ವಿವಾದದ ಗೂಡಾದ ಸಮ್ಮೇಳನ

Team Udayavani, Nov 27, 2017, 11:07 AM IST

ಈಗೀಗ ವಿವಾದಗಳಿಲ್ಲದೆ ಯಾವೊಂದು ಕಾರ್ಯಕ್ರಮವೂ ನಡೆಯುವುದಿಲ್ಲ ಎನ್ನುವಂತಾಗಿದೆ. ಕನ್ನಡಿಗರ  ನಾಡು ನುಡಿಯ ಜಾತ್ರೆಯೆಂದೇ ಕನ್ನಡಿಗರು ಹೆಮ್ಮೆಯಿಂದ ಹೇಳಿಕೊಳ್ಳುವ ಸಾಹಿತ್ಯ ಸಮ್ಮೇಳನ ಕೂಡ ಕಳೆದ ಕೆಲವು ವರ್ಷಗಳಿಂದೀಚೆಗೆ ಸಾಹಿತ್ಯ ಹೊರತು ಪಡಿಸಿ ಇತರ ವಿವಾದಗಳಿಂದಾಗಿಯೇ ಸುದ್ದಿಯಾಗುತ್ತಿದೆ. ಮೈಸೂರಿನಲ್ಲಿ ನಡೆದ 83ನೇ ಸಾಹಿತ್ಯ ಸಮ್ಮೇಳನವೂ ವಿವಾದದಿಂದ ಹೊರತಾಗಲಿಲ್ಲ ಎನ್ನುವುದಕ್ಕಿಂತಲೂ ಇಡೀ ಸಮ್ಮೇಳನವೇ ವಿವಾದದ ಗೂಡಾಯಿತು ಎನ್ನುವುದೇ ಹೆಚ್ಚು ಸರಿ. ನಾಡು ಕಂಡ ಅತ್ಯಂತ ಪ್ರಜ್ಞಾವಂತ ಸಾಹಿತಿ ಚಂಪಾ ಅವರ ಅಧ್ಯಕ್ಷ ಭಾಷಣವೇ ಎಲ್ಲಕ್ಕಿಂತ ಹೆಚ್ಚು ವಿವಾದ ಸೃಷ್ಟಿಸಿತು.

ಉಳಿದಂತೆ ಸಾಹಿತ್ಯ ಸಮ್ಮೇಳನ ಎಂಬ ಪರಿಕಲ್ಪನೆಯನ್ನು ಪರಿಚಯಿಸಿದ ಮೈಸೂರು ಮಹಾರಾಜರ ವಂಶಸ್ಥರಿಗೆ ಆಹ್ವಾನ ನೀಡದೇ ಇರುವುದು, ಮೈಸೂರಿನಲ್ಲಿಯೇ ಇರುವ ಪ್ರಸಿದ್ಧ ಸಾಹಿತಿ ಎಸ್‌. ಎಲ್‌. ಭೈರಪ್ಪ ಅವರನ್ನು ಸೌಜನ್ಯಕ್ಕಾಗಿಯಾದರೂ ಕರೆಯದೆ ಇರುವುದೆಲ್ಲ ಸಾಹಿತ್ಯಕ್ಕಿಂತಲೂ ಹೆಚ್ಚು ಚರ್ಚೆಗೆ ಕಾರಣವಾದ ವಿಷಯಗಳು. ಸಾಹಿತ್ಯ ಸಮ್ಮೇಳನದಲ್ಲಿ ರಾಜಕೀಯ ಹಸ್ತಕ್ಷೇಪ ಅಗತ್ಯಕ್ಕಿಂತ ಹೆಚ್ಚಾಗಿರುವುದೇ ವಿವಾದಗಳು ಹೆಚ್ಚಾಗಲು ಕಾರಣ. ಅದರಲ್ಲೂ ಕಳೆದ ಮೂರ್‍ನಾಲು ವರ್ಷಗಳಲ್ಲಿ ಒಂದು ನಿರ್ದಿಷ್ಟ ವಾದವನ್ನು ಎತ್ತಿಹಿಡಿಯುವ ಸಾಹಿತಿಗಳನ್ನೇ ಅಧ್ಯಕ್ಷರನ್ನಾಗಿ ಆಯ್ಕೆ ಮಾಡುತ್ತಿರುವುದರ ಹಿಂದೆ ರಾಜಕೀಯ ಹುನ್ನಾರಗಳಿಲ್ಲ ಎಂದರೆ ನಂಬುವುದು ಕಷ್ಟವಾಗುತ್ತದೆ.

