ಪರಿಣಾಮಕಾರಿ ಅನುಷ್ಠಾನ ಮುಖ್ಯ

Team Udayavani, Feb 25, 2020, 6:11 AM IST

ಪ್ರಸ್ತುತ 18 ವರ್ಷ ಪ್ರಾಯವಾದವರು ಸಿಗರೇಟು ಅಥವಾ ಬೇರೆ ಯಾವುದೇ ತಂಬಾಕು ಉತ್ಪನ್ನಗಳನ್ನು ಅಂಗಡಿಯಿಂದ ಖರೀದಿಸಿ ಸೇವಿಸಬಹುದು. ಈ ವಯೋಮಿತಿಯನ್ನು 21 ವರ್ಷಕ್ಕೇರಿಸಿ ಯುವಕರ ಕೈಗೆ ತಂಬಾಕು ಉತ್ಪನ್ನಗಳು ಸಿಗದಂತೆ ಮಾಡುವ ಪ್ರಸ್ತಾವ ಇದು.

ತಂಬಾಕು ಸೇವನೆ ವಯೋಮಿತಿಯನ್ನು 18ರಿಂದ 21 ವರ್ಷಕ್ಕೆ ಹೆಚ್ಚಿಸುವ ಕುರಿತು, ಅಂತೆಯೇ ತಂಬಾಕು ನಿಯಮಗಳನ್ನು ಉಲ್ಲಂ ಸುವವರಿಗೆ ವಿಧಿಸುವ ದಂಡದ ಮೊತ್ತಗಳನ್ನು ಹೆಚ್ಚಿಸುವ ಪ್ರಸ್ತಾವವೊಂದು ಆರೋಗ್ಯ ಸಚಿವಾಲಯದ ಪರಿಶೀಲನೆಯಲ್ಲಿದೆ. ಪ್ರಸ್ತುತ 18 ವರ್ಷ ಪ್ರಾಯವಾದವರು ಸಿಗರೇಟು ಅಥವಾ ಬೇರೆ ಯಾವುದೇ ತಂಬಾಕು ಉತ್ಪನ್ನಗಳನ್ನು ಅಂಗಡಿಯಿಂದ ಖರೀದಿಸಿ ಸೇವಿಸಬಹುದು. ಈ ವಯೋಮಿತಿಯನ್ನು 21 ವರ್ಷಕ್ಕೇರಿಸಿ ಯುವಕರ ಕೈಗೆ ತಂಬಾಕು ಉತ್ಪನ್ನಗಳು ಸಿಗದಂತೆ ಮಾಡುವ ಕಾನೂನು ಇದು. ಅಮೆರಿಕದಂಥ ಮುಂದುವರಿದ ಕೆಲವು ರಾಷ್ಟ್ರಗಳಲ್ಲಿ ತಂಬಾಕು ಸೇವನೆ ವಯೋಮಿತಿ 21ಕ್ಕೇರಿ ದಶಕಗಳೇ ಕಳೆದಿವೆ. ನಾವು ಈಗಷ್ಟೇ ಈ ಕುರಿತು ಚಿಂತಿಸಲುತೊಡಗಿದ್ದೇವೆ.

