100 ಕೋಟಿ ಲೂಟಿಗೆ ಸ್ಕೆಚ್‌! ಚೇತನ್‌ ಹೇಳಿದ ಕೋಟಿ ಕಥೆ

Team Udayavani, Feb 19, 2021, 4:23 PM IST

ನಟ ಆ ದಿನಗಳು ಚೇತನ್‌ ಸದ್ಯ “100 ಕೋಟಿ’ ಎಂಬ ಸಿನಿಮಾದಲ್ಲಿ ನಟಿಸ್ತುದ್ದಾರೆ. ಇದೇನಿದು ಸಿನಿಮಾದ ಟೈಟಲ್‌ ಈ ಥರ ಇದೆ ಅಂಥ ನೀವು ಕೇಳಬಹುದು

ಅದಕ್ಕೆ ಚೇತನ್‌ ಉತ್ತರ ಹೀಗಿದೆ, “ಇದೊಂದು ಸಸ್ಪೆನ್ಸ್‌ ಕಂ ಆ್ಯಕ್ಷನ್‌ – ಥ್ರಿಲ್ಲರ್‌ ಶೈಲಿಯ ಸಿನಿಮಾ. ಇಡೀ ಸಿನಿಮಾ 100 ಕೋಟಿ ಹಣವನ್ನು ಲೂಟಿ ಮಾಡುವುದರ ಸುತ್ತ ನಡೆಯುತ್ತದೆ. ಅದಕ್ಕಾಗಿ ಸಿನಿಮಾದ ಟೈಟಲ್‌ “100 ಕೋಟಿ’ ಅಂಥ ಇಟ್ಟಿದ್ದೇವೆ’ ಎನ್ನುತ್ತಾರೆ

ಇಲ್ಲಿಯವರೆಗೆ ಲವರ್‌ಬಾಯ್‌ ಆಗಿ, ಪ್ರಮಾಣಿಕ ಹುಡುಗನಾಗಿ ತೆರೆಮೇಲೆ ಕಾಣಿಸಿಕೊಂಡಿದ್ದ ಚೇತನ್‌ ಈ ಚಿತ್ರದಲ್ಲಿ ಸಂಪೂರ್ಣ ವಿರುದ್ಧವಾಗಿರುವಂಥ, ಭ್ರಷ್ಟ ಪೊಲೀಸ್‌ ಆಫೀಸರ್‌ ಪಾತ್ರದಲ್ಲಿ ಕಾಣಿಸಿಕೊಳ್ಳುತ್ತಿದ್ದಾರಂತೆ. ತಮ್ಮ ಪಾತ್ರದ ಬಗ್ಗೆ ಮಾತನಾಡುವ ಚೇತನ್‌, “ದುಡ್ಡಿಗೋಸ್ಕರ ಏನು ಬೇಕಾದ್ರೂ ಮಾಡುವಂತಹ ಪಾತ್ರ ನನ್ನದು. ಇಲ್ಲಿಯವರೆಗೆ ಯಾವತ್ತೂ ಇಂಥ ಪಾತ್ರ ಮಾಡಿಲ್ಲ. ಕನ್ನಡ ಮತ್ತು ತೆಲುಗಿನಲ್ಲಿ ಈ ಸಿನಿಮಾ ಸಿದ್ಧವಾಗುತ್ತಿದ್ದು, ಏಕಕಾಲಕ್ಕೆ ಎರಡೂ ಭಾಷೆಗಳಲ್ಲಿ ಶೂಟಿಂಗ್‌ ಮಾಡಿದ್ದೇವೆ. ಕನ್ನಡ ಮತ್ತು ತೆಲುಗು ಕಲಾವಿದರೂ ಸಿನಿಮಾದ ಇತರ ಪಾತ್ರಗಳಲ್ಲಿ ಅಭಿನಯಿಸಿದ್ದಾರೆ. ಆ್ಯಕ್ಷನ್‌, ಸಸ್ಪೆನ್ಸ್‌-ಥ್ರಿಲ್ಲರ್‌ ಎಲ್ಲ ಎಲಿಮೆಂಟ್ಸ್‌ ಸಿನಿಮಾದಲ್ಲಿದೆ. ಇಡೀ ಸಿನಿಮಾ ನನಗೊಂದು ಹೊಸ ಅನುಭವ’ ಎನ್ನುತ್ತಾರೆ.

“ಎಸ್‌.ಎಸ್‌ ಸ್ಟುಡಿಯೋಸ್‌’ ಮತ್ತು “ವಿಷನ್‌ ಸಿನಿಮಾಸ್‌’ ಬ್ಯಾನರ್‌ನಲ್ಲಿ ನಿರ್ಮಾಣವಾಗುತ್ತಿರುವ “100 ಕೋಟಿ’ ಚಿತ್ರಕ್ಕೆ ತೆಲುಗು ಮೂಲದ ಸಾಯಿ ಕಾರ್ತಿಕ್‌ ಸಂಗೀತ ಸಂಯೋಜಿಸಿ, ನಿರ್ಮಾಣ ಮಾಡುತ್ತಿದ್ದಾರೆ. ಚಿತ್ರಕ್ಕೆ ವಿರಾಟ್‌ ಚಕ್ರವರ್ತಿ ನಿರ್ದೇಶನವಿದೆ. ನಾಗಂ ತಿರುಪತಿ ರೆಡ್ಡಿ, ಶ್ರೀಕಾಂತ್‌ ದೀಪಾಲ್‌ ನಿರ್ಮಾಣದಲ್ಲಿ ಕೈ ಜೋಡಿಸಿದ್ದಾರೆ. ಈಗಾಗಲೇ “100 ಕೋಟಿ’ ಚಿತ್ರದ ಚಿತ್ರೀಕರಣ ಪೂರ್ಣಗೊಳಿಸಿರುವ ಚಿತ್ರತಂಡ, ಇತ್ತೀಚೆಗೆ ಚಿತ್ರದ ಮೊದಲ ಪೋಸ್ಟರ್‌ ಅನ್ನು ಬಿಡುಗಡೆ ಮಾಡಿದೆ