ವಿದೇಶಿಯರು ಐಪಿಎಲ್ ಆಡಬೇಕು, ಭಾರತೀಯರು ಯಾಕೆ ವಿದೇಶಿ ಕೂಟಗಳಲ್ಲಿ ಆಡಬಾರದು?

ಕೀರ್ತನ್ ಶೆಟ್ಟಿ ಬೋಳ, May 15, 2020, 6:00 PM IST

ವಿಶ್ವದಾದ್ಯಂತ ಕೋವಿಡ್-19 ವೈರಸ್ ತನ್ನ ಅಟ್ಟಹಾಸ ಆರಂಭಿಸಿದ ಬಳಿಕ ಎಲ್ಲ ಕ್ರೀಡಾ ಚಟುವಟಕೆಗಳು ಸ್ಥಗಿತವಾಗಿದೆ. ವಿಶ್ವಕ್ರಿಕೆಟ್ ಎದುರು ನೋಡುತ್ತಿದ್ದ ಐಪಿಎಲ್ ಸೀಸನ್ 13 ಕೂಡಾ ಕೋವಿಡ್ ಸೋಂಕಿನ ಕಾರಣ ಮುಂದೂಡಿಕೆಯಾಗಿದೆ. ಮುಂದೆ ಈ ವರ್ಷ ನಡೆಯುವ ಭರವಸೆಯೂ ಇಲ್ಲ. ನಿರಂತರ ಮೈದಾನದಲ್ಲಿ ಬೆವರು ಹರಿಸುತ್ತಿದ್ದ ಕ್ರೀಡಾಪಟುಗಳು ಸದ್ಯ ಮನೆಯಲ್ಲಿದ್ದಾರೆ. ಈ ಸಮಯದಲ್ಲಿ ಸಾಮಾಜಿಕ ಜಾಲತಾಣಗಳ ಮೂಲಕ ಲೈವ್ ಬಂದು ಹಲವಷ್ಟು ವಿಚಾರಗಳನ್ನು ಹಂಚಿಕೊಳ್ಳುತ್ತಿದ್ದಾರೆ.

ಈ ಮಧ್ಯೆ ಸುರೇಶ್ ರೈನಾ ಮತ್ತು ಇರ್ಫಾನ್ ಪಠಾಣ್ ಲೈವ್ ನಲ್ಲಿ ಭಾರತೀಯ ಆಟಗಾರರು ವಿದೇಶಿ ಕೂಟಗಳಲ್ಲಿ ಆಡುವ ಕುರಿತು ಚರ್ಚೆ ನಡೆಸಿದ್ದರು. ಭಾರತೀಯರಿಗೆ ವಿದೇಶದಲ್ಲಿ ಹೋಗಿ ಟಿ20 ಕೂಟ ಆಡಲು ಅವಕಾಶ ನೀಡಬೇಕೆಂದು ರೈನಾ ಹೇಳಿದ್ದರು. ಇದು ಈಗ ಚರ್ಚೆಗೆ ಗ್ರಾಸವಾಗಿದೆ.

ಬಿಸಿಸಿಐ ಅಡಿ ಬರುವ ಯಾವುದೇ ಭಾರತೀಯ ಆಟಗಾರ ವಿದೇಶಿ ಕೂಟಗಳಲ್ಲಿ ಭಾಗವಹಿಸುವಂತಿಲ್ಲ. ಒಂದು ವೇಳೆ ಭಾಗವಹಿಸಿದರೆ ಮತ್ತೆ ಬಿಸಿಸಿಐ ಅಡಿ ಆಡಲು ಅವಕಾಶವಿಲ್ಲ. ಇಂಗ್ಲೀಷ್ ಕೌಂಟಿಗಳಲ್ಲಿ ಆಡಲು ಅವಕಾಶವಿದೆ. (ಟೆಸ್ಟ್ ಕ್ರಿಕೆಟ್- ಬಿಸಿಸಿಐ ಅನುಮತಿ ಬೇಕು) ಇತರ ಯಾವುದೇ ಟಿ20 ಕೂಟಗಳಲ್ಲಿ ಭಾರತೀಯರು ಆಡುವಂತಿಲ್ಲ. ಒಂದು ವೇಳೆ ಆಡಲೇ ಬೇಕಾದರೆ ಬಿಸಿಸಿಐ ಗೆ ರಾಜೀನಾಮೆ ನೀಡಬೇಕು. ಅಂದರೆ ಬಿಸಿಸಿಐ ಅಡಿ ಯಾವುದೇ ಐಪಿಎಲ್, ಟೀಂ ಇಂಡಿಯಾ, ರಣಜಿ ಆಡುವಂತಿಲ್ಲ. ಯುವರಾಜ್ ಸಿಂಗ್ ಬಿಸಿಸಿಐಗೆ ಅನುಮತಿ ನೀಡಿ ಕೆನಡಾ ದ ಕೂಟದಲ್ಲಿ ಆಡಿದ್ದನ್ನು ಇಲ್ಲಿ ನೆನಪಿಸಬಹುದು.

