ಥರ್ಡ್‌ ಪಾರ್ಟಿ ವಿಮೆ ಕಂತು ಏರಿಕೆ ಬರೆ ಹೊರೆ ಆದರೂ ಪ್ರಯೋಜನಕರ

Team Udayavani, Mar 7, 2017, 3:45 AM IST

ವಾಹನಗಳು ಮತ್ತು ರಸ್ತೆ ಅಪಘಾತಗಳು ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ ಥರ್ಡ್‌ ಪಾರ್ಟಿ ವಿಮಾ ಪ್ರೀಮಿಯಂ ಏರಿಸುವ ಪ್ರಸ್ತಾವ ಉತ್ತಮವಾಗಿದೆ. ವಾಹನ ಮಾಲಕರಿಗೆ ಇದು ಹೊರೆ ನಿಜ. ಆದರೆ ಇದರಿಂದ ಅಪಘಾತದಲ್ಲಿ ಒಳಗೊಂಡ ತೃತೀಯ ವ್ಯಕ್ತಿಗೂ ವಾಹನ ಮಾಲಕರಿಗೂ ಹೆಚ್ಚು ಪ್ರಯೋಜನ ಉಂಟಾಗುವ ಸಾಧ್ಯತೆ ಇದೆ.

ಜಿಎಸ್‌ಟಿ ಜಾರಿಯಾದ ಬಳಿಕ ವಾಹನಗಳ ಬೆಲೆ ತುಸು ಇಳಿಯುವ ನಿರೀಕ್ಷೆಯಿತ್ತು. ಆದರೆ ಇದೇ ವೇಳೆ ಸರಕಾರ ಥರ್ಡ್‌ ಪಾರ್ಟಿ ಇನ್ಶೂರೆನ್ಸ್‌ ಪ್ರೀಮಿಯಂ ಮೊತ್ತವನ್ನು ಶೇ. 50ರಷ್ಟು ಹೆಚ್ಚಿಸುವ ಪ್ರಸ್ತಾವ ಮುಂದಿರಿಸುವ ಮೂಲಕ ಈ ಇಳಿಕೆಯ ಖುಷಿಯನ್ನು ಕಸಿದುಕೊಂಡಿದೆ. ಮೋಟಾರು ವಾಹನ ಕಾಯಿದೆಯಡಿಯಲ್ಲಿ ಥರ್ಡ್‌ ಪಾರ್ಟಿ ವಿಮೆ ಕಡ್ಡಾಯ. ಇದರ ಲಾಭ ಸಿಗುವುದು ವಾಹನದ ಮಾಲಕನಿಗೂ ಅಲ್ಲ, ವಿಮೆ ಕಂಪೆನಿಗೂ ಅಲ್ಲ; ಬದಲಾಗಿ ಅಪಘಾತದಲ್ಲಿ ಒಳಗೊಂಡಿರುವ ಮೂರನೇ ವ್ಯಕ್ತಿಗೆ. ಹೀಗಾಗಿ ಇದು ಥರ್ಡ್‌ ಪಾರ್ಟಿ ವಿಮೆ. ಅಪಘಾತದಲ್ಲಿ ಯಾರಾದರೂ ಮೃತಪಟ್ಟರೆ ಅಥವಾ ಅಂಗವಿಕಲರಾದರೆ ವಾಹನ ಮಾಲಕನ ಪರವಾಗಿ ಪರಿಹಾರ ನೀಡುವ ಬಾಧ್ಯತೆಯನ್ನು ವಿಮೆ ಕಂಪೆನಿಗಳು ವಹಿಸಿಕೊಳ್ಳುತ್ತವೆ. ವಾಹನ ಹೊಂದಿದವರು ತಮ್ಮ ವಾಹನಗಳಿಗೆ ವಿಮೆ ಮಾಡಿಸದಿದ್ದರೂ ಥರ್ಡ್‌ ಪಾರ್ಟಿ ವಿಮೆ ಹೊಂದಿರಲೇ ಬೇಕು. ಫ‌ಸ್ಟ್‌ ಪಾರ್ಟಿ ವಿಮೆ ಅಥವಾ ಕಾಂಪ್ರಹೆನ್ಸಿವ್‌ (ಸಮಗ್ರ) ಇನ್ಶೂರೆನ್ಸ್‌ ಆದರೆ ಅಪಘಾತಕ್ಕೀಡಾದ ವಾಹನ ಹಾಗೂ ಅಪಘಾತದಿಂದ ಸಂತ್ರಸ್ತರಾದವರಿಗೂ ವಿಮಾ ಪರಿಹಾರ ಸಿಗುತ್ತದೆ. ಆದರೆ ಭಾರತದಲ್ಲಿ ಸಾಮಾನ್ಯವಾಗಿ ವಾಹನ ಹಳತಾದ ಕೂಡಲೇ ಮಾಲಕರು ಥರ್ಡ್‌ ಪಾರ್ಟಿ ಇನ್ಶೂರೆನ್ಸ್‌ ಮಾತ್ರ ಮಾಡಿಸಿಕೊಳ್ಳುತ್ತಾರೆ. 