ಹೀಗಾಗಿ ನಾಡಿನ ನುಡಿ, ಜಲ, ನೆಲ, ಸಂಸ್ಕೃತಿ, ಪರಂಪರೆ ಮತ್ತಿತರ ವಿಚಾರಗಳ ಕುರಿತು ಚರ್ಚೆಯಾಗಬೇಕಾದಲ್ಲಿ ರಾಜಕೀಯ ಸಿದ್ಧಾಂತಗಳ ಕುರಿತು ಚರ್ಚೆಯಾಗುತ್ತಿದೆ. ಸಾಹಿತ್ಯದ ವೇದಿಕೆಯಲ್ಲಿ ರಾಜಕೀಯದ ಕುರಿತು ಚರ್ಚೆಯಾಗಬಾರದು ಎಂದಲ್ಲ. ಆದರೆ ಆ ಚರ್ಚೆ ಒಂದು ನಿರ್ದಿಷ್ಟ ರಾಜಕೀಯ ಸಿದ್ಧಾಂತವನ್ನು ಸಮರ್ಥಿಸುವ  ಮೂಲಕ ಆ ಸಿದ್ಧಾಂತವನ್ನು ಪ್ರತಿಪಾದಿಸುವ ರಾಜಕೀಯ ಪಕ್ಷದ ಪರವಾಗಿ ನಡೆಯುತ್ತಿರುವ ಚರ್ಚೆಯಂತೆ ಕಂಡು ಬಂದರೆ ಅದನ್ನು ಸಾಹಿತ್ಯದ ಕುರಿತಾದ ಚರ್ಚೆ ಎನ್ನುವಂತಿಲ್ಲ. ಮೈಸೂರಿನಲ್ಲಿ ಪ್ರಸ್ತುತ ನಡೆದಿರುವುದು  ಇದೇ ಎಡವಟ್ಟು. ಡಾ| ಚಂಪಾ ಅವರು ಜಾತ್ಯಾತೀತ ಪಕ್ಷಗಳಿಗೆ ಮತ ಹಾಕಿ ಎಂದು ಅಪ್ಪಟ ಚುನಾವಣಾ ಪ್ರಚಾರ ಭಾಷಣದಲ್ಲಿ ಕರೆಕೊಟ್ಟ ರೀತಿ ಹೇಳಿದಾಗ ಅವರು ಯಾರ ಪರವಾಗಿ ಮಾತನಾಡಿದ್ದಾರೆ ಎನ್ನುವುದನ್ನು ತಿಳಿಯಲು ಅಪಾರ ರಾಜಕೀಯ ಅಥವ ಸಾಹಿತ್ಯಕ ಪಾಂಡಿತ್ಯದ ಆಗ್ಯವಿಲ್ಲ. ಇದೇ ವೇದಿಕೆಯಲ್ಲಿ ಅವರು ಸರಕಾರದ ಸಚಿವರೊಬ್ಬರ ಖಾತೆ ಬದಲಾಯಿಸಬೇಕೆಂಬ ಸಲಹೆಯನ್ನೂ ಕೊಟ್ಟಿದ್ದಾರೆ.

ಸಚಿವರ ಖಾತೆ ಬದಲಾವಣೆ ಮುಖ್ಯಮಂತ್ರಿಯ ಅಧಿಕಾರಕ್ಕೆ ಬಿಟ್ಟ ವಿಚಾರ. ಹಾಗೊಂದು ವೇಳೆ ಡಾ|ಚಂಪಾ ಅವರಿಗೆ ಸಚಿವರ ಕಾರ್ಯಶೈಲಿಯ ಬಗ್ಗೆ ಅಸಮಾಧಾನವಿದ್ದರೆ ಅದನ್ನು ನೇರವಾಗಿ ಮುಖ್ಯಮಂತ್ರಿಯ ಬಳಿ ಹೇಳಬಹುದಿತ್ತೆ ಹೊರತು ವಿಪಕ್ಷ ನಾಯಕರಂತೆ ಸಾರ್ವಜನಿಕ ವೇದಿಕೆಯಲ್ಲಿ ಖಾತೆ ಬದಲಾಯಿಸಿ, ರಾಜೀನಾಮೆ ಪಡೆಯಿರಿ ಎಂದೆಲ್ಲ ಹೇಳುವುದು ರಾಜಕೀಯಕ್ಕಾದರೆ ಸರಿ, ಸಾಹಿತ್ಯಕ್ಕೆ ಸರಿಯಾಗುವುದಿಲ್ಲ. ಸಾಹಿತ್ಯ ಸಮ್ಮೇಳನ ನಡೆಸಲು ಸರಕಾರ ಕೋಟಿಗಟ್ಟಲೆ ಅನುದಾನ ನೀಡುತ್ತಿದೆ ಎನ್ನುವುದು ಸರಿ. ಹಾಗೆಂದು ಈ ಅನುದಾನದ ಋಣಕ್ಕೆ ಬಿದ್ದು ಸರಕಾರವನ್ನು ಖುಷಿಪಡಿಸುವಂತಹ ಮಾತುಗಳನ್ನೇ ಹೇಳಬೇಕೆಂದು ಸಾಹಿತಿಗಳೇ ಭಾವಿಸಿದರೆ ಇನ್ನು ಏನು ಗತಿ? ಡಾ| ಚಂಪಾ ಪ್ರಧಾನಿ ಮೋದಿಯನ್ನೂ ಸಮ್ಮೇಳನದ ವೇದಿಕೆಯಲ್ಲಿ ಟೀಕಿಸಿದ್ದಾರೆ.