ಸುರೇಶ್ ರೈನಾ ಹೇಳುವ ಪ್ರಕಾರ ಬಿಸಿಸಿಐ ಗುತ್ತಿಗೆಯಲ್ಲಿ ಇರದ ಆಟಗಾರರಿಗೆ ವಿದೇಶಿ ಕೂಟಗಳಲ್ಲಿ ಆಡುವ ಅವಕಾಶ ನೀಡಬೇಕು. (ಪ್ರಸ್ತುತ ಟೀಂ ಇಂಡಿಯಾದಲ್ಲಿ ಆಡುತ್ತಿರುವ 25-30 ಮಂದಿ ಆಟಗಾರರು ಗುತ್ತಿಗೆಯಲ್ಲಿ ಇರುತ್ತಾರೆ)

ಸುರೇಶ್ ರೈನಾ, ರಾಬಿನ್ ಉತ್ತಪ್ಪ ಮುಂತಾದ ಆಟಗಾರರು ಒಂದು ಕಾಲದಲ್ಲಿ ಟೀಂ ಇಂಡಿಯಾದಲ್ಲಿ ಮಿಂಚಿದವರು. ಆದರೆ ಈಗ ಅವಕಾಶಕ್ಕಾಗಿ ಕಾಯುತ್ತಿದ್ದಾರೆ. ಇಂತಹ ಆಟಗಾರರಿಗೆ ಟೀಂ ಇಂಡಿಯಾದಲ್ಲಿ ಸ್ಥಾನ ಸಿಗುತ್ತಿಲ್ಲ. ರಾಜ್ಯ ಮಂಡಳಿಗಳಲ್ಲೂ ಬಹಳಷ್ಟು ಪೈಪೋಟಿಯಿದೆ. ಯುವ ಆಟಗಾರರೇ ತುಂಬಿದ್ದಾರೆ. ರಣಜಿ ತಂಡಗಳಲ್ಲೂ ಸರಿಯಾದ ಸ್ಥಾನಮಾನ ಈ ಹಿರಿಯರಿಗೆ ಸಿಗುತ್ತಿಲ್ಲ. ಹಾಗಾಗಿ ಕೆಲವರು ರಾಜ್ಯ ತಂಡವನ್ನೇ ಬದಲಾವಣೆ ಮಾಡಿಕೊಳ್ಳುತ್ತಿದ್ದಾರೆ.

ಟೀಂ ಇಂಡಿಯಾ ಹೊರತು ಪಡಿಸಿ ಬೇರೆ ಎಲ್ಲೂ ಇಂತಹ ಸಂಪ್ರದಾಯವಿಲ್ಲ. ಇತರ ಎಲ್ಲಾ ದೇಶಗಳ ಆಟಗಾರರು ನಮ್ಮ ಐಪಿಎಲ್ ನಲ್ಲಿ ಆಡುತ್ತಾರೆ. ಇಲ್ಲಿನ ಸ್ಪರ್ಧಾತ್ಮಕತೆ ಹೆಚ್ಚಾಗಿರುವ ಕಾರಣ ಉತ್ತಮ ಕ್ರಿಕೆಟ್ ಆಡುತ್ತಾರೆ. ಉಪಖಂಡದ ಪಿಚ್ ಗಳ ಬಗ್ಗೆ, ಹವಾಗುಣದ ಬಗ್ಗೆ ತಿಳಿದುಕೊಳ್ಳುತ್ತಾರೆ. ಅದು ಅವರಿಗೆ ರಾಷ್ಟ್ರೀಯ ತಂಡದಲ್ಲೂ ಉಪಯೋಗವಾಗುತ್ತದೆ.

