ಆಸ್ಟ್ರೇಲಿಯನ್‌ ಓಪನ್‌ ಟೆನಿಸ್‌ : 4ನೇ ಸುತ್ತಿನಲ್ಲಿ ನಡಾಲ್‌, ಬಾರ್ಟಿ, ಮೆಡ್ವೆಡೇವ್

Team Udayavani, Feb 13, 2021, 10:40 PM IST

ಆಸ್ಟ್ರೇಲಿಯನ್‌ ಓಪನ್‌ ಟೆನಿಸ್‌ : ಬೋಪಣ್ಣ ಔಟ್, 4ನೇ ಸುತ್ತಿನಲ್ಲಿ ನಡಾಲ್‌, ಬಾರ್ಟಿ

ಮೆಲ್ಬರ್ನ್: ಆಸ್ಟ್ರೇಲಿಯನ್‌ ಓಪನ್‌ ಟೆನಿಸ್‌ ಪಂದ್ಯಾವಳಿಯ 7ನೇ ದಿನದಾಟದಲ್ಲಿ ರಫೆಲ್‌ ನಡಾಲ್‌, ಡ್ಯಾನಿಲ್‌ ಮೆಡ್ವೆಡೇವ್‌, ಆ್ಯಶ್ಲಿ ಬಾರ್ಟಿ ಮೊದಲಾದ ಪ್ರಮುಖ ಆಟಗಾರರು 4ನೇ ಸುತ್ತನ್ನು ಯಶಸ್ವಿಯಾಗಿ ತಲುಪಿದ್ದಾರೆ.

ರಫೆಲ್‌ ನಡಾಲ್‌ ಬ್ರಿಟನ್ನಿನ ಕ್ಯಾಮರಾನ್‌ ನೂರಿ ಅವರನ್ನು 7-5, 6-2, 7-5 ಅಂತರದಿಂದ ಮಣಿಸಿ ಇಟಲಿಯ ಫ್ಯಾಬಿಯೊ ಫೊಗಿನಿ ಅವರನ್ನು ಎದುರಿಸಲು ಸಜ್ಜಾದರು.

ರಶ್ಯದ ಡ್ಯಾನಿಲ್‌ ಮೆಡ್ವೆಡೇವ್‌ ಅವರಿಗೆ ಕೊನೆಗೂ 5 ಸೆಟ್‌ಗಳ ಹೋರಾಟದಲ್ಲಿ ಗೆಲುವು ಕೈ ಹಿಡಿದಿದೆ. ಹಿಂದಿನ ಆರೂ ಹೋರಾಟಗಳಲ್ಲಿ ಸೋತಿದ್ದ ಅವರು ಶನಿವಾರದ 3ನೇ ಸುತ್ತಿನಲ್ಲಿ ಸರ್ಬಿಯಾದ ಫಿಲಿಪ್‌ ಕ್ರಾಜಿನೋವಿಕ್‌ ವಿರುದ್ಧ 6-3, 6-3, 4-6, 3-6, 6-0 ಅಂತರದ ಮೇಲುಗೈ ಸಾಧಿಸಿದರು. ಯುಎಸ್‌ ಓಪನ್‌ ಫೈನಲಿಸ್ಟ್‌ ಆಗಿರುವ ಇವರ ಮುಂದಿನ ಎದುರಾಳಿ ಅಮೆರಿಕದ ಮೆಕೆಂಜಿ ಮೆಕ್‌ಡೊನಾಲ್ಡ್‌.

ರಶ್ಯದ ಮತ್ತೋರ್ವ ಆಟಗಾರ ಆ್ಯಂಡ್ರೆ ರುಬ್ಲೇವ್‌ ಕೂಡ 3ನೇ ಸುತ್ತು ದಾಟಿದ್ದಾರೆ. ಅವರು ಫೆಲಿಶಿಯಾನೊ ಲೋಪೆಜ್‌ ವಿರುದ್ಧ 7-5, 6-2, 6-3 ಅಂತರದ ಗೆಲುವು ಒಲಿಸಿಕೊಂಡರು. ಆದರೆ ರಶ್ಯದ ಕರೆನ್‌ ಕಶನೋವ್‌ ಪರಾಭವಗೊಂಡರು.

ಇದನ್ನೂ ಓದಿ:133 ವಾಹನಗಳ ಸರಣಿ ಅಪಘಾತ: 9 ಸಾವು, 65ಕ್ಕೂ ಅಧಿಕ ಮಂದಿಗೆ ಗಂಭೀರ ಗಾಯ

4ನೇ ಸುತ್ತಿಗೆ ಬಾರ್ಟಿ
ಆತಿಥೇಯ ನಾಡಿನ ಅಗ್ರಮಾನ್ಯ ಆಟಗಾರ್ತಿ ಆ್ಯಶ್ಲಿ ಬಾರ್ಟಿ ಗೆಲುವಿನ ಓಟ ಮುಂದುವರಿಸಿ 4ನೇ ಸುತ್ತು ಪ್ರವೇಶಿಸಿದರು. ಅವರು 6-2, 6-4ರಿಂದ ರಶ್ಯದ ಎಕಟೆರಿನಾ ಅಲೆಕ್ಸಾಂಡ್ರೋವಾಗೆ ಸೋಲುಣಿಸಿದರು. ಇವರ ಮುಂದಿನ ಎದುರಾಳಿ ಅಮೆರಿಕದ ಶೆಲ್ಬಿ ರೋಜರ್. ಅವರು ಅನೆಟ್‌ ಕೊಂಟವೀಟ್‌ ವಿರುದ್ಧ 6-4, 6-3 ಅಂತರದ ಜಯ ಸಾಧಿಸಿದರು. ಜೆಸ್ಸಿಕಾ ಪೆಗುಲಾ, ಎಲಿನಾ ಸ್ವಿಟೋಲಿನಾ, ಜೆನ್ನಿಫ‌ರ್‌ ಬ್ರಾಡಿ, ಡೋನಾ ವೆಕಿಕ್‌ ಕೂಡ ಮೂರನೇ ಸುತ್ತು ದಾಟಿ ಮುನ್ನಡೆದಿದ್ದಾರೆ.

ಬೋಪಣ್ಣ ಔಟ್‌; ಭಾರತದ ಆಟ ಮುಕ್ತಾಯ
ರೋಹನ್‌ ಬೋಪಣ್ಣ ಮಿಶ್ರ ಡಬಲ್ಸ್‌ ಮೊದಲ ಸುತ್ತಿನಲ್ಲೇ ಸೋಲನುಭವಿಸುವ ಮೂಲಕ ಆಸ್ಟ್ರೇಲಿಯನ್‌ ಓಪನ್‌ ಪಂದ್ಯಾವಳಿಯಲ್ಲಿ ಭಾರತದ ಸವಾಲು ಅಂತ್ಯಗೊಂಡಿತು.

ಶನಿವಾರದ ಪಂದ್ಯದಲ್ಲಿ ರೋಹನ್‌ ಬೋಪಣ್ಣ ಮತ್ತು ಚೀನದ ಯಿಂಗ್‌ ಯಿಂಗ್‌ ದುವಾನ್‌ ಜೋಡಿಯನ್ನು ಬೆಥನಿ ಮಾಟೆಕ್‌ ಸ್ಯಾಂಡ್ಸ್‌ (ಅಮೆರಿಕ)-ಜಾಮಿ ಮರ್ರೆ (ಬ್ರಿಟನ್‌) ಸೇರಿಕೊಂಡು 6-4, 6-4 ನೇರ ಸೆಟ್‌ಗಳಿಂದ ಪರಾಭವಗೊಳಿಸಿದರು.