ಮಾಲ್ಡೀವ್ಸ್‌ ಬಿಕ್ಕಟ್ಟು, ಭಾರತಕ್ಕೆ ಉಭಯ ಸಂಕಟ

Team Udayavani, Feb 8, 2018, 10:05 AM IST

ಲಕ್ಷದ್ವೀಪದ ಪಕ್ಕದಲ್ಲೇ ಇರುವ ಪುಟ್ಟ ರಾಷ್ಟ್ರ ಮಾಲ್ಡೀವ್ಸ್‌ನಲ್ಲಿ ಕಳೆದ ಒಂದು ವಾರದಿಂದೀಚೆಗೆ ಕ್ಷಿಪ್ರವಾಗಿ ನಡೆದಿರುವ ರಾಜಕೀಯ ಸ್ಥಿತ್ಯಂತರ ಭಾರತವನ್ನು ಉಭಯ ಸಂಕಟಕ್ಕೀಡು ಮಾಡಿದೆ. ಪ್ರಜಾತಂತ್ರ ರೀತಿಯಲ್ಲಿ ಆಯ್ಕೆಯಾಗಿದ್ದರೂ ಸದ್ಯಕ್ಕೆ ಸರ್ವಾಧಿಕಾರಿಯಾಗಿ ಬದಲಾಗಿರುವ ಅಧ್ಯಕ್ಷ ಅಬ್ದುಲ್‌ ಯಮೀನ್‌ ಅವರು ದೇಶವನ್ನು ತನ್ನ ಬಿಗಿಮುಷ್ಟಿಯಲ್ಲಿಟ್ಟು
ಕೊಳ್ಳಲು ನಡೆಸುತ್ತಿರುವ ದುಸ್ಸಾಹಸಗಳು ಆ ದೇಶವನ್ನು ಬಿಕ್ಕಟ್ಟಿನ ಪ್ರಪಾತಕ್ಕೆ ಕೆಡವಿದೆ. ಸದ್ಯ ಮಾಲ್ಡೀವ್ಸ್‌ನಲ್ಲಿ ತುರ್ತು ಪರಿಸ್ಥಿತಿ ಘೋಷಣೆಯಾಗಿದ್ದು, ಸುಪ್ರೀಂ ಕೋರ್ಟಿನ ಮುಖ್ಯ ನ್ಯಾಯಮೂರ್ತಿ ಮತ್ತು ಅನೇಕ ವಿಪಕ್ಷ ನಾಯಕರ ಸಹಿತ ಹಲವು ಮಂದಿಯನ್ನು ಬಂಧಿಸಿ ಸೆರೆಮನೆಗೆ ತಳ್ಳಲಾಗಿದೆ. ಭಾರತದಲ್ಲಿ ಇಂದಿರಾ ಗಾಂಧಿ ತುರ್ತು ಪರಿಸ್ಥಿತಿ ಹೇರಿದಾಗ ಉಂಟಾದ ಸ್ಥಿತಿಯೇ ಈಗ ಮಾಲ್ಡೀವ್ಸ್‌ನಲ್ಲಿ ಆಗಿದೆ. ಜನರ ಪ್ರತಿರೋಧದ ಧ್ವನಿಯನ್ನು ಕ್ರೂರವಾಗಿ ಹತ್ತಿಕ್ಕಲಾಗುತ್ತಿದೆ. ಇಡೀ ದೇಶ ಅಸಹನೆ ಮತ್ತು ಆಕ್ರೋಶದಿಂದ ಕುದಿಯುತ್ತಿದೆ. ಈ ಸಂದರ್ಭದಲ್ಲಿ ಸ್ವಯಂ ದೇಶಭ್ರಷ್ಟರಾಗಿ ಶ್ರೀಲಂಕಾದಲ್ಲಿ ಆಶ್ರಯ ಪಡೆದಿರುವ ಮಾಜಿ ಅಧ್ಯಕ್ಷ ಮೊಹಮ್ಮದ್‌ ನಶೀದ್‌ ಅವರು ಮಾಲ್ಡೀವ್ಸ್‌ ಬಿಕ್ಕಟ್ಟು ಬಗೆಹರಿಸಲು ಕೂಡಲೇ ಭಾರತ ಮಧ್ಯ ಪ್ರವೇಶಿಸಬೇಕೆಂದು ಮನವಿ ಮಾಡಿದ್ದಾರೆ. ಆದರೆ ಭಾರತದ ಪಾಲಿಗೆ ಇದು ಬಹಳ ನಾಜೂಕಿನ ಸಂದರ್ಭ. ಇನ್ನೊಂದು ದೇಶದ ಆಂತರಿಕ ವಿಚಾರದಲ್ಲಿ ಹಸ್ತಕ್ಷೇಪ ಮಾಡುವುದು ಸರಿಯಾದ ಕ್ರಮ ಮಾತ್ರವಲ್ಲ ಅಪಾಯಕಾರಿ ನಡೆಯೂ ಆಗಬಹುದು. ಅಲ್ಲದೆ ಮಾಲ್ಡೀವ್ಸ್‌ ವ್ಯೂಹಾತ್ಮಕವಾಗಿಯೂ ಭಾರತಕ್ಕೆ ಬಹಳ ಮುಖ್ಯವಾಗಿರುವ ದೇಶ. ಈ ಕಾರಣಗಳಿಗಾಗಿ ಭಾರತ ಎಚ್ಚರಿಕೆಯ ಹೆಜ್ಜೆಯಿರಿಸುವುದು ಅಗತ್ಯ.

