ದುಬೈ ಹೆಮ್ಮೆಯ ಯುಎಇ ಕನ್ನಡ ಸಂಘದ 6ನೇ ವಾರ್ಷಿಕೋತ್ಸವ

Team Udayavani, Jun 19, 2021, 8:18 PM IST

ಅಬುಧಾಬಿ

ಸಪ್ತ ಸಾಗರದಾಚೆ ಮರಳುಗಾಡಿನಲ್ಲಿರುವ ಮಾಯಾನಗರಿ ದುಬೈ ಕೇಂದ್ರೀಕರಿಸಿ ಕನ್ನಡಪರ ಚಟುವಟಿಕೆಗಳನ್ನು ನಡೆಸುತ್ತಿರುವ ಹೆಮ್ಮೆಯ ಯುಎಇ ಕನ್ನಡಿಗರು ತಂಡ 5 ವರ್ಷಗಳ ಯಶಸ್ವೀ ಪಯಣ ನಡೆಸಿ 6ನೇ  ವಸಂತಕ್ಕೆ ಕಾಲಿಡುವ ಸಮಯವನ್ನು ತಂಡದ ಸಮಿತಿ ಸದಸ್ಯರು ಮತ್ತು ಕುಟುಂಬ ವರ್ಗ ಜತೆ ಸೇರಿ ಜೂ. 4ರಂದು ಅಲ್‌ ಕ್ವಾಸಿಸ್‌ನಲ್ಲಿರುವ ಹೊಟೇಲಿನಲ್ಲಿ ಆಚರಿಸಿದರು. ಹೆಮ್ಮೆಯ ಕನ್ನಡಿಗರು ಯುಎಇ ತಂಡದ ಗೌರವಾಧ್ಯಕ್ಷರಾದ ಮೊಹಮ್ಮದ್‌ ಮುಸ್ತಫಾ ಅವರು ಪುಟಾಣಿಗಳೊಂದಿಗೆ ಸೇರಿ ಕೇಕ್‌ ಕತ್ತರಿಸಿದರು.

ಹೆಮ್ಮೆಯ ಯುಎಇ ಕನ್ನಡಿಗರು ತಂಡವು ಕಳೆದ 5 ವರ್ಷಗಳಲ್ಲಿ ತಾಯಿನಾಡಿನಿಂದ ಕೆಲಸ ಅರಸಿ ಬಂದ ಕನ್ನಡಿಗರಿಗೆ ಉದ್ಯೋಗ ಕಲ್ಪಿಸಿಕೊಡುವುದು, ಅರಬರ ಕರ್ಮ ಭೂಮಿಯಲ್ಲಿ ಸಂಕಷ್ಟದಲ್ಲಿರುವ ಜನರಿಗೆ ಸಹಾಯ ಮಾಡುವುದು, ತಾಯಿನಾಡಿನಲ್ಲಿ ಸಂಕಷ್ಟದಲ್ಲಿರುವವರಿಗೆ ನೆರವು ನೀಡುವುದು ಇತ್ಯಾದಿ ಅನೇಕ ಸಾಮಾಜಿಕ ಕೆಲಸಗಳ ಜತೆ ಮೈಸೂರು ದಸರಾ ಕ್ರೀಡೋತ್ಸವ ರೀತಿಯ ಸಾಂಸ್ಕೃತಿಕ ಕಾರ್ಯಕ್ರಮಗಳೊಂದಿಗೆ ಕನ್ನಡ ಭಾಷೆ ಸಂಸ್ಕೃತಿ ನೆಲ ಜಲದ ಬಗ್ಗೆ

ಮುಂದಿನ ಪೀಳಿಗೆಯಲ್ಲಿ ಅರಿವು ಮೂಡಿಸುವ ಹಲವರು ಕಾರ್ಯಕ್ರಮಗಳನ್ನು ನಡೆಸುತ್ತ ಬಂದಿದೆ. ಪ್ರಸ್ತುತ ಈ ತಂಡದ ಅಧ್ಯಕ್ಷರಾಗಿ ಮಮತಾ ಮೈಸೂರು ಅವರು ಹಲವು ಸಮಿತಿ ಸದಸ್ಯರ ನೇತೃತ್ವದಲ್ಲಿ ಸಂಘವನ್ನು ಮುನ್ನಡೆಸುತ್ತಿದ್ದಾರೆ.