ಇಂಗ್ಲೆಂಡ್ ತಂಡದಲ್ಲಿ ಮಧ್ಯಮ ಕ್ರಮಾಂಕದಲ್ಲಿ ಆಡುತ್ತಿದ್ದ ಜೋಸ್ ಬಟ್ಲರ್ ಐಪಿಎಲ್ ನಲ್ಲಿ ಆರಂಭಿಕನಾಗಿ ಭರ್ಜರಿ ಯಶಸ್ಸು ಕಂಡರು. ನಂತರ ಇಂಗ್ಲೆಂಡ್ ತಂಡದಲ್ಲೂ ಆರಂಭಿಕ ಆಟಗಾರನಾದರು. ಕೇವಲ ಬೌಲರ್ ಆಗಿದ್ದ ಸುನೀಲ್ ನರೈನ್ ಐಪಿಎಲ್ ಕಾರಣದಿಂದ ಆಲ್ ರೌಂಡರ್ ಆದರು. ಐಪಿಎಲ್ ನಂತಹ ಕ್ರಿಕೆಟ್ ಕೂಟಗಳಿಂದ ಯುವ ಆಟಗಾರರು ಹಿರಿಯ ಆಟಗಾರರೊಂದಿಗೆ ಬಹಳಷ್ಟು ವಿಚಾರಗಳನ್ನು ಕಲಿಯುತ್ತಾರೆ. ಫಾರ್ಮ್ ಕಳೆದುಕೊಂಡಿರುವ ಆಟಗಾರ ಇಂತಹ ಕೂಟಗಳಲ್ಲಿ ಲಯಕ್ಕೆ ಮರಳುತ್ತಾರೆ. ಒಂದು ವೇಳೆ ಭಾರತೀಯ ಆಟಗಾರರು ವಿದೇಶಿ ಕೂಟಗಳಲ್ಲಿ ಆಡಿ ಉತ್ತಮ ಪ್ರದರ್ಶನ ತೋರಿದರೆ ಟೀಂ ಇಂಡಿಯಾಗೂ ಆಯ್ಕೆಯಾಗಬಹುದು.

ಒಂದು ವೇಳೆ ಬಿಸಿಸಿಐ ತನ್ನ ಆಟಗಾರರಿಗೆ ವಿದೇಶಿ ಕೂಟಗಳಲ್ಲಿ ಆಡಲು ಅವಕಾಶ ನೀಡಿದರೆ ಆಸ್ಟ್ರೇಲಿಯಾದ ಬಿಬಿಎಲ್, ಬಾಂಗ್ಲಾದೇಶದ ಬಿಪಿಎಲ್, ವೆಸ್ಟ್ ಇಂಡೀಸ್ ನ ಸಿಪಿಎಲ್ ಮುಂತಾದ ಪ್ರಮುಖ ಲೀಗ್ ಗಳು ಖಂಡಿತ ಅವಕಾಶ ನೀಡಬಹುದು.

ಆದರೆ ಇಲ್ಲಿ ಒಂದು ಸಮಸ್ಯೆಯೂ ಇದೆ. ಈ ಆಟಗಾರರು ವಿದೇಶಿ ಟಿ20 ಕೂಟದಲ್ಲಿ ಸಿಗುವ ಹಣ ಮೋಜಿನ ಕಾರಣದಿಂದ ಮತ್ತೆ ದೇಶಿಯ ತಂಡದಲ್ಲಿ ಸರಿಯಾದ ಪ್ರದರ್ಶನ ನೀಡುವುದಿಲ್ಲ. ವೆಸ್ಟ್ ಇಂಡೀಸ್ ಆಟಗಾರರನ್ನೇ ಇಲ್ಲಿ ಉದಾಹರಣೆಯಾಗಿ ಪರಿಗಣಿಸಬಹುದು.

ಕೀರ್ತನ್ ಶೆಟ್ಟಿ ಬೋಳ