ಕಸ್ತೂರಿರಂಗನ್‌ ವರದಿ ; ಜಾರಿ ಹಂತದಲ್ಲಿ ನಮ್ಯತೆ ಇರಲಿ

Team Udayavani, Dec 10, 2020, 6:14 AM IST

ಸಾಂದರ್ಭಿಕ ಚಿತ್ರ

ಕಸ್ತೂರಿರಂಗನ್‌ ವರದಿಗೆ ಅಂತಿಮ ರೂಪ ನೀಡಲು ಹಸುರು ಪೀಠ (ಎನ್‌ಜಿಟಿ)ಯು ಕೇಂದ್ರ ಸರಕಾರಕ್ಕೆ ನೀಡಿರುವ ಗಡುವು ಹತ್ತಿರವಾಗುತ್ತಿದೆ. 2020ರ ಡಿ. 31ರೊಳಗೆ ವರದಿಯನ್ನು ಅನುಷ್ಠಾನಿಸುವಂತೆ ಹಸುರು ಪೀಠ ಸೂಚಿಸಿರುವುದರಿಂದ ಕರ್ನಾಟಕ ಸಹಿತ ಪಶ್ಚಿಮ ಘಟ್ಟ ಸಾಲು ಹಾದುಹೋಗುವ ರಾಜ್ಯಗಳು ತಮ್ಮ ಪ್ರತಿಕ್ರಿಯೆಯನ್ನು ಕೇಂದ್ರಕ್ಕೆ ಸಲ್ಲಿಸಲೇ ಬೇಕಿದೆ. ಇದು ಕಾನೂನು ಮತ್ತು ಸಂವಿಧಾನಾತ್ಮಕವಾಗಿರುವ ಅನಿವಾರ್ಯ. ಹಾಗೆಯೇ ಜಗತ್ತಿನ ಎಂಟು ಜೈವಿಕ ಹಾಟ್‌ಸ್ಪಾಟ್‌ಗಳಲ್ಲಿ ಒಂದಾಗಿರುವ ಮತ್ತು ಅಪರೂಪದ ಜೀವವೈವಿಧ್ಯ ತಾಣ ಎಂದು ಯುನೆಸ್ಕೊದಿಂದ ಮಾನ್ಯತೆ ಪಡೆದಿರುವ ಪಶ್ಚಿಮ ಘಟ್ಟಗಳ ಸಂರಕ್ಷಣೆಯೂ ಒಂದು ಅನಿವಾರ್ಯವೇ.

ಮೊತ್ತಮೊದಲಾಗಿ ನಾವು ಅರ್ಥ ಮಾಡಿಕೊಳ್ಳಬೇಕಾಗಿರುವುದು ಎಂದರೆ, ಕಸ್ತೂರಿ ರಂಗನ್‌ ವರದಿಯು ಪಶ್ಚಿಮ ಘಟ್ಟಗಳ ಸಂರಕ್ಷಣೆಯ ಉದ್ದೇಶದಿಂದ ರಚನೆಯಾ ಗಿರುವಂಥದ್ದು; ಜನರಿಗೆ ತೊಂದರೆಯಾಗಬೇಕು ಎಂಬ ಉದ್ದೇಶ ಅದರದ್ದಲ್ಲ. ಹೀಗಾಗಿ ಅದರ ಜಾರಿಯ ಸಂದರ್ಭದಲ್ಲಿ ಪಶ್ಚಿಮ ಘಟ್ಟಗಳ ವ್ಯಾಪ್ತಿಯಲ್ಲಿ, ತಪ್ಪಲು ಪ್ರದೇಶಗಳಲ್ಲಿ ತಲೆಮಾರುಗಳಿಂದ ವಾಸಿಸುತ್ತಿರುವ ಜನರ ಜೀವನಕ್ಕೆ ಯಾವುದೇ ಅಡಚಣೆಯಾಗಬಾರದು ಎಂಬುದು ಸರಿಯಾದ ನಿಲುವು. ಕಸ್ತೂರಿರಂಗನ್‌ ವರದಿಯು ಪಶ್ಚಿಮ ಘಟ್ಟ ಶ್ರೇಣಿಯ ಶೇ. 37 ಭಾಗವನ್ನು ಪರಿಸರ ಸೂಕ್ಷ್ಮ ವಲಯದಡಿಗೆ ತರಲು ಶಿಫಾರಸು ಮಾಡಿದೆ. ಇದರಡಿ ಕರ್ನಾಟಕ, ಕೇರಳ, ಗೋವಾ ಸಹಿತ ಪಶ್ಚಿಮ ಘಟ್ಟ ಶ್ರೇಣಿ ವ್ಯಾಪಿಸಿರುವ ರಾಜ್ಯಗಳ 60 ಸಾವಿರ ಚ. ಕಿ.ಮೀ. ಪ್ರದೇಶದಲ್ಲಿ ಅಭಿವೃದ್ಧಿ ಚಟುವಟಿಕೆ ಗಳು ತಡೆಹಿಡಿಯಲ್ಪಡುತ್ತವೆ. ವರದಿ ಜಾರಿಯ ಸಂಬಂಧ ರಾಜ್ಯ ಸರಕಾರವು ರಚಿಸಿರುವ ಸಂಪುಟ ಉಪಸಮಿತಿಯು ಕೇಂದ್ರ ಸರಕಾರಕ್ಕೆ ಶಿಫಾರಸುಗಳನ್ನು ಇನ್ನಷ್ಟೇ ಸಲ್ಲಿಸಬೇಕಿದೆ.

