ಬೆಳೆಯುತ್ತಿರುವ ರಸ್ತೆ… ಕುಗ್ಗುತ್ತಿರುವ ಅಂತರ…

Team Udayavani, Feb 20, 2021, 10:56 AM IST

ಬೆಂಗಳೂರು: ನಗರದಲ್ಲಿ ಪ್ರತಿ ವರ್ಷ ನಡೆಯುವ ಪ್ರಮುಖ ರಸ್ತೆಗಳ ಅಭಿವೃದ್ಧಿ ಭವಿಷ್ಯದಲ್ಲಿ “ನಮ್ಮ ಮೆಟ್ರೋ’ಗೆ ತೊಡಕಾಗಲಿದೆಯೇ? – “ಹೌದು’ ಎನ್ನುತ್ತವೆ ಎಂಜಿನಿಯರಿಂಗ್‌ ಮೂಲಗಳು!

ನಗರದ ಬಹುತೇಕ ರಸ್ತೆಗಳು ಅದರಲ್ಲೂ ಮೆಟ್ರೋ ಹಾದುಹೋಗುವ ಮಾರ್ಗಗಳು ಯಾವಾಗಲೂ ಹೊಳೆಯುತ್ತಿರುತ್ತವೆ. ಇದಕ್ಕೆ ಕಾರಣ ನಿಯಮಿತವಾಗಿ ಅವುಗಳ ದುರಸ್ತಿ ಕಾರ್ಯಕೈಗೆತ್ತಿಕೊಳ್ಳುವುದು. ಇದರಿಂದ ಪ್ರತಿ ವರ್ಷ ರಸ್ತೆಗಳು ಬೆಳೆವಣಿಗೆ (ಎತ್ತರದಲ್ಲಿ) ಹೊಂದುತ್ತಿವೆ. ಈ ಬೆಳವಣಿಗೆ ಇದೇ ರೀತಿ ಮುಂದುವರಿದರೆ, ಭವಿಷ್ಯದಲ್ಲಿ ಸರಕು ಹೊತ್ತ ವಾಹನಗಳು ಮೆಟ್ರೋ ನಿಲ್ದಾಣಗಳನ್ನು ದಾಟಲು ಸಮಸ್ಯೆ ಆಗಲಿದೆ.

ಹಾಗಂತ, ರಸ್ತೆಗಳಿಗೆ ಟಾರು ಹಾಕುವುದು ತಪ್ಪಲ್ಲ; ಆದರೆ, ಸಾಮಾನ್ಯವಾಗಿ ಗುತ್ತಿಗೆದಾರರು ಈ ಮೊದಲೇ ಇದ್ದ ಟಾರು ರಸ್ತೆಯ ಮೇಲೆಯೇ ಪದೇ ಪದೆ ರಸ್ತೆ ದುರಸ್ತಿ ಹೆಸರಿನಲ್ಲಿ ಬಿಟುಮಿನ್‌ ಸುರಿಯುತ್ತಾರೆ. ಎಂಜಿನಿಯರ್‌ಗಳ ಪ್ರಕಾರ ಕನಿಷ್ಠ3-4 ಸೆಂ.ಮೀ. ಟಾರು ಹಾಕಲಾಗುತ್ತದೆ. ಆಗ,ಸಹಜವಾಗಿ ರಸ್ತೆಗಳ ಎತ್ತರ ಪ್ರತಿ ವರ್ಷ ಹೆಚ್ಚುತ್ತದೆ.ಇದು ನಮಗೆ ಅರಿವಿಲ್ಲದೆ, ಸಮಸ್ಯೆಯಾಗಿ ಪರಿಣಮಿಸುವ ಸಾಧ್ಯತೆಗಳಿವೆ ಎಂದು ಬೆಂಗಳೂರು ಮೆಟ್ರೋ ರೈಲು ನಿಗಮ (ಬಿಎಂಆರ್‌ಸಿಎಲ್‌) ಹಿರಿಯ ಎಂಜಿನಿಯರೊಬ್ಬರು ತಿಳಿಸುತ್ತಾರೆ.