ಸರಕಾರಿ ಕೃಪಾಕಟಾಕ್ಷದಲ್ಲಿ ನಡೆಯುತ್ತಿರುವ ಸಾಹಿತ್ಯ ಸಮ್ಮೇಳನದಲ್ಲಿ ಮೋದಿಯನ್ನು ಮತ್ತು ಅವರ ಪಕ್ಷವನ್ನು ಹಾಗೂ ಅದರ ಮಾತೃಸಂಘಟನೆಯನ್ನು ತೆಗಳುವ ಕಾರ್ಯ ಕ್ರಮಗಳು ಇರಬಹುದು ಎನ್ನುವುದನ್ನು ಮೊದಲೇ ನಿರೀಕ್ಷೆಸಿದ್ದೆವು. ಆದರೆ ಅದು ಈ ಮಟ್ಟಕ್ಕೆ ಇಳಿದು ಬರೀ ರಾಜಕೀಯ ಸಮ್ಮೇಳನವಾಗುತ್ತದೆ ಎಂದು ಭಾವಿಸಿರಲಿಲ್ಲ. ಸರಕಾರ ಕೊಡುವುದು ಜನರ ತೆರಿಗೆಯ ಹಣವನ್ನು. ಈ ಹಣದಲ್ಲಿ ನಡೆಯುವ ಜಾತ್ರೆ ಕನ್ನಡಿಗರ ಸಾಹಿತ್ಯ ಜಾತ್ರೆಯೇ ಹಒರತು, ಸರಕಾರದ ಕಾರ್ಯಕ್ರಮವಲ್ಲ. ಈ ಮಾತನ್ನು ಸಾಹಿತಗಳಿಗೆ ಯಾರೂ ವಿವರಿಸಿ ಹೇಳಬೇಕಾದ ಅಗತ್ಯವಿಲ್ಲ. ಆದರೂ ಏಕೋ ಕೆಲವು ಸಾಹಿತಿಗಳು ಸರಕಾರದ ಅನ್ನದ ಋಣಕ್ಕೆ ಬಿದ್ದವರಂತೆ ವರ್ತಿಸುವುದನ್ನು ನೋಡುವಾಗ ಖೇದವಾಗುತ್ತದೆ.

ಕನ್ನಡಿಗರಿಗೆ ಯಾವುದೇ ರೀತಿಯಲ್ಲಿ ಪ್ರಯೋಜನ ವಿಲ್ಲದ ಯಾವುದೋ ಒಂದು ರಾಜಕೀಯ ಸಿದ್ಧಾಂತವನ್ನು ಅಥವ ನಾಯಕರನ್ನು ಟೀಕಿಸಲು ಸಾಹಿತ್ಯ ಸಮ್ಮೇಳನದ ವೇದಿಕೆಯನ್ನು ಬಳಸಿ ಕೊಳ್ಳುವುದು ಜನರ ತೆರಿಗೆ ಹಣವನ್ನು ಪೋಲು ಮಾಡಿದಂತೆ. ಹಾಗೇ ನೋಡಿದರೆ ಸಾಹಿತ್ಯ ಸಮ್ಮೇಳನದಲ್ಲಿ ಚರ್ಚಿಸಲು ಕನ್ನಡ ನಾಡು ಎದುರಿಸುತ್ತಿರುವ ಶಿಕ್ಷಣ, ಉದ್ಯೋಗ, ಕೃಷಿ ಸೇರಿದಂತೆ ಹಲವು ಜ್ವಲಂತ ಸಮಸ್ಯೆಗಳಿದ್ದವು. ಇವುಗಳ ಕುರಿತು ಯಾವ ಗಂಭೀರ ಚರ್ಚೆಯೂ ನಡೆಯದೆ ಬರೀ ರಾಜಕೀಯ ಚರ್ಚಿಸಿದ ಕಾರಣ ಮೈಸೂರು ಸಾಹಿತ್ಯ ಸಮ್ಮೇಳನ ವಿವಾದದ ಸಮ್ಮೇಳನವಾಗಿ ಹೆಚ್ಚು ಕಾಲ ನೆನಪಿನಲ್ಲಿ ಉಳಿಯಲಿದೆ ಎಂದಷ್ಟೇ ಇದರಿಂದ ಆಗಿರುವ ಸಾಧನೆ.