ದೇಶದಲ್ಲೀಗ ಸುಮಾರು 10 ಕೋಟಿ ಧೂಮಪಾನಿಗಳು ಇದ್ದಾರೆ ಎಂಬುದು ಒಂದು ಅಂದಾಜು. ಗುಟ್ಕಾ, ಜರ್ದಾದಂಥ ಇನ್ನಿತರ ತಂಬಾಕು ಉತ್ಪನ್ನಗಳನ್ನು ಬಳಸುವವರ ಅಂಕಿಅಂಶ ಬೇರೆಯೇ ಇದೆ. ಚೀನದ ಬಳಿಕ ಅತಿ ಹೆಚ್ಚು ಧೂಮಪಾನಿಗಳಿರುವ ದೇಶ ನಮ್ಮದು. ತಂಬಾಕು ವ್ಯಸನದಿಂದ ಬರುವ ಕ್ಯಾನ್ಸರ್‌ನಂಥ ರೋಗಗಳಲ್ಲೂ ದೇಶ ಅಗ್ರಸ್ಥಾನದಲ್ಲಿದೆ. ಆದರೆ ತಂಬಾಕು ಬಳಕೆಗೆ ಸಂಬಂಧಿಸಿದಂತೆ ಸರಕಾರದ ನೀತಿಯಲ್ಲೇ ವೈರುಧéಗಳಿವೆ. ಒಂದೆಡೆ ಸರಕಾರ ಜನರ ಆರೋಗ್ಯ ಮಟ್ಟವನ್ನು ಹೆಚ್ಚಿಸುವ ಸಲುವಾಗಿ ಪ್ರತಿ ಬಜೆಟ್‌ನಲ್ಲಿ ಅನುದಾನದ ಮೊತ್ತವನ್ನು ಹೆಚ್ಚಿಸುತ್ತಿದೆ. ಆದರೆ ಇದೇ ವೇಳೆ ರೋಗಗಳಿಗೆ ಕಾರಣವಾಗುವ ತಂಬಾಕು, ಮದ್ಯಪಾನದಂಥ ವ್ಯಸನಗಳಿಗೆ ಜನರು ಬಲಿಯಾಗದಂತೆ ತಡೆಯಲು ಸಮಗ್ರ ನೀತಿಗಳನ್ನು ಜಾರಿಗೊಳಿಸುವುದಿಲ್ಲ. ತಂಬಾಕಿಗೆ ಸಂಬಂಧಿಸಿದಂತೆ ಅನೇಕ ಕಾನೂನುಗಳು ಇದ್ದರೂ ವ್ಯಸನ ಹಿಂದಿನಂತೆಯೇ ಮುಂದುವರಿದಿದೆ. ತಂಬಾಕು ಆರೋಗ್ಯಕ್ಕೆ ಹಾನಿಕರ ಎಂದು ಗೊತ್ತಿದ್ದರೂ ಅದನ್ನು ಸಂಪೂರ್ಣವಾಗಿ ನಿಷೇಧಿಸುವ ದಿಟ್ಟತನ ಸರಕಾರಕ್ಕಿಲ್ಲ. ಏಕೆಂದರೆ ಇದು ಹಲವು ಆರ್ಥಿಕ ಆಯಾಮಗಳನ್ನು ಒಳಗೊಂಡಿರುವ ಜಟಿಲ ವಿಚಾರ. ಹೀಗಾಗಿ ಹೊಸ ಹೊಸ ಕಾನೂನುಗಳನ್ನು ರಚಿಸುವ ಮೂಲಕ ತಂಬಾಕು ಬಳಕೆಯನ್ನು ಕಡಿಮೆ ಮಾಡುವ ಪ್ರಯತ್ನವನ್ನಷ್ಟೇ ಮಾಡುತ್ತಿದೆ.

ಶಾಲಾ ಕಾಲೇಜು ಸಮೀಪ ತಂಬಾಕು ಉತ್ಪನ್ನಗಳನ್ನು ಮಾರಾಟ ಮಾಡಬಾರದು, 18ಕ್ಕಿಂತ ಕಡಿಮೆ ವಯಸ್ಸಿನವರಿಗೆ ತಂಬಾಕು ಉತ್ಪನ್ನಗಳನ್ನು ಮಾರಬಾರದು ಎಂಬೆಲ್ಲ ಕಾನೂನುಗಳು ಇವೆ. ಆದರೆ ಅವುಗಳು ಎಷ್ಟರಮಟ್ಟಿಗೆ ಪಾಲನೆಯಾಗುತ್ತಿವೆ ಎಂಬ ವಾಸ್ತವ ಆಳುವವರಿಗೆ ತಿಳಿದಿಲ್ಲ.ತಂಬಾಕು ಚಟ ಹೊಂದಿರುವ ಈಗಿನ ಪೀಳಿಗೆ ಶಾಲಾ-ಕಾಲೇಜುಗಳಲ್ಲಿ ಇರುವಾಗಲೇ ಸಿಗರೇಟು ಹಾಗೂ ಇನ್ನಿತರ ತಂಬಾಕು ಉತ್ಪನ್ನಗಳ ರುಚಿ ನೋಡಿರುತ್ತದೆ ಎನ್ನುತ್ತದೆ ಒಂದು ಸಮೀಕ್ಷೆ. ಕಾನೂನು ಎಷ್ಟು ಪರಿಣಾಮಕಾರಿಯಾಗಿ ಅನುಷ್ಠಾನವಾಗುತ್ತಿದೆ ಎಂಬುದಕ್ಕೆ ಈ ಸಮೀಕ್ಷೆಯಲ್ಲಿ ಉತ್ತರವಿದೆ. ಚಿಲ್ಲರೆ ಸಿಗರೇಟುಗಳನ್ನು ಮಾರಬಾರದು ಎಂಬ ಕಾನೂನಿನದ್ದೂ ಇದೇ ಕತೆ.