ಹಾಗೆಂದು ಮಾಲ್ಡೀವ್ಸ್‌ನ್ನು ಅದರ ಪಾಡಿಗೆ ಬಿಟ್ಟು ಬಿಡುವಂತೆಯೂ ಇಲ್ಲ. ಹಾಗೆ ಬಿಟ್ಟ ಕೂಡಲೇ ಚೀನ ಅಲ್ಲಿಗೆ ಧಾವಿಸುತ್ತದೆ. ಈಗಾಗಲೇ ಚೀನ ಮತ್ತು ಮಾಲ್ಡೀವ್ಸ್‌ ನಡುವೆ ವ್ಯಾಪಾರ ವಹಿವಾಟು ಸಂಬಂಧ ಬಹಳ ನಿಕಟವಾಗಿದೆ. ಮಾಲ್ಡೀವ್ಸ್‌ ಜತೆಗೆ ಚೀನ ಮುಕ್ತ ವಾಣಿಜ್ಯ ಒಪ್ಪಂದ ಮಾಡಿಕೊಂಡಿದೆ. ಭಾರತಕ್ಕೆ ಹತ್ತಿರವಾಗಿ ಹಿಂದು ಮಹಾಸಾಗರದ ಆಯಕಟ್ಟಿನ ಜಾಗದಲ್ಲಿರುವುದರಿಂದ ಮಾಲ್ಡೀವ್ಸ್‌ನಲ್ಲಿ ತನ್ನದೊಂದು ನೆಲೆ ಸ್ಥಾಪಿಸಿಕೊಳ್ಳಲು ಚೀನ ಹಿಂದಿನಿಂದಲೂ ಪ್ರಯತ್ನಿಸುತ್ತಿದೆ. ಆಂತರಿಕ ಬಿಕ್ಕಟ್ಟಿನ ಲಾಭವೆತ್ತಿಕೊಂಡು ಚೀನ ತನ್ನ ಕಾರ್ಯ ಸಾಧಿಸಿಕೊಂಡರೆ ಭಾರತದ ಬಗಲಿಗೆ ಅಪಾಯ ಬಂದಂತಾಗುತ್ತದೆ. ಯಾವ ಕಾರಣಕ್ಕೂ ಮಾಲ್ಡೀವ್ಸ್‌ ಆಂತರಿಕ ವಿಚಾರದಲ್ಲಿ ಭಾರತ ಮೂಗು ತೂರಿಸಬಾರದು ಎಂದಿರುವ ಚೀನದ ಇಂದಿನ ಹೇಳಿಕೆಯೂ ಈ ದಿಕ್ಕಿನಲ್ಲಿಯೇ ಇದೆ. ಹೀಗಾಗಿಯೇ ಇದೀಗ ಉಭಯ ಸಂಕಟದ ಪರಿಸ್ಥಿತಿಯನ್ನು ಸೃಷ್ಟಿಸಿರುವುದು.

ರಾಜಕೀಯ ಬಿಕ್ಕಟ್ಟು ಮಾತ್ರ ಮಾಲ್ಡೀವ್ಸ್‌ ಸಮಸ್ಯೆಯಲ್ಲ. ಬರೀ 5 ಲಕ್ಷದಷ್ಟು ಜನಸಂಖ್ಯೆಯಿರುವ ಆ ದೇಶದಲ್ಲಿ ಮೂಲಭೂತವಾದವೂ ಬೇರೂರತೊಡಗಿದೆ. ಮಾಲ್ಡೀವ್ಸ್‌ನ ಸುಮಾರು 200 ಯುವಕರು ಐಸಿಸ್‌ ಸೇರಿರುವ ಗುಮಾನಿಯಿದೆ. ಜತೆಗೆ ಪಾಕಿಸ್ಥಾನದ ಲಷ್ಕರ್‌ ಉಗ್ರ ಸಂಘಟನೆಯೂ ತನ್ನದೊಂದು ಶಾಖೆಯನ್ನು ಅಲ್ಲಿ ತೆರೆದಿದೆ. ಆರ್ಥಿಕವಾಗಿಯೂ ಮಾಲ್ಡೀವ್ಸ್‌ ದುರ್ಬಲಗೊಂಡಿದೆ. ಹೀಗೆ ಹತ್ತಾರು ಸಮಸ್ಯೆಗಳಿಂದ ಬಳಲುತ್ತಿರುವ ಆ ದೇಶಕ್ಕೆ ಬಾಹ್ಯ ನೆರವು ಅನಿವಾರ್ಯ. 