ವಿಮೆ ನಿಯಂತ್ರಣ ಮತ್ತು ಅಭಿವೃದ್ಧಿ ಪ್ರಾಧಿಕಾರ 2017-18ನೇ ಸಾಲಿನಿಂದ ಜಾರಿಗೆ ಬರುವಂತೆ ಥರ್ಡ್‌ ಪಾರ್ಟಿ ವಿಮೆ ಕಂತನ್ನು ಸರಾಸರಿಯಾಗಿ ಶೇ. 50ರಷ್ಟು ಏರಿಸುವ ಪ್ರಸ್ತಾವ ಸಲ್ಲಿಸಿದೆ. ಇದು ಶೇ.15ರಿಂದ ಶೇ. 20ರಷ್ಟು ಹೆಚ್ಚಳವಾಗುವುದು ವಾಡಿಕೆಯಾಗಿತ್ತು. ಆದರೆ ಈ ಸಲ ಏಕಾಏಕಿ ಶೇ.50 ಹೆಚ್ಚಿಸುವ ಮೂಲಕ ವಾಹನ ಮಾಲಕರಿಗೆ ಬರೆ ಹಾಕಲು ಐಆರ್‌ಡಿಎ ಹೊರಟಿದೆ. ಈ ಪ್ರಸ್ತಾವವನ್ನು ಶಾಸನ ರೂಪದಲ್ಲಿ ಜಾರಿಗೆ ತರುವ ಸಲುವಾಗಿ ಕಾನೂನಿಗೆ ತಿದ್ದುಪಡಿ ಮಾಡಲು ಕೇಂದ್ರ ತಯಾರಿ ನಡೆಸಿದೆ. ಹಾಗೆಂದು ಇದರಿಂದ ಕೆಳ ಮಧ್ಯಮ ವರ್ಗದವರಿಗೆ ಹೆಚ್ಚಿನ ಹೊರೆಯಾಗುವುದಿಲ್ಲ. ಏಕೆಂದರೆ ಈ ವರ್ಗದವರು ಹೆಚ್ಚಾಗಿ ಹೊಂದಿರುವುದು 1000 ಸಿಸಿ ಸಾಮರ್ಥ್ಯದೊಳಗಿನ ಕಾರು. 1000 ಸಿಸಿ ಸಾಮರ್ಥ್ಯದ ಖಾಸಗಿ ಕಾರುಗಳಿಗೆ ವಿಮೆ ಕಂತನ್ನು ಐಆರ್‌ಡಿಎ ಯಥಾಸ್ಥಿತಿಯಲ್ಲಿಟ್ಟಿದೆ. ಅಂತೆಯೇ ಕೆಲವು ವರ್ಗದ ಗೂಡ್ಸ್‌ ವಾಹನಗಳಿಗೂ ಏರಿಕೆಯಿಂದ ವಿನಾಯಿತಿ ನೀಡಲಾಗಿದೆ. ದ್ವಿಚಕ್ರ ವಾಹನ ವರ್ಗದಲ್ಲಿ 75 ಸಿಸಿ ತನಕ ಮಾತ್ರ ವಿಮೆ ಕಂತು ಹೆಚ್ಚಳವಾಗುವುದಿಲ್ಲ. ಇದು ಎಲ್ಲ ವರ್ಗದ ಜನರಿಗೆ ಹೊರೆಯಾಗುವ ಪ್ರಸ್ತಾವ.  

