಿತ್ರರಂಗದ ಖಡಕ್‌ ವಿಲನ್‌ಗಳ ಸಾಲಿನಲ್ಲಿ ಗುರುತಿಸಿಕೊಂಡಿರುವ ಭಜರಂಗಿ ಲೋಕಿ, ಈಗ ತೆಲುಗು ಚಿತ್ರರಂಗಕ್ಕೆ ಅಡಿಯಿಡುವ ತಯಾರಿಯಲ್ಲಿದ್ದಾರೆ.

ಹೌದು, ತೆಲುಗಿನ ಮೆಗಾ ಸ್ಟಾರ್‌ ಚಿರಂಜೀವಿ ಅಭಿನಯದ “ಆಚಾರ್ಯ’ ಚಿತ್ರದಲ್ಲಿ ಭಜರಂಗಿ ಲೋಕಿ ಕೂಡ ಮುಖ್ಯಪಾತ್ರದಲ್ಲಿ ಅಭಿನಯಿಸುತ್ತಿದ್ದಾರೆ. ಈಗಾಗಲೇ “ಆಚಾರ್ಯ’ ಚಿತ್ರದ ಚಿತ್ರೀಕರಣ ಆರಂಭವಾಗಿದ್ದು, ನಟ ಭಜರಂಗಿ ಲೋಕಿ ಕೂಡಹೈದರಾಬಾದ್‌ನಲ್ಲಿ ಚಿತ್ರತಂಡವನ್ನು ಸೇರಿಕೊಂಡಿದ್ದಾರೆ.

ಇನ್ನು “ಆಚಾರ್ಯ’ ಚಿತ್ರದಲ್ಲಿ ಭಜರಂಗಿ ಲೋಕಿ ಅವರೊಂದಿಗೆ ಸೋನು ಸೂದ್‌, ಕಿಶೋರ್‌ ಮತ್ತಿತರು ಕೂಡ ಖಳನಟರಾಗಿ ಕಾಣಿಸಿಕೊಳ್ಳುತ್ತಿದ್ದಾರೆ. ಈ ಚಿತ್ರದಲ್ಲಿ ಚಿರಂಜೀವಿ ಪುತ್ರ ರಾಮ್‌ ಚರಣ್‌ ತೇಜ ಕೂಡ ಪ್ರಮುಖ ಪಾತ್ರವೊಂದರಲ್ಲಿ ನಟಿಸುತ್ತಿದ್ದು, ರಾಮ್‌ ಚರಣ್‌ಗೆ ಮುಖಾಮುಖೀ ಯಾಗುವ ಪಾತ್ರದಲ್ಲಿ ಭಜರಂಗಿ ಲೋಕಿ ಕಾಣಿಸಿಕೊಳ್ಳುತ್ತಿದ್ದಾರೆ ಎನ್ನಲಾಗುತ್ತಿದೆ.

ಸದ್ಯ ಕನ್ನಡದಲ್ಲಿ ಭಜರಂಗಿ ಲೋಕಿ ಅಭಿನಯದ “ಭಜರಂಗಿ 2′ ಚಿತ್ರ ಕೂಡ ಬಿಡುಗಡೆ ರೆಡಿಯಾಗಿದ್ದು, ಇದೇ ಮೇ. 14ಕ್ಕೆ ಚಿತ್ರ ತೆರೆಗೆ ಬರುತ್ತಿದೆ. ಒಟ್ಟಾರೆ ಕನ್ನಡದಿಂದ ತೆಲುಗಿನತ್ತ ಮುಖ ಮಾಡಿರುವ ಭಜರಂಗಿ ಲೋಕಿ ಎಷ್ಟರ ಮಟ್ಟಿಗೆ ಟಾಲಿವುಡ್‌ ಸಿನಿಪ್ರಿಯರಿಗೆ ಇಷ್ಟವಾಗುತ್ತಾರೆ ಅನ್ನೋದು “ಆಚಾರ್ಯ’ ಚಿತ್ರ ತೆರೆಗೆ ಬಂದ ಮೇಲಷ್ಟೇ ಗೊತ್ತಾಗಲಿದೆ.