Medical; ವೈದ್ಯರಿಗೆ ನಿರಂತರ ಕಲಿಕೆ ಅಗತ್ಯ

Team Udayavani, Dec 7, 2024, 6:45 AM IST

“ಜಗ ಬೆಳೆದು ಚಿಗುರುತಿರೆ ಶಾಸ್ತ್ರ ಕರಟಿರಲಹುದೆ ನಿಗಮ ಸಂತತಿಗೆ ಸಂತತಿಯಾಗದಿಹುದೆ’ ಎನ್ನುವ ಡಿ.ವಿ.ಜಿ. ಅವರ ಮಾತು ಬದುಕಿನ ಎಲ್ಲ ಕ್ಷೇತ್ರಗಳಿಗೂ ಮಾರ್ಗದರ್ಶನ ಮಾಡಬಲ್ಲದು. ವೃತ್ತಿ, ಪ್ರವೃತ್ತಿಗಳಲ್ಲಿ ನಾವು ನಿರಂತರ ಕಲಿಕೆ ಮುಂದುವರಿಸುತ್ತಲೇ ಇರಬೇಕು ಎನ್ನುವುದರಲ್ಲಿ ಅನುಮಾನವೇ ಇಲ್ಲ.

ಕಲಿಕೆ ಎಂದರೆ ಅಧ್ಯಯನ, ಅಧ್ಯಾಪನ ಎರಡೂ ಸೇರಿಕೊಳ್ಳುತ್ತವೆ. ವೈದ್ಯಕೀಯಕ್ಕೆ ಸಂಬಂಧಿಸಿ ಹೇಳುವುದಾದರೆ ಈ ಸೂತ್ರವನ್ನು ಅತ್ಯಂತ ಕಟ್ಟುನಿಟ್ಟಾಗಿ ಆಚರಿಸಬೇಕಾಗುತ್ತದೆ. ಹೊಸ ಹೊಸ ಆವಿಷ್ಕಾರಗಳು, ಬೆಳವಣಿಗೆಗಳು ನಡೆಯುತ್ತಿರುವಾಗ ವೈದ್ಯಕೀಯದಲ್ಲಿ ನಮ್ಮ ತಿಳಿವಳಿಕೆಯನ್ನು ಸಕಾಲಿಕಾ ಮಟ್ಟಕ್ಕೆ ಏರಿಸಿಕೊಳ್ಳಬೇಕಾದದ್ದು ಅತ್ಯಂತ ಅಗತ್ಯ. ಆದ್ದರಿಂದಲೇ ವೈದ್ಯಕೀಯ ಕ್ಷೇತ್ರದಲ್ಲಿ ಸಿ.ಎಂ.ಇ ಎಂದರೆ ಕಂಟಿನ್ಯೂಡ್‌ ಮೆಡಿಕಲ್‌ ಎಜುಕೇಶನ್‌ ಈಗಾಗಲೇ ಅಸ್ತಿತ್ವದಲ್ಲಿದೆ. ಈ ನಿರಂತರ ಕಲಿಕೆ ಇನ್ನೂ ಒಂದು ಸುಲಭವಾದ ದಾರಿಯನ್ನು ಅನುಸರಿಸಬಹುದು.
ಪ್ರತಿಯೊಬ್ಬ ಕುಟುಂಬ ವೈದ್ಯರಿಗೆ ಅವರ ಸಮೀಪವಿರುವ ಅಥವಾ ಅವರು ಬಯಸುವ ಮೆಡಿಕಲ್‌ ಕಾಲೇಜು ಆಸ್ಪತ್ರೆಗಳಲ್ಲಿ ಮುಕ್ತ ಪ್ರವೇಶಕ್ಕೆ ಅವಕಾಶ ಬೇಕು. ಎಂದರೆ ಪೂರ್ವಭಾವಿ ಅನುಮತಿಯನ್ನು ಪಡೆದುಕೊಂಡು ದಿನದ 24 ಗಂಟೆಗಳಲ್ಲಿ ಯಾವುದೇ ಹೊತ್ತಿನಲ್ಲಿ ಆದರೂ ಆ ಆಸ್ಪತ್ರೆಗೆ ಹೋಗಿ ತಾನು ಬಯಸುವಷ್ಟು ಕಾಲ ಅಲ್ಲಿ ಇದ್ದು ಅಲ್ಲಿಯ ಎಲ್ಲ ಆಗುಹೋಗುಗಳನ್ನು ವಿವಿಧ ವಿಭಾಗಗಳಲ್ಲಿ ನೋಡುವುದಕ್ಕೆ ಅವಕಾಶ ಇರಬೇಕು.