ಮಾಲ್ಡೀವ್ಸ್‌ನ ಸದ್ಯದ ಬಿಕ್ಕಟ್ಟಿಗೆ ಕಾರಣ ಮುಂಬರುವ ಅಕ್ಟೋಬರ್‌ನಲ್ಲಿ ನಡೆಯಲಿರುವ ಚುನಾವಣೆ ಎನ್ನಲಾಗುತ್ತಿದೆ. 2013ರ ಚುನಾವಣೆ ಯಲ್ಲಿ ಅಲ್ಪ ಬಹುಮತದಿಂದ ಅಧಿಕಾರಕ್ಕೇರಿರುವ ಯಮೀನ್‌ ದುರಾಡಳಿತದಿಂದ ಜನರು ಬೇಸತ್ತಿದ್ದಾರೆ. ಕ್ಷುಲ್ಲಕ ಕೇಸಿನಲ್ಲಿ ಜೈಲು ಪಾಲಾಗಿದ್ದ ಅವರ ವಿರೋಧಿ ನಶೀದ್‌ಗೆ ವ್ಯಾಪಕ ಜನಬೆಂಬಲ ವ್ಯಕ್ತವಾಗುತ್ತಿರುವುದರಿಂದ ಕಂಗೆಟ್ಟಿರುವ ಯಮೀನ್‌ ಪ್ರಜಾತಂತ್ರವನ್ನೇ ದಮನಿಸಿ ಅಧಿಕಾರ ಉಳಿಸಿಕೊಳ್ಳುವ ಪ್ರಯತ್ನದಲ್ಲಿದ್ದಾರೆ. ದೇಶದ ಪೊಲೀಸ್‌ ಪಡೆ ಮತ್ತು ಸೇನೆ ಅವರ ಬೆನ್ನಿಗೆ ನಿಂತಿರುವುದರಿಂದ ಈಗ ಅವರು ಆಡಿದ್ದೇ ಆಟವಾಗಿದೆ. 

ನಶೀದ್‌ ಆರೋಪ ಮುಕ್ತಗೊಳಿಸಿದ ಮತ್ತು 12 ವಿಪಕ್ಷ ಸಂಸದರ ಅನರ್ಹತೆಯನ್ನು ರದ್ದುಪಡಿಸಿದ ನ್ಯಾಯಾಧೀಶರನ್ನೇ ಭದ್ರತಾ ಪಡೆಯನ್ನು ಬಳಸಿ ಅವರು ಜೈಲಿಗಟ್ಟಿದ್ದಾರೆ. ಸಂಸದರ ಅನರ್ಹತೆ ರದ್ದಾದರೆ ತಕ್ಷಣವೇ ಯಮೀನ್‌ ಸರಕಾರ ಪತನಗೊಳ್ಳುವ ಸಾಧ್ಯತೆಯಿದೆ. ಹೀಗಾದರೆ ನಶೀದ್‌ ಬದಲು ತಾನು ಜೈಲಿಗೆ ಹೋಗುವ ಭೀತಿ ಯಮೀನ್‌ರನ್ನು ಕಾಡುತ್ತಿದೆ.

ಜಗತ್ತು ಈ ಹಿಂದೆಯೂ ಅಧಿಕಾರ ಲಾಲಸಿಗಳಾಗಿದ್ದ ಹಲವು ಸರ್ವಾಧಿಕಾರಿಗಳನ್ನು ಕಂಡಿದೆ. ಎಲ್ಲ ಸರ್ವಾಧಿಕಾರಿಗಳ ಅಂತ್ಯವೂ ದುರಂತಮಯವಾಗಿದ್ದರೂ ಸರ್ವಾಧಿಕಾರಿಗಳು ಮಾತ್ರ ಪಾಠ ಕಲಿಯುವುದಿಲ್ಲ ಅಥವಾ ಅಧಿಕಾರದ ಅಮಲು ಅವರಿಗೆ ಪಾಠ ಕಲಿಯಲು ಬಿಡುತ್ತಿಲ್ಲ. ಸದ್ಯಕ್ಕೆ ಯಮೀನ್‌ ಕೂಡ ಈ ಮಾದರಿಯ ಸರ್ವಾಧಿಕಾರಿಗಳ ಸಾಲಿಗೆ ಸೇರುವ ಲಕ್ಷಣ ಕಾಣಿಸುತ್ತಿದೆ.