ಎಸ್ಸೆಮ್ಮೆಸ್‌ ಲಿಂಕ್‌ಗೆ ಮರುಳಾಗಬೇಡಿ!

Team Udayavani, Aug 14, 2021, 6:50 AM IST

ಗ್ರಾಹಕರನ್ನು ಮರುಳು ಮಾಡಿ, ವೈಯಕ್ತಿಕ ಮಾಹಿತಿ ಪಡೆದುಕೊಂಡು ಬ್ಯಾಂಕ್‌ ಖಾತೆ ವಿವರ, ಪಾಸ್‌ವರ್ಡ್‌ ಪಡೆದು ವಂಚಿಸುವವರ ಜಾಲ ಹೆಚ್ಚಾಗಿದೆ. ಈ ಕುರಿತು ದೇಶದ ಸೈಬರ್‌ ಭದ್ರತಾ ಸಂಸ್ಥೆ, ಇಂಡಿಯನ್‌ ಕಂಪ್ಯೂಟರ್‌ ಎಮರ್ಜೆನ್ಸಿ ರೆಸ್ಪಾನ್ಸ್‌ ಟೀಮ್‌ ಹೊಸ ಎಚ್ಚರಿಕೆ ನೀಡಿದೆ. “ಎನ್‌ಜಿಆರ್‌ಒಕೆ’ ಎಂಬ ಪ್ಲಾಟ್‌ಫಾರಂ ಬಗ್ಗೆ ಎಚ್ಚರಿಕೆಯಿಂದಿರುವಂತೆ ಸೂಚಿಸಿದೆ.

ಹೇಗೆ ವಂಚಿಸುತ್ತಾರೆ?

ನೀವು ಹೊಂದಿರುವ ಬ್ಯಾಂಕ್‌ ಖಾತೆಯಿಂದಲೇ ಕೆವೈಸಿ ಅಪ್‌ಡೇಟ್‌ ಮಾಡಲು ಸೂಚನೆ ಇರುವ ಎಸ್‌ಎಂಎಸ್‌ ಮತ್ತು ಅದಕ್ಕಾಗಿ ಲಿಂಕ್‌ ಕಳುಹಿಸಲಾಗುತ್ತದೆ. ಉದಾಹರಣೆ: ಆತ್ಮೀಯ ಗ್ರಾಹಕರೇ ನಿಮ್ಮ ಕೆವೈಸಿ ಅಪ್‌ಡೇಟ್‌ ಆಗಿಲ್ಲ. ಅದನ್ನು ಪೂರ್ತಿಗೊಳಿಸದಿದ್ದರೆ ಖಾತೆ ಬ್ಲಾಕ್‌ ಮಾಡಲಾಗುತ್ತದೆ. ಲಿಂಕ್‌ ಫಾಲೋ ಮಾಡಿ ಎಂದು ಇರುತ್ತದೆ.
ಅದನ್ನು ನಂಬುವವರು ಲಿಂಕ್‌ ತೆರೆದು ಬ್ಯಾಂಕ್‌ ವಿವರ ನಮೂದಿಸಿ ಕಳುಹಿಸುತ್ತಾರೆ. ಕೂಡಲೇ ವಂಚಕರು ಒಟಿಪಿ ಸಂಖ್ಯೆ ಕಳುಹಿಸುತ್ತಾರೆ. ಅದನ್ನು ನಮೂದಿಸಿದಾಗ ನಮ್ಮ ಬ್ಯಾಂಕ್‌ ಖಾತೆಯ ವಿವರ ಅವರಿಗೆ ಲಭ್ಯವಾಗುತ್ತದೆ. ಜತೆಗೆ ಹಣವನ್ನೂ ಕಳೆದುಕೊಳ್ಳುತ್ತಾರೆ.

ಎಚ್ಚರಿಕೆ ವಹಿಸುವುದು ಹೇಗೆ? :

ಸಿಇಆರ್‌ಟಿ ನೀಡಿದ ಮುನ್ನೆಚ್ಚರಿಕೆ ಪ್ರಕಾರ, ಅನಾಮಧೇಯ ಮೂಲಗಳಿಂದ ಬಂದ ಎಸ್‌ಎಂಎಸ್‌, ಇ-ಮೇಲ್‌ಗ‌ಳಲ್ಲಿರುವ ಲಿಂಕ್‌ಗಳನ್ನು ಕ್ಲಿಕ್‌ ಮಾಡಬೇಡಿ.
ಎಸ್‌ಎಂಎಸ್‌ ಕಳುಹಿಸಿದ ನಂಬರ್‌ ಪರಿಚಿತವೇ ಅಥವಾ ನಕಲಿ ಮೊಬೈಲ್‌ ನಂಬರ್‌ ಆಗಿದೆಯೋ ಎಂದು ಪರಿಶೀಲಿಸಿ.
ನಿಗದಿತ ಬ್ಯಾಂಕ್‌ ಹೆಸರಲ್ಲಿ ಎಸ್‌ಎಂಎಸ್‌, ಇ-ಮೇಲ್‌ ಬಂದಿದ್ದರೆ ನೀವು ಖಾತೆ ಹೊಂದಿರುವ ಬ್ಯಾಂಕ್‌ ಶಾಖೆಯಲ್ಲಿ ವಿಚಾರಿಸಿ.
ಮೊಬೈಲ್‌, ಕಂಪ್ಯೂಟರ್‌, ಲ್ಯಾಪ್‌ಟಾಪ್‌ಗ್ಳಲ್ಲಿರುವ ಆ್ಯಂಟಿ ವೈರಸ್‌ ಸಾಫ್ಟ್ವೇರ್‌ ಅಪ್‌ಡೇಟ್‌ ಮಾಡಿ.
ly, tinyurl ಎಂದು ಇರುವ ಲಿಂಕ್‌ಗಳ ಬಗ್ಗೆ ಎಚ್ಚರಿಕೆ ವಹಿಸಿ. ಅದರ ಪೂರ್ತಿ ವೆಬ್‌ಸೈಟ್‌ ಲಿಂಕ್‌ ಇದೆಯೋ ಎಂದು ಪರಿಶೀಲಿಸಿ. ಅದಕ್ಕಾಗಿ ಯುಆರ್‌ಎಲ್‌ ಪರೀಕ್ಷಿಸುವ ವ್ಯವಸ್ಥೆಯೂ ಇದೆ.
ಆ್ಯಪ್‌ಸ್ಟೋರ್‌ನಿಂದ ಗೊತ್ತಿಲ್ಲದೇ ಇರುವ ಆ್ಯಪ್‌ ಡೌನ್‌ ಲೋಡ್‌ ಮಾಡಬೇಡಿ.