ಇನ್ಸ್‌ಪೆಕ್ಟರ್‌ ವಿಕ್ರಂ: ಪ್ರಜ್ವಲಿಸುತ್ತಿದೆ ಪವರ್‌ಪ್ಯಾಕ್‌ ಟ್ರೇಲರ್‌

Team Udayavani, Feb 3, 2021, 8:43 AM IST

ಪ್ರಜ್ವಲ್‌ ದೇವರಾಜ್‌ ನಟನೆಯ “ಇನ್ಸ್‌ಪೆಕ್ಟರ್‌ ವಿಕ್ರಂ’ ಚಿತ್ರ ಫೆ.05ರಂದು ಬಿಡುಗಡೆಯಾಗುತ್ತಿದೆ. ಮೊದಲ ಹಂತವಾಗಿ ಚಿತ್ರದ ಟ್ರೇಲರ್‌ ಬಿಡುಗಡೆಯಾಗಿದೆ. ಆರಂಭದಲ್ಲಿ ಡೈಲಾಗ್‌ ಇಲ್ಲದ ಟ್ರೇಲರ್‌ ಬಿಟ್ಟ ತಂಡ ಈಗ ಡೈಲಾಗ್‌ ಟ್ರೇಲರ್‌ ಬಿಟ್ಟಿದೆ.

ಟ್ರೇಲರ್‌ ನೋಡಿದವರಿಗೆ ಇದೊಂದು ಪಕ್ಕಾ ಮಾಸ್‌ ಎಂಟರ್‌ಟೈನರ್‌ ಎಂಬುದು ಗೊತ್ತಾಗುತ್ತದೆ. ಟ್ರೇಲರ್‌ನ ಆರಂಭದಲ್ಲೇ “ಖಾಕಿ ಹಾಕ್ಕೊಂಡು ಖಡಕ್‌ ಆಗಿ ಎಂಟ್ರಿ ಕೊಡೋಕೆ, ನೀನೇನು ಡೈನಾಮಿಕ್‌ ಹೀರೋ ದೇವರಾಜೇನೋ…’, “ಅವರ ಮಗ ಪ್ರಜ್ವಲ್‌ ದೇವರಾಜ್‌ ಅಂದ್ಕೋ… ಅಲ್ಲಾ, ಅಪ್ಪ ಹೊಡೆದ್ರೆ ಲಾಕಪ್‌ ಡೆತ್‌, ಮಗ ಹೊಡೆದ್ರೆ ಸ್ಪಾಟ್‌ ಡೆತ್..’ ಎಂಬ ಮಾಸ್‌ ಡೈಲಾಗ್‌ನೊಂದಿಗೆ ಆರಂಭವಾಗುವ ಈ ಟ್ರೇಲರ್‌ನಲ್ಲಿ ಫ‌ನ್ನಿ ಲವ್‌ ಸ್ಟೋರಿಯೊಂದರ ಸೂಚನೆ ಕೂಡಾ ಇದೆ.

ಇನ್ನು ಈ ಚಿತ್ರದಲ್ಲಿ ನಟ ದರ್ಶನ್‌ ಕೂಡಾ ನಟಿಸಿದ್ದು, ಟ್ರೇಲರ್‌ನ ಕೊನೆಯಲ್ಲಿ ಕ್ಯಾಪ್‌ವೊಂದನ್ನು ತೆಗೆದುಕೊಳ್ಳುವ ದೃಶ್ಯವಿದ್ದು, ಅದು ದರ್ಶನ್‌ ಎಂದು ಈಗಾಗಲೇ ಅವರ ಅಭಿಮಾನಿಗಳು ಅಂದಾಜಿಸಿದ್ದಾರೆ.

ಚಿತ್ರದ ಟ್ರೇಲರ್‌ ನೋಡಿದಾಗ ಇದೊಂದು ಔಟ್‌ ಅಂಡ್‌ ಔಟ್‌ ಕಮರ್ಷಿಯಲ್‌ ಹಾಗೂ ಪೈಸಾ ವಸೂಲ್‌ ಸಿನಿಮಾ ಎಂಬುದು ಗೊತ್ತಾಗುತ್ತದೆ. ಪ್ರಜ್ವಲ್‌ ಕೆರಿಯರ್‌ನಲ್ಲೇ ಹೊಸ ಬಗೆಯ ಸಿನಿಮಾವಾಗಿ ಈ ಚಿತ್ರ ಗಮನ ಸೆಳೆಯುವ ಲಕ್ಷಣ ಕಾಣುತ್ತಿದೆ. ನಾಯಕಿ ಭಾವನಾ ಕೂಡಾ ವಿಭಿನ್ನ ಪಾತ್ರದಲ್ಲಿ ಕಾಣಿಸಿಕೊಂಡಂತಿದೆ.

ಅನೂಪ್‌ ಸೀಳೀನ್‌ ಅವರ ಹಿನ್ನೆಲೆ ಸಂಗೀತದಿಂದಲೂ ಟ್ರೇಲರ್‌ ಗಮನ ಸೆಳೆಯುತ್ತಿದೆ. ಇನ್ನು ಈಗಾಗಲೇ ಬಿಡುಗಡೆಯಾಗಿರುವ ಟ್ರೇಲರ್‌ ಟ್ರೆಂಡಿಂಗ್‌ ನಲ್ಲಿದ್ದು, ನೋಡಿದವರಿಂದ ಮೆಚ್ಚುಗೆ ವ್ಯಕ್ತವಾಗುತ್ತಿದೆ. ಇನ್ನು ಚಿತ್ರ 400ಕ್ಕೂ ಹೆಚ್ಚು ಚಿತ್ರಮಂದಿರಗಳಲ್ಲಿ ಬಿಡುಗಡೆಯಾಗುತ್ತಿದೆ.