ಸುದೀಪ್‌ ಬರ್ತ್‌ಡೇಗೆ ಅಭಿಮಾನಿಗಳಿಗೆ 3 ಗಿಫ್ಟ್

Team Udayavani, Aug 30, 2017, 10:32 AM IST

ಸೆಪ್ಟೆಂಬರ್‌ 02 ಸುದೀಪ್‌ ಹುಟ್ಟುಹಬ್ಬ. ಪ್ರತಿ ವರ್ಷ ಸುದೀಪ್‌ ಹುಟ್ಟುಹಬ್ಬವೆಂದರೆ ಅವರ ಅಭಿಮಾನಿಗಳ ಪಾಲಿಗೆ ದೊಡ್ಡ ಹಬ್ಬ. ಸೆಪ್ಟೆಂಬರ್‌ 01ರ ಮಧ್ಯರಾತ್ರಿಯಿಂದಲೇ ಜೆ.ಪಿ.ನಗರದ ಅವರ ಮನೆಮುಂದೆ ಕಟೌಟ್‌, ಸ್ಟಾರ್‌ ಕಟ್ಟುವ ಅಭಿಮಾನಿಗಳ ಆಸೆ ಈ ಬಾರಿ ಈಡೇರುವುದಿಲ್ಲ. ಅದಕ್ಕೆ ಕಾರಣ ಸುದೀಪ್‌ ನಿರ್ಧಾರ. “ನಾನು ಇನ್ನು ಮುಂದೆ ಹುಟ್ಟುಹಬ್ಬ ಆಚರಿಸುವುದಿಲ್ಲ. ನನ್ನ ಹುಟ್ಟುಹಬ್ಬಕ್ಕೆ ಖರ್ಚು ಮಾಡುವ ದುಡ್ಡನ್ನು ಬೇರೆ ಕೆಲಸಗಳಿಗೆ ಬಳಸಿ’ ಎಂದು ಕೆಲ ದಿನಗಳ ಹಿಂದೆ ಸುದೀಪ್‌ ಹೇಳಿದ್ದರು. ಅಲ್ಲಿಗೆ ಸುದೀಪ್‌ ಮನೆ ಬಳಿ ಅಭಿಮಾನಿಗಳು ಹೋದರೂ ಅಲ್ಲಿ ಸುದೀಪ್‌ ಸಿಗೋದಿಲ್ಲ ಎಂಬುದು ಕಾತರಿಯಾಗಿದೆ.

ಹಾಗಂತ ಸುದೀಪ್‌ ಹುಟ್ಟುಹಬ್ಬ ಆಚರಿಸಲು ಅವಕಾಶವಿಲ್ಲವೆಂದು ಅಭಿಮಾನಿಗಳು ಬೇಸರಿಸಿಕೊಳ್ಳಬೇಕಿಲ್ಲ. ಏಕೆಂದರೆ, ಸುದೀಪ್‌ ಅವರ ಮೂರು ಸಿನಿಮಾಗಳಿಂದ ಅಭಿಮಾನಿಗಳಿ ಭರ್ಜರಿ ಗಿಫ್ಟ್ ಸಿಗಲಿದೆ. ಹೌದು, ಸುದೀಪ್‌ ಅವರು ನಟಿಸಿರುವ ಹಾಗೂ ನಟಿಸಲಿರುವ ಮೂರು ಸಿನಿಮಾಗಳ ಟೀಸರ್‌, ಮೋಶನ್‌ ಪೋಸ್ಟರ್‌ ಹಾಗೂ ಫ‌ಸ್ಟ್‌ಲುಕ್‌ ರಿಲೀಸ್‌ ಆಗಲಿವೆ. ಈಗಾಗಲೇ ಸುದೀಪ್‌ “ದಿ ವಿಲನ್‌’ ಚಿತ್ರದಲ್ಲಿ ನಟಿಸಿದ್ದು, “ವಿಲನ್‌’ ತಂಡ ಸುದೀಪ್‌ ಬರ್ತ್‌ಡೇಗೆ ಮೋಶನ್‌ ಪೋಸ್ಟರ್‌ವೊಂದನ್ನು ಉಡುಗೊರೆಯಾಗಿ ಬಿಡುಗಡೆ ಮಾಡಲಿದೆ.

