ಸುಲಭದ ಸಾಲಕ್ಕಾಗಿ ವಂಚನೆಯ ಬಲೆಗೆ ಬೀಳದಿರಿ

Team Udayavani, Aug 22, 2022, 6:00 AM IST

ಚೀನದ ಸುಲಭ ಸಾಲದ ವಂಚನೆಯ ಜಾಲಕ್ಕೆ ಬೀಳಬೇಡಿ ಎಂದು ಪದೇ ಪದೆ ಜನರಿಗೆ ಜಾಗೃತಿ ಮೂಡಿಸುತ್ತಿದ್ದರೂ, ಇದು ಕಡಿಮೆ ಯಾಗದೇ ಇರುವುದು ದುರದೃಷ್ಟಕರ ಸಂಗತಿ. ಇಂದಿಗೂ, ಚೀನ ಲೋನ್‌ ಆ್ಯಪ್‌ ಗಳ ಹಾವಳಿ ಮುಂದುವರಿದಿದ್ದು, ಲಕ್ಷಾಂತರ ಭಾರತೀ ಯರು ಸಾವಿರಾರು ರೂಪಾಯಿ ಕಳೆದುಕೊಳ್ಳುತ್ತಿದ್ದಾರೆ. ಅಷ್ಟೇ ಅಲ್ಲ, ಈ ಬಲೆಯೊಳಗೆ ಸಿಲುಕಿದ ನೂರಾರು ಮಂದಿ ತಮ್ಮ ಖಾಸಗೀತನವನ್ನೂ ಕಳೆದುಕೊಂಡಿದ್ದಾರೆ.

ಸುಲಭವಾಗಿ ಸಾಲ ನೀಡುವ ಆ್ಯಪ್‌ಗ್ಳ ಕುರಿತಂತೆ ಬಲವಾಗಿ ಯೋಚಿಸಬೇಕಾದ ಅನಿವಾರ್ಯ ಇದೆ. ಕೇಂದ್ರ ಸರಕಾರ ಮತ್ತು ಭಾರತೀಯ ರಿಸರ್ವ್‌ ಬ್ಯಾಂಕ್‌ ಮಾತ್ರ ಈ ಬಗ್ಗೆ ಯೋಚಿಸಲಿ ಎಂದು ಬಿಟ್ಟರೆ ಕೆಲಸವಾಗದು. ಈ ವಿಚಾರದಲ್ಲಿ ಜನರೂ ಕೈಜೋಡಿಸಬೇಕಾದ ಅಗತ್ಯ ಇದೆ. ಏಕೆಂದರೆ, ಎಲ್ಲಿವರೆಗೆ ಮೋಸ ಹೋಗುವವರು ಇರುತ್ತಾರೆಯೋ, ಅಲ್ಲಿವರೆಗೆ ಮೋಸ ಮಾಡುವವರು ಇರುತ್ತಾರೆ ಎಂಬುದನ್ನು ಮರೆಯಬಾರದು.

ಈ ಆ್ಯಪ್‌ ಸಾಲದ ಮೋಡಿ ಹೆಚ್ಚಾಗಿದ್ದು ಕೊರೊನಾ ಸಾಂಕ್ರಾಮಿಕ ಬಂದು, ಜನರ ಆರ್ಥಿಕತೆಯನ್ನು ಹಾಳುಗೆಡವಿದ ಮೇಲೆಯೇ. ಅದಕ್ಕೂ ಮುನ್ನ ಇದ್ದವಾದರೂ, ಕೆಲವೇ ಕೆಲವು ಮಾತ್ರ ಕಾರ್ಯ ನಿರ್ವಹಿ­ಸು­ತ್ತಿದ್ದವು. ಇವುಗಳಿಗೆ ಆರ್‌ಬಿಐನ ಸಂಕೋಲೆಯೂ ಇದ್ದುದರಿಂದ ಸುಲಭವಾಗಿ ಕಾರ್ಯ ನಿರ್ವಹಣೆ ಮಾಡಲು ಸಾಧ್ಯವಿರಲಿಲ್ಲ.