ಟ್ರಿನಿಟಿ ನಿಲ್ದಾಣ; 4.9 ಮೀ. ಎತ್ತರ?:

ಸಾಮಾನ್ಯವಾಗಿ ಮೆಟ್ರೋ ನಿಲ್ದಾಣಗಳನ್ನು ನಗರದ ಒಳಗಾದರೆ ನೆಲದಿಂದ 5 ಮೀ. ಹಾಗೂ ಹೊರವಲಯದಲ್ಲಿ 5.5 ಮೀ. ಎತ್ತರದಲ್ಲಿ ನಿರ್ಮಿಸಲಾಗಿರುತ್ತದೆ. ಟ್ರಿನಿಟಿ ವೃತ್ತದ ನಿಲ್ದಾಣವು ನೆಲದಿಂದ 4.9 ಮೀ. ಎತ್ತರದಲ್ಲಿ ನಿರ್ಮಾಣಗೊಂಡಿದೆಎನ್ನಲಾಗಿದೆ. ಈ ಮಧ್ಯೆ 2010-11ರಲ್ಲಿ ನಿರ್ಮಿಸಲಾದ ಉದ್ದೇಶಿತ ಈ ನಿಲ್ದಾಣ ಬಂದ ನಂತರಆ ರಸ್ತೆಯು ಹಲವು ಬಾರಿ ದುರಸ್ತಿ ಕಂಡಿದೆ. ಆ ಜಾಗದಲ್ಲಿ ವಾಹನ ಸಿಲುಕಿಕೊಂಡಿದ್ದು, ಕಾಕತಾಳೀಯ ಇರಬಹುದು ಹೊರತು, ಇದೇ ಕಾರಣ ಎಂದೂ ನಿರ್ಧರಿಸಲಾಗದು.

ಇದರ ಜತೆಗೆ ರಸ್ತೆ ಸಾಂದ್ರತೆ ಹೆಚ್ಚುವುದರಿಂದ ಅಕ್ಕ-ಪಕ್ಕ ಇಳಿಜಾರು ಆಗುತ್ತದೆ. ಆಗ, ಅಲ್ಲಿದ್ದ ಮನೆ ಅಥವಾ ಮಳಿಗೆಗಳಿಗೆ ಮಳೆಗಾಲದಲ್ಲಿ ನೀರು ನುಗ್ಗಿ ಅವಾಂತರ ಸೃಷ್ಟಿಯಾಗುತ್ತದೆ. ಜತೆಗೆ ಅನಗತ್ಯವಾಗಿ ರಸ್ತೆಗೆ ಅನುಗುಣವಾಗಿ ಫ‌ುಟ್‌ಪಾತ್‌ಗಳ ಮರುನಿರ್ಮಾಣ ಮಾಡುವ ಕಸರತ್ತೂ ತಪ್ಪುತ್ತದೆ.