ನಿಸರ್ಗ ಸಂರಕ್ಷಣೆಯ ಅಂತಾರಾಷ್ಟ್ರೀಯ ಒಕ್ಕೂಟ (ಐಸಿಯುಎನ್‌) ಇತ್ತೀಚೆಗೆ ತನ್ನ ತೃತೀಯ ವರದಿಯಲ್ಲಿ ಪಶ್ಚಿಮ ಘಟ್ಟದ ಸಂರಕ್ಷಣೆಯಲ್ಲಿ ಹೆಚ್ಚು ಪ್ರಗತಿ ಆಗಿಲ್ಲ ಎಂದು ಅಭಿಪ್ರಾಯಪಟ್ಟಿದೆ. ಇದು ಕಸ್ತೂರಿರಂಗನ್‌ ವರದಿ ಜಾರಿಗೆ ಪೂರಕ ಅಂಶವಾಗಬಹುದು.

ಪಶ್ಚಿಮ ಘಟ್ಟದ ಜಾಗತಿಕ ಮಹತ್ವ ಮತ್ತು ಅದರ ನಾಶದಿಂದ ಉಂಟಾಗಬಹುದಾದ ದೀರ್ಘ‌ಕಾಲಿಕ ದುಷ್ಪರಿಣಾಮಗಳನ್ನು ಗಣನೆಗೆ ತೆಗೆದುಕೊಂಡಲ್ಲಿ ಅದನ್ನು ಸಂರಕ್ಷಿಸಲೇ ಬೇಕು ಎಂಬುದರಲ್ಲಿ ಎರಡು ಮಾತಿಲ್ಲ. ಇದೇ ಸಂದರ್ಭದಲ್ಲಿ ಅದರ ಆಸುಪಾಸಿನಲ್ಲಿ ನೆಲೆಸಿರುವ ಜನಸಾಮಾನ್ಯರ ಹಿತಾಸಕ್ತಿಯನ್ನೂ ಅವಗಣಿಸುವಂತಿಲ್ಲ. ಪರಿಸರ ಸೂಕ್ಷ್ಮ ವಲಯವನ್ನು ಗುರುತಿಸುವ ಸಂದರ್ಭದಲ್ಲಿ ಉಪಗ್ರಹ ಚಿತ್ರಗಳನ್ನು ಗಣನೆಗೆ ತೆಗೆದುಕೊಳ್ಳಲಾಗಿದೆ, ನೆಲದ ವಸ್ತುಸ್ಥಿತಿಯನ್ನಲ್ಲ ಎಂಬ ಆರೋಪಗಳಿವೆ.

ಹೀಗಾಗಿ ವರದಿ ಜಾರಿಯ ಸಂದರ್ಭದಲ್ಲಿ ಜನರಿಗೆ ತೊಂದರೆಯಾಗದಂತೆ ನೋಡಿ ಕೊಳ್ಳುವ ಮಟ್ಟದಲ್ಲಿ ಸಡಿಲಿಕೆಯ ಅವಕಾಶವನ್ನು ಉಳಿಸಿಕೊಳ್ಳುವುದು ಸೂಕ್ತವಾದ ಹೆಜ್ಜೆಯಾಗಿದೆ. ಪರಿಸರ ಸೂಕ್ಷ್ಮ ವಲಯ ಎಂದು ಗುರುತಿಸಲ್ಪಡುವ ಪ್ರದೇಶದಲ್ಲಿ ನಿಷೇಧ ಗೊಳ್ಳುವ ಚಟುವಟಿಕೆಗಳಲ್ಲಿ ಸ್ಪಷ್ಟತೆಯನ್ನೂ ಹೊಂದಿರಬೇಕು. ಅಂದರೆ ಔದ್ಯಮಿಕ ಚಟುವಟಿಕೆಗಳು ಮತ್ತು ಜನಸಾಮಾನ್ಯರ ದೈನಂದಿನ ಬದುಕಿನ ಚಟುವಟಿಕೆಗಳು ಎಂಬ ವಿಭಜನೆ ಅತ್ಯಂತ ಸ್ಪಷ್ಟವಾಗಿರಬೇಕು. ಕೃಷಿ ಮತ್ತು ಅರಣ್ಯ ಪ್ರದೇಶದ ಗಡಿ ಗುರುತಿಸುವಿಕೆ ಕಾರ್ಯ ಪಾರದರ್ಶಕವಾಗಿ ನಡೆಯಬೇಕಿದೆ. ಹೀಗಾದಲ್ಲಿ ಮಾತ್ರ ಪಶ್ಚಿಮಘಟ್ಟದಲ್ಲಿನ ಜೀವ ವೈವಿಧ್ಯ ಉಳಿಯಲು ಸಾಧ್ಯ.

ಇದರ ಜತೆಗೆ ಸರಕಾರ ಮಾಡಬೇಕಿರುವ ಇನ್ನೊಂದು ಕೆಲಸವೆಂದರೆ, ವರದಿಯ ಅಂಶಗಳ ಬಗ್ಗೆ ಆ ಪ್ರದೇಶದ ಜನರಲ್ಲಿ ಸ್ಪಷ್ಟತೆಯನ್ನು ಮೂಡಿಸುವುದು. ಸದ್ಯ ವರದಿಯ ಎಷ್ಟೋ ಅಂಶಗಳ ಬಗ್ಗೆ ಜನರು ಕತ್ತಲಿನಲ್ಲಿದ್ದಾರೆ ಮತ್ತು ಆ ಕಾರಣದಿಂದಾಗಿಯೇ ಭಯದಲ್ಲಿದ್ದು, ವಿರೋಧ ವ್ಯಕ್ತಪಡಿಸುತ್ತಿದ್ದಾರೆ. ಇದನ್ನು ನಿವಾರಿಸುವ ಕೆಲಸ ತಳಮಟ್ಟದಲ್ಲಿ ಆಗಬೇಕಿದೆ.