ಆದರೆ, ಕೊರೊನೋತ್ತರದಲ್ಲಿ ಜನರ ಕೈನಲ್ಲಿ ಹಣ ಕಡಿಮೆಯಾಗಿ, ಅವರ ಆರ್ಥಿಕ ಸ್ಥಿತಿ ಏರುಪೇರಾದ ಮೇಲೆ ಹಣಕ್ಕಾಗಿ ಬಹಳಷ್ಟು ಮಂದಿ ಇಂಥ ಸುಲಭ ಸಾಲದ ಆ್ಯಪ್‌ ಗಳ ಮೊರೆ ಹೋಗಿದ್ದಾರೆ. ಒಮ್ಮೆ ಗೂಗಲ್‌ ಪ್ಲೇ ಸ್ಟೋರ್‌ ಅಥವಾ ಆ್ಯಪಲ್‌ ಪ್ಲೇ ಸ್ಟೋರ್‌ಗಳಿಗೆ ಹೋಗಿ ಸರ್ಚ್‌ ಮಾಡಿದರೆ, ಇಂಥ ಸಾವಿರಾರು ಆ್ಯಪ್‌ಗಳು ಕಾಣ ಸಿಗುತ್ತವೆ. ಇವುಗಳಲ್ಲಿ ನಿಜವಾಗಿಯೂ, ಯಾವುದೇ ಮೋಸವಿಲ್ಲದೇ ಸಾಲ ನೀಡುವ ಆ್ಯಪ್‌ ಯಾವುದು? ಚೀನದಿಂದ ಹಣ ಪೂರೈಕೆಯಾಗಿ ಕಾರ್ಯ ನಿರ್ವಹಿಸುವ ಆ್ಯಪ್‌ ಗಳು ಯಾವುವು ಎಂಬುದನ್ನು ತಿಳಿಯು­ವುದೇ ಕಷ್ಟಕರ ಸನ್ನಿವೇಶದಂತಾಗಿದೆ. ಈ ನಿಟ್ಟಿನಲ್ಲಿ ಕೇಂದ್ರ ಮತ್ತು ಆರ್‌ಬಿಐ ಒಟ್ಟಿಗೆ ಸೇರಿಕೊಂಡು ಇಂಥ ಆ್ಯಪ್‌ ಗಳ ನಿಯಂತ್ರಣಕ್ಕಾಗಿ ತುರ್ತು ಗಮನ ನೀಡಬೇಕಾದದ್ದು ಅತ್ಯವಶ್ಯಕವಾಗಿದೆ.

ರವಿವಾರವೂ ಸುಮಾರು 500 ಕೋಟಿ ರೂ.ಗಳಷ್ಟು ಅವ್ಯವಹಾರದ ಹಗರಣ ಬೆಳಕಿಗೆ ಬಂದಿದೆ. ಪತ್ರಿಕಾ ವರದಿಗಳ ಪ್ರಕಾರ, ಸದ್ಯ ದೇಶದಲ್ಲಿ ಶೇ.54ರಷ್ಟು ಸಾಲ ನೀಡುವ ಆ್ಯಪ್‌ ಗಳು ಅಕ್ರಮವಾಗಿ ಕಾರ್ಯ ನಿರ್ವಹಿಸುತ್ತಿವೆ. ಜತೆಗೆ, ಭಾರತದಲ್ಲಿ ಮೊಬೈಲ್‌ ಬ್ಯಾಂಕಿಂಗ್‌ ಆರಂಭವಾದ ಮೇಲೆ ಇಂಥ ಪ್ರಕರಣಗಳು ಹೆಚ್ಚಾಗಿವೆ ಎಂಬ ಮಾಹಿತಿಯೂ ಇದೆ.

ಮೊದಲೇ ಹೇಳಿದ ಹಾಗೆ, ಅಕ್ರಮ ಆ್ಯಪ್‌ ಗಳ ಬೆನ್ನುಮೂಳೆ ಮುರಿಯಲು ಸಾಧ್ಯವಿರುವುದು ಜನರಿಗೇ. ಸುಲಭವಾಗಿ, ಥಟ್‌ ಅಂತ ಸಾಲ ಕೊಡುತ್ತೇವೆ ಎಂದು ಹೇಳುವವರನ್ನು ನಂಬಲು ಹೋಗಬಾರದು. ಕಡಿಮೆ ದಾಖಲೆಗಳನ್ನು ಪಡೆದುಕೊಂಡು ಸಾಲ ಕೊಡುತ್ತಾರೆ ಎಂದಾದರೆ, ಅವರು ವಸೂಲಿಗೆ ಅಡ್ಡ ಮಾರ್ಗ ಹಿಡಿದೇ ಹಿಡಿಯುತ್ತಾರೆ. ಇಂಥವರ ಕುರಿತಂತೆ ಎಚ್ಚರದಿಂದ ಇರಬೇಕು. ಸಾಧ್ಯವಾದರೆ, ಆರ್‌ಬಿಐನ ಕೆಳಗೆ ಬರುವಂಥ ಹಣಕಾಸು ಸಂಸ್ಥೆಗಳಿಂದ ಸಾಲ ಪಡೆಯಲು ನೋಡುವುದು ಸೂಕ್ತ.