ಸಮಸ್ಯೆ ಪ್ರಶ್ನೆ ಉದ್ಭವಿಸದು; ಬಿಬಿಎಂಪಿ: “ರಸ್ತೆಗಳ ಅಭಿವೃದ್ಧಿಯಿಂದ ಭವಿಷ್ಯದಲ್ಲಿ ಮೆಟ್ರೋಗೆ ಯಾವುದೇ ರೀತಿ ಸಮಸ್ಯೆ ಆಗದು. ಯಾಕೆಂದರೆ, ಬಿಬಿಎಂಪಿ ವ್ಯಾಪ್ತಿಯಲ್ಲಿ ಒಮ್ಮೆ 25 ಮಿ.ಮೀ. ರಸ್ತೆಗಳ ಡಾಂಬರೀಕರಣ ಮಾಡಿದರೆ, 3 ವರ್ಷಗಳು ಅದಕ್ಕೆ ಮತ್ತೆ ಟಾರು ಹಾಕುವುದಿಲ್ಲ. ಅದೇ ರೀತಿ, 70 ಮಿ.ಮೀ. ನಷ್ಟು ಡಾಂಬರೀಕರಣ ಮಾಡಿದರೆ, 5 ವರ್ಷ ಅದರ ಅವಧಿ ಇರುತ್ತದೆ. ಹಾಗಾಗಿ, ಅರ್ಧ ಮೀ.ಎತ್ತರ ಆಗಬೇಕಾದರೂ ದಶಕಗಳೇ ಹಿಡಿಯುತ್ತದೆ. ಈಗ ನಗರದಲ್ಲಿರುವ ರಸ್ತೆಗಳನ್ನೇ ತೆಗೆದುಕೊಂಡರೆ 70-80ರ ದಶಕದಲ್ಲಿ ನಿರ್ಮಿಸಲ್ಪಟ್ಟಿವೆ. ಇನ್ನು ಮುಂದಿನ ದಿನಗಳಲ್ಲಂತೂ ಡಾಂಬರೀಕರಣ ಹೋಗಿ, ವೈಟ್‌ಟಾಪಿಂಗ್‌ ಎಂಬ ಶಾಶ್ವತ ವ್ಯವಸ್ಥೆ ಬರುತ್ತಿದೆ’ ಎಂದು ಬಿಬಿಎಂಪಿ ಮುಖ್ಯ ಎಂಜಿನಿಯರ್‌ ಪ್ರಹ್ಲಾದ್‌ ತಿಳಿಸುತ್ತಾರೆ.

2017ರಲ್ಲೇ ಟಾರು ಕಂಡಿತ್ತು :

ಈಚೆಗೆ ಟ್ರಿನಿಟಿ ವೃತ್ತದ ಮೆಟ್ರೋ ನಿಲ್ದಾಣದಲ್ಲಿ ಸರಕು ಸಾಗಿಸುತ್ತಿದ್ದ ಲಾರಿಯೊಂದು ಸಿಲುಕಿಕೊಂಡಿತ್ತು. ಆದರೆ, ಆ ರಸ್ತೆ ಡಾಂಬರೀಕರಣಗೊಂಡಿದ್ದು 2017ರಲ್ಲಿ. ಹಾಗಾಗಿ, ಇದಕ್ಕೆ ರಸ್ತೆಗಳ ಸಾಂದ್ರತೆ ಕಾರಣವಲ್ಲ ಎಂದು ಅಧಿಕಾರಿಗಳು ಸ್ಪಷ್ಪಡಿಸುತ್ತಾರೆ.

ಮರುಬಳಕೆಗೆ ಬೇಕಿದೆ ತಂತ್ರಜ್ಞಾನ :  ನಗರದಲ್ಲಿ ನಿತ್ಯ ನೂರಾರು ಕಟ್ಟಡಗಳ ನೆಲಸಮ ಹಾಗೂ ನಿರ್ಮಾಣ ಕಾರ್ಯ ನಡೆಯುತ್ತದೆ. ಕಟ್ಟಡಗಳಿಗೆ ಬಳಕೆಯಾಗುವ ಕಚ್ಚಾವಸ್ತುಗಳಲ್ಲಿ ಶೇ. 50ರಷ್ಟಾದರೂ ಮರುಬಳಕೆ ಮಾಡುವಂತಾಗಬೇಕು. ಈ ನಿಟ್ಟಿನಲ್ಲಿ ತಂತ್ರಜ್ಞಾನ ಪರಿಚಯಿಸಬೇಕಿದೆ. ಇದು ಸಾಧ್ಯವಾದರೆ, ತಕ್ಕಮಟ್ಟಿಗಾದರೂ ಕ್ವಾರಿ ಸೇರಿದಂತೆ ಪರಿಸರದ ಮೇಲೆ ಹೊರೆ ಕಡಿಮೆ ಆಗಲಿದೆ.

–ವಿಜಯಕುಮಾರ್‌ ಚಂದರಗಿ