ಥರ್ಡ್‌ ಪಾರ್ಟಿ ವಿಮೆಯಿಂದ ವಾಹನ ಮಾಲಕನಿಗೆ ಯಾವ ಪ್ರಯೋಜನವೂ ಇಲ್ಲ. ಅಂತೆಯೇ ಅಪಘಾತದಲ್ಲಿ ಗಾಯಗೊಂಡಿದ್ದರೆ ತನ್ನ ಹಣದಿಂದಲೇ ಚಿಕಿತ್ಸೆ ಪಡೆದುಕೊಳ್ಳಬೇಕು. ಕಾರು ಕಳ್ಳತನವಾದರೆ ಅಥವಾ ಬೆಂಕಿಯಿಂದ ಹಾನಿ ಸಂಭವಿಸಿದರೆ ಇದರ ಬಾಧ್ಯತೆಯನ್ನು ವಿಮೆ ಕಂಪೆನಿ ವಹಿಸಿಕೊಳ್ಳುವುದಿಲ್ಲ. ಹೀಗಾಗಿ ಥರ್ಡ್‌ ಪಾರ್ಟಿ ವಿಮೆ ಕಡಿಮೆ ಬೆಲೆಯ ವಾಹನಗಳಿಗೆ ಮತ್ತು ಹಳೆಯ ವಾಹನಗಳಿಗೆ ಮಾತ್ರ ಸೂಕ್ತವಾಗಿದೆ. ಭಾರತದಲ್ಲಿ ವಾಹನಗಳಿಗೆ ವಿಮೆ ಮಾಡಿಸಿಕೊಳ್ಳುವುದೇ ಕಾನೂನು ಪ್ರಕಾರ ಅದು ಕಡ್ಡಾಯವಾಗಿರುವುದರಿಂದ. ಇಂತಹ ಮನೋಧರ್ಮವಿರುವ ದೇಶದಲ್ಲಿ ಕಡಿಮೆ ಕಂತಿನ ಥರ್ಡ್‌ಪಾರ್ಟಿ ವಿಮೆ ಇರುವಾಗ ಹೆಚ್ಚಿನವರು ಅದನ್ನೇ ಆಯ್ದುಕೊಳ್ಳುತ್ತಾರೆ. ಇದೀಗ ಥರ್ಡ್‌ ಪಾರ್ಟಿ ವಿಮೆ ಕಂತು ಹೆಚ್ಚಾಗುವುದರಿಂದ ವಾಹನ ಮಾಲಕರು ಥರ್ಡ್‌ ಪಾರ್ಟಿ ಬದಲು ಫ‌ಸ್ಟ್‌ ಪಾರ್ಟಿ ವಿಮೆಯನ್ನು ಆಯ್ದುಕೊಳ್ಳಬಹುದು. ಎರಡೂ ವಿಮೆಗಳ ಕಂತಿನಲ್ಲಿ ಹೆಚ್ಚೇನೂ ವ್ಯತ್ಯಾಸವಿಲ್ಲದಿದ್ದರೆ ಫ‌ಸ್ಟ್‌ ಪಾರ್ಟಿ ಅಥವಾ ಸಮಗ್ರ ವಿಮೆ ಹೆಚ್ಚು ಪ್ರಯೋಜನಕಾರಿ. ಈ ಹಿನ್ನೆಲೆಯಲ್ಲಿ ಹೇಳುವುದಾದರೆ ಥರ್ಡ್‌ ಪಾರ್ಟಿ ವಿಮೆ ಕಂತು ಹೆಚ್ಚಿಸುವುದೆಂದರೆ ಪರೋಕ್ಷವಾಗಿ ವಾಹನ ಮಾಲಕರಿಗೆ ಅವರ ವಾಹನದ ಸುರಕ್ಷೆಯನ್ನು ಖಾತರಿಪಡಿಸಿದಂತೆ. ವಿಮೆ ಕಂಪೆನಿಗಳು ಥರ್ಡ್‌ ಪಾರ್ಟಿ ಬದಲು ಸಮಗ್ರ ವಿಮೆಗೆ ಹೆಚ್ಚಿನ ಪ್ರೋತ್ಸಾಹ ಕೊಡುವ ಸ್ಕೀಂಗಳನ್ನು ರೂಪಿಸಿ ಜನರನ್ನು ಆಕರ್ಷಿಸಬೇಕು. ಇದೇ ವೇಳೆ ಐಆರ್‌ಡಿಎ ವಾಹನ ವಿಮೆಯಲ್ಲಿರುವ ಗೊಂದಲಗಳನ್ನು ನಿವಾರಿಸುವತ್ತಲೂ ಗಮನಹರಿಸಬೇಕು. 

ವಾಹನ ಮಾಲಕರಿಗೆ ಹೊರೆ ಹೌದಾಗಿದ್ದರೂ ವಾಹನಗಳು ಮತ್ತು ರಸ್ತೆ ಅಪಘಾತಗಳು ಹೆಚ್ಚುತ್ತಿರುವ ಹಿನ್ನೆಲೆಯಲ್ಲಿ 
ಅಪಘಾತಗಳಲ್ಲಿ ಹಾನಿ ಅನುಭವಿಸುವ ತೃತೀಯ ವ್ಯಕ್ತಿಗೆ ಶೀಘ್ರ ಸಮಾಧಾನ ಮತ್ತು ಪ್ರಯೋಜನ ಒದಗಿಸುವ ದೃಷ್ಟಿಯಿಂದ ಈ ಪ್ರಸ್ತಾವ ಉತ್ತಮವಾಗಿದೆ.