ಕೇಸ್‌ ಶೀಟ್‌ಗಳನ್ನು ಓದುವುದಕ್ಕೆ ಅನುಮತಿ ಪಡೆದು ರೋಗಿಗಳನ್ನು ಪರೀಕ್ಷಿಸುವುದಕ್ಕೆ ಶಸ್ತ್ರಚಿಕಿತ್ಸೆಯಂತಹ ವಿಶೇಷ ಚಿಕಿತ್ಸಾ ವಿಭಾಗಗಳನ್ನು ಸಂದರ್ಶಿಸುವುದಕ್ಕೆ ಅನುಮತಿ ಇರಬೇಕು. ಆದರೆ ಯಾವುದೇ ಚಿಕಿತ್ಸೆಯಲ್ಲೂ ಪ್ರತ್ಯಕ್ಷ ಕೈ ಹಾಕುವ ಅಧಿಕಾರ ಇರಬೇಕಾಗಿಲ್ಲ. ಸಾಮಾನ್ಯವಾಗಿ ಕುಟುಂಬ ವೈದ್ಯರು ತಮ್ಮ ಸಂಪರ್ಕಕ್ಕೆ ಬಂದ ರೋಗಿಗಳಲ್ಲಿ ಅಗತ್ಯ ಇರುವವರಿಗೆ, ಉನ್ನತ ಶ್ರೇಣಿಯ ಆಸ್ಪತ್ರೆಗಳಿಗೆ ಕಳುಹಿಸಿ ಕೊಡುವ ಕ್ರಮವಿದೆ. ತಾವೇ ಕಳುಹಿಸಿ ಕೊಟ್ಟ ರೋಗಿಗಳು ಅಲ್ಲಿ ಒಳರೋಗಿಗಳಾಗಿ ಮಲಗಿದ್ದರೆ ಅವರನ್ನು ನೋಡಿ ಯೋಗಕ್ಷೇಮವನ್ನು ವಿಚಾರಿಸುವ ಅವಕಾಶವೂ ಕಳುಹಿಸಿದ ವೈದ್ಯರಿಗೆ ಇರಬೇಕು. ಹೀಗೆ ನಿರಂತರ ಸಂಪರ್ಕವನ್ನು ಉಳಿಸಿಕೊಳ್ಳುವುದರಿಂದ ಸುಲಭವಾಗಿ ಕಲಿಕೆಯನ್ನು ಆಗಾಗ ಊರ್ಜಿತಗೊಳಿಸಿಕೊಳ್ಳುವುದಕ್ಕೆ ವೈದ್ಯರಿಗೆ ಸಾಧ್ಯವಾಗಬಹುದು. ಇದಕ್ಕೆ ನಿರ್ದಿಷ್ಟವಾದ ಇತರ ನಿರ್ಬಂಧವೇನು ಬೇಕಾಗಿಲ್ಲ. ಈಗಾಗಲೇ ಕೆಲವು ಆಸ್ಪತ್ರೆಗಳಲ್ಲಿ ಇದು ಆಚರಣೆಯಲ್ಲಿದ್ದರೆ ಮುಂದುವರಿಸಬಹುದು. ಇಲ್ಲದೆ ಇದ್ದರೆ ಇದನ್ನು ಅಳವಡಿಸುವುದು ಉಚಿತ.

ಡಾ| ರಮಾನಂದ ಬನಾರಿ, ಮಂಜೇಶ್ವರ