BBK11: ಮಾತನ್ನೇ ಬಂಡವಾಳ ಆಗಿಸಿಕೊಂಡಿದ್ದ ಪ್ರಬಲ ಸ್ಪರ್ಧಿ ಬಿಗ್ ಬಾಸ್ ಮನೆಯಿಂದ ಎಲಿಮಿನೇಟ್

Team Udayavani, Jan 12, 2025, 7:29 AM IST

ಬೆಂಗಳೂರು: ಬಿಗ್ ಬಾಸ್ ಮನೆಯಿಂದ ಪ್ರಬಲ ಸ್ಪರ್ಧಿಯಾಗಿ ಗುರುತಿಸಿಕೊಂಡವರು ಫಿನಾಲೆಗೆ ಕೆಲವೇ ದಿನಗಳು ಬಾಕಿ ಇರುವಾಗಲೇ ಎಲಿಮಿನೇಟ್ ಆಗಿದ್ದಾರೆ.

ಬಿಗ್ ಬಾಸ್ ಕನ್ನಡ -11 ಗೆ ಇನ್ನು ಎರಡು ವಾರಗಳು ‌ಮಾತ್ರ ಬಾಕಿಯಿದೆ.  ಪ್ರಬಲ ಸ್ಪರ್ಧಿಗಳು ಈ ವಾರ ನಾಮಿನೇಟ್ ಆಗಿದ್ದಾರೆ. ಇದರಲ್ಲಿ ಒಬ್ಬರು ಆಚೆ ಬಂದಿದ್ದಾರೆ.

ಫಿನಾಲೆಗೆ ಕೆಲವೇ ದಿನಗಳಿವೆ. ಫಿನಾಲೆ ಮೊದಲ ಸ್ಪರ್ಧಿಯಾಗಿ ಹನುಮಂತು ಪ್ರವೇಶ ಪಡೆದಿದ್ದಾರೆ. ಆ ಮೂಲಕ ಮನೆಯ ಅಲ್ಟಿಮೇಟ್ ಕ್ಯಾಪ್ಟನ್ ಆಗಿದ್ದಾರೆ. ಹನುಮಂತು ಫಿನಾಲೆವರೆಗೂ ಯಾವುದೇ ಟೆನ್ಷನ್  ಇಲ್ಲದೆ ಹಾಯಾಗಿ ಮನೆಯಲ್ಲಿರಬಹುದು. ಆದರೆ ಉಳಿದ ಸ್ಪರ್ಧಿಗಳಿಗೆ ತಲೆನೋವು ಶುರುವಾಗಿದೆ. ಅದರಲ್ಲೂ ನಾಮಿನೇಟ್ ಆಗಿರುವ ಸ್ಪರ್ಧಿಗಳಿಗೆ  ಈ ವಾರ ಹೇಗಾದರೂ ಮಾಡಿ‌ ಉಳಿಯಬೇಕು ಎಂದು ಶತ ಪ್ರಯತ್ನ ಮಾಡುತ್ತಿದ್ದಾರೆ.

ನಾಮಿನೇಟ್ ಆಗಿರುವವರ ಅಳಿವು – ಉಳಿವು ವೀಕ್ಷಕರ ಕೈಯಲ್ಲಿದೆ. ವೀಕ್ಷಕರು ಹೆಚ್ಚು ವೋಟ್ ಮಾಡಿ ಭವ್ಯಾ ಅವರನ್ನು ಸೇಫ್ ಮಾಡಿದ್ದಾರೆ. ಉಳಿದಿರುವ ಧನರಾಜ್, ಮೋಕ್ಷಿತಾ, ಚೈತ್ರಾ, ತಿವಿಕ್ರಮ್ ಅವರ‌ ಎದೆಯಲ್ಲಿ ಢವ ಢವ ಜೋರಾಗಿಯೇ ಶುರುವಾಗಿದೆ.

ಈ ವಾರ ಬಿಗ್ ಬಾಸ್ ಮನೆಯಲ್ಲಿ ಶಾಕಿಂಗ್ ಎಲಿಮಿನೇಷನ್ ‌ನಡೆಯಲಿದೆ‌‌ ಎನ್ನಲಾಗಿತ್ತು. ಒಬ್ಬರಲ್ಲ ಇಬ್ಬರು ಹೋಗಬಹುದು ಎನ್ನುವ ಮಾತುಗಳು ಕೇಳಿ ಬಂದಿತ್ತು.

ಇದೀಗ ಹೊರಬಿದ್ದಿರುವ‌ ಮಾಹಿತಿಯ ಪ್ರಕಾರ ಚೈತ್ರಾ ಕುಂದಾಪುರ ಅವರು ದೊಡ್ಮನೆಯಿಂದ ನಿರ್ಗಮಿಸಿದ್ದಾರೆ ಎನ್ನಲಾಗಿದೆ.

ನೂರಕ್ಕೂ ಹೆಚ್ಚಿನ ದಿನ ಬಿಗ್ ಬಾಸ್ ಆಟದಲ್ಲಿದ್ದು ಏಳು – ಬೀಳಿನ ಪಯಣವನ್ನು ಕಂಡು ವಿವಾದಕ್ಕೆ ಸಿಲುಕಿದ್ದರೂ ಮಾತನ್ನೇ ಬಂಡವಾಳವಾಗಿಸಿಕೊಂಡಿದ್ದ ‘ಫೈಯರ್ ಬ್ರ್ಯಾಂಡ್’ ಖ್ಯಾತಿಯ ಚೈತ್ರಾ ಅವರು ಮನೆಯಿಂದ ಆಚೆ ಬಂದಿದ್ದಾರೆ.

ಇತ್ತೀಚೆಗೆ ಚೈತ್ರಾ ಅವರು ತನ್ನ ತಾಯಿ ಹಾಗೂ ಸಹೋದರಿ ‌ದೊಡ್ಮನೆಗೆ ಬಂದ ಬಳಿಕ ಪ್ರಬಲರಾಗಿ ಮನೆಯಲ್ಲಿ ಹೆಚ್ಚಾಗಿ ಕಾಣಿಸಿಕೊಂಡಿದ್ದರು. ಇದಲ್ಲದೆ ಅವರಿಗೆ ಮನೆಮಂದಿ ಉತ್ತಮ ಸ್ಪರ್ಧಿ ಪದಕವನ್ನು ನೀಡಿದ್ದರು.

ಬಿಗ್ ಬಾಸ್ ಮನೆಯಲ್ಲಿ ಹಲವು ಬಾರಿ ಕಳಪೆ ಪಡೆದುಕೊಂಡರೂ ಅವೆಲ್ಲಕ್ಕೂ ತನ್ನ ಮಾತಿನ ಮೂಲಕ ಉತ್ತರ ಕೊಟ್ಟು‌ ಜನಮನ್ನಣೆಯನ್ನು ಗಳಿಸಿದ್ದರು.

ಈ ಹಿಂದೆ ಚೈತ್ರಾ ಅವರನ್ನು ಪ್ರ್ಯಾಂಕ್ ಎಲಿಮಿನೇಷನ್ ಮಾಡಲಾಗಿತ್ತು. ‌ಆ ವೇಳೆ ವೀಕ್ಷಕರು ಶಾಕ್ ಆಗಿದ್ದರು.‌ ಈ ಬಾರಿ ಚೈತ್ರಾ ಅವರು‌ ನೇರವಾಗಿ ಮನೆಗೆ ಹೋಗಿದ್ದಾರೆ.