ಮಧ್ಯರಾತ್ರಿ 12 ಗಂಟೆಗೆ ಈ ಮೋಶನ್‌ ಪೋಸ್ಟರ್‌ ಬಿಡುಗಡೆಯಾಗಲಿದ್ದು, ಈ ಮೂಲಕ ಅಭಿಮಾನಿಗಳು ಖುಷಿಯಾಗಿದ್ದಾರೆ. ಇನ್ನು, ಸುದೀಪ್‌ ಅವರು “ರಾಜು ಕನ್ನಡ ಮೀಡಿಯಂ’ ಚಿತ್ರದ ವಿಶೇಷ ಪಾತ್ರವೊಂದರಲ್ಲಿ ಸುದೀಪ್‌ ನಟಿಸಿದ್ದು, ಸಖತ್‌ ಸ್ಟೈಲಿಶ್‌ ಲುಕ್‌ನಲ್ಲಿ ಕಾಣಿಸಿಕೊಂಡಿರೋದು ನಿಮಗೆ ಗೊತ್ತೇ ಇದೆ. ಸುದೀಪ್‌ ಹುಟ್ಟುಹಬ್ಬಕ್ಕೆ ಉಡುಗೊರೆಯಾಗಿ ಟೀಸರ್‌ವೊಂದನ್ನು “ರಾಜು ಕನ್ನಡ ಮೀಡಿಯಂ’ ತಂಡ ಬಿಡುಗಡೆ ಮಾಡಲಿದೆ.

ಇದು ಎರಡು ಸಿನಿಮಾಗಳ ವಿಷಯವಾದರೆ, “ಹೆಬ್ಬುಲಿ’ ನಂತರ ಮತ್ತೆ ಸುದೀಪ್‌ ಸಿನಿಮಾ ಮಾಡುತ್ತಿರುವ ನಿರ್ದೇಶಕ ಕೃಷ್ಣ ಅಂದು ತಮ್ಮ ಚಿತ್ರದ ಫ‌ಸ್ಟ್‌ಲುಕ್‌ ರಿಲೀಸ್‌ ಮಾಡಲಿದ್ದಾರೆ. ಈಗಾಗಲೇ ಬ್ಯಾಂಕಾಕ್‌ನಲ್ಲಿ ಫೋಟೋಶೂಟ್‌ ಆಗಿದ್ದು, ಬಾಕ್ಸಿಂಗ್‌ ಸುತ್ತ ಈ ಚಿತ್ರ ಮಾಡುತ್ತಿದ್ದಾರೆ ಕೃಷ್ಣ. ಹೀಗೆ ಒಂದೇ ದಿನ ಸುದೀಪ್‌ ಅವರ ಮೂರು ಸಿನಿಮಾಗಳ ವಿಭಿನ್ನ ಗೆಟಪ್‌ಗ್ಳನ್ನು ಕಣ್ತುಂಬಿಕೊಳ್ಳುವ ಅವಕಾಶ ಅಭಿಮಾನಿಗಳಿಗೆ ಸಿಗುತ್ತಿದೆ. ಹಾಗಾಗಿ, ಹುಟ್ಟುಹಬ್ಬ ದಿನ ದಿನ ಸುದೀಪ್‌ ಮನೆ ಬಳ ಸಿಗದೇ ಹೋದರೂ ಅವರ ಸಿನಿಮಾಗಳ ಅಪ್‌ಡೇಟ್‌ ಅಭಿಮಾನಿಗಳಿಗೆ ಸಿಗಲಿದೆ.