ಯುವ ಜನರು ತಂಬಾಕು ಉತ್ಪನ್ನಗಳತ್ತ ಆಕರ್ಷಿತರಾಗುವುದು ಸೆಲೆಬ್ರಿಟಿಗಳನ್ನು ನೋಡಿ. ಈ ಹಿನ್ನೆಲೆಯಲ್ಲಿ ಮುದ್ರಣ ಹಾಗೂ ದೃಶ್ಯ ಮಾಧ್ಯಮಗಳಲ್ಲಿ ತಂಬಾಕು ಜಾಹೀರಾತುಗಳನ್ನು ಪ್ರಸಾರ ಮಾಡುವುದನ್ನು ನಿಷೇಧಿಸಲಾಗಿದೆ. ಸಿನೇಮಾ ಪ್ರಾರಂಭವಾಗುವ ಮೊದಲು ಕಡ್ಡಾಯವಾಗಿ ತಂಬಾಕು ಸೇವನೆಯ ಘೋರ ಪರಿಣಾಮಗಳನ್ನು ತಿಳಿಸುವ ಕಿರುಚಿತ್ರವೊಂದನ್ನು ತೋರಿಸಲಾಗುತ್ತದೆ. ವಿಚಿತ್ರ ಎಂದರೆ ಈ ಕಿರುಚಿತ್ರವನ್ನು ನೋಡಿದವರೇ ಇಂಟರ್‌ವಲ್‌ನಲ್ಲಿ ಹೊರಗೆ ಬಂದು ಸಿಗರೇಟು ಸೇದುತ್ತಾರೆ. ಸಿಗರೇಟು ಸೇದುವುದು ಸ್ಟೈಲ್‌ ಎಂಬಂಥ ಒಂದು ರೀತಿಯ ಭ್ರಮೆಯೇ ಯುವ ಜನರು ಅದರತ್ತ ಹೆಚ್ಚು ಆಕರ್ಷಿತರಾಗಲು ಕಾರಣ. ಇಂಥ ಭ್ರಮೆಗಳನ್ನು ನಿವಾರಿಸುವ ನಿಟ್ಟಿನಲ್ಲಿ ಸರಕಾರಗಳು ಹೆಚ್ಚಿನ ಗಮನ ಹರಿಸಬೇಕಾಗಿದೆ. ತಂಬಾಕಿಗೆ ಸಂಬಂಧಪಟ್ಟ ಕೆಲವು ಕಾನೂನುಗಳ ಬಗ್ಗೆ ಜನಸಾಮಾನ್ಯರಿಗೆ ಅರಿವು ಕೂಡ ಇಲ್ಲ. ಉದಾಹರಣೆಗೆ ಹೇಳುವುದಾದರೆ ಸಾರ್ವಜನಿಕ ಸ್ಥಳಗಳಲ್ಲಿ ತಂಬಾಕು ಉತ್ಪನ್ನಗಳನ್ನು ಸೇವಿಸಬಾರದು ಎಂಬ ಕಾನೂನು ಇದೆ ಎನ್ನುವುದು ಅನೇಕರಿಗೆ ಗೊತ್ತೇ ಇಲ್ಲ.

ಗುಟ್ಕಾದಂಥ ಕೆಲವು ತಂಬಾಕು ಉತ್ಪನ್ನಗಳನ್ನು ನಿಷೇಧಿಸಿದರೂ ಉತ್ಪಾದಕರು ಅವುಗಳನ್ನು ಜನರಿಗೆ ತಲುಪಿಸಲು ರಂಗೋಲಿ ಕೆಳಗೆ ತೂರುವ ತಂತ್ರ ಅನುಸರಿಸುತ್ತಿದ್ದಾರೆ. ಅಂತೆಯೇ ಸಿಗರೇಟು ಕಂಪೆನಿಗಳು ಜಾಹೀರಾತಿನ ಬದಲಾಗಿ ತಮ್ಮ ಬ್ರಾಂಡ್‌ಗಳ ಪರಿವರ್ತನೆಗೆ ಇನ್ನಿತರ ಹಾದಿಗಳನ್ನು ಕಂಡುಕೊಂಡಿವೆ. ಹೀಗಾಗಿ ಎಷ್ಟೇ ನಿಷೇಧಗಳನ್ನು ಹೇರಿದರೂ ಅವುಗಳು ಜನರನ್ನು ತಲುಪುತ್ತವೆ. ಇನ್ನೂ ಒಂದು ವಿಪರ್ಯಾಸ ಎಂದರೆ ಜನರಿಗೆ ಸಿಗರೇಟು ಸೇದಬೇಡಿ ಎಂದು ತಿಳಿ ಹೇಳಬೇಕಾದ ವೈದ್ಯರಲ್ಲೇ ಶೇ. 50 ಮಂದಿ ಧೂಮಪಾನ ಪ್ರಿಯರು. ಹೀಗೆ ತಂಬಾಕಿಗೆ ಸಂಬಂಧಪಟ್ಟಂತೆ ನಮ್ಮಲ್ಲಿ ವೈರುಧéಗಳೇ ಹೆಚ್ಚಾಗಿವೆ. ಈ ಹಿನ್ನೆಲೆಯಲ್ಲಿ ಹೇಳುವುದಾದರೆ ಕಾನೂನು ರಚಿಸಿದರಷ್ಟೇ ಸಾಲದು ಅದು ಪರಿಣಾಮಕಾರಿಯಾಗಿ ಅನುಷ್ಠಾನವಾಗುವಂತೆ ನೋಡಿಕೊಳ್ಳಬೇಕು. ಜೊತೆಗೆ ತಂಬಾಕಿನ ಬಗ್ಗೆ ಇರುವ ಸಾಮಾಜಿಕವಾದ ಮತ್ತು ಆರ್ಥಿಕವಾದ ಭ್ರಮೆಗಳನ್ನು ದೂರ ಮಾಡುವಂಥ ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳಬೇಕು.