ಅಂಬರೀಶ್‌ ಆಗಿ ನಟಿಸೋದು ಸವಾಲಿನ ಕೆಲಸ

Team Udayavani, Jun 11, 2018, 10:52 AM IST

ಅತ್ತ ಕಡೆ “ಅಂಬಿ ನಿಂಗೆ ವಯಸ್ಸಾಯ್ತೋ’, ಇತ್ತ ಕಡೆ “ಪೈಲ್ವಾನ್‌’, ಇನ್ನೊಂದು ಕಡೆ “ದಿ ವಿಲನ್‌’, ಮಗದೊಂದು ಕಡೆ “ಕೋಟಿಗೊಬ್ಬ-3′ … ಬಹುಶಃ ಯಾವ ವರ್ಷವೂ ಈ ಮಟ್ಟಿಗೆ ಸುದೀಪ್‌ ಸಾಲು ಸಾಲು ಸಿನಿಮಾಗಳಲ್ಲಿ ನಟಿಸಿರಲಿಲ್ಲ. ಆದರೆ, ಈ ವರ್ಷ ಸತತವಾಗಿ ಒಂದಲ್ಲ, ಒಂದು ಸಿನಿಮಾದ ಚಿತ್ರೀಕರಣದಲ್ಲಿ ಬಿಝಿಯಾಗಿದ್ದಾರೆ. ಅಂಬರೀಶ್‌ ಅವರು ಪ್ರಮುಖ ಭೂಮಿಕೆಯಲ್ಲಿರುವ “ಅಂಬಿ ನಿಂಗೆ ವಯಸ್ಸಾಯ್ತೋ’ ಚಿತ್ರದಲ್ಲಿ ಸುದೀಪ್‌ ಕೂಡಾ ನಟಿಸುತ್ತಿದ್ದಾರೆ.

ಅಂಬರೀಶ್‌ ಅವರ ಯೌವ್ವನದ ದಿನಗಳ ಪಾತ್ರವನ್ನು ಸುದೀಪ್‌ ಮಾಡುತ್ತಿದ್ದು, ಈಗಾಗಲೇ ಚಿತ್ರೀಕರಣ ಮುಗಿಸಿದ್ದಾರೆ ಸುದೀಪ್‌. ಈ ಮೂಲಕ “ಅಂಬಿ ನಿಂಗೆ ವಯಸ್ಸಾಯ್ತೋ’ ಚಿತ್ರೀಕರಣ ಮುಗಿದು ಹೋಗಿದೆ. ಸುದೀಪ್‌ ಇಲ್ಲಿ ಅಂಬರೀಶ್‌ ಆಗಿ ನಟಿಸಿರುವುದರಿಂದ ಸಾಕಷ್ಟು ಎಕ್ಸೆ„ಟ್‌ ಆಗಿದ್ದಾರೆ. ಚಿತ್ರೀಕರಣ ಮುಗಿದ ಹಿನ್ನೆಲೆಯಲ್ಲಿ ಸುದೀಪ್‌ ತಮ್ಮ ಅನುಭವನ್ನು ಹಂಚಿಕೊಂಡಿದ್ದಾರೆ. “ಯೌವ್ವನದ ಅಂಬಿಯಾಗಿ ನಟಿಸಿರುವುದು ಖುಷಿಕೊಟ್ಟಿದೆ.

ಅಂಬರೀಶ್‌ ಅವರ ಬಾಡಿ ಲಾಂಗ್ವೇಜ್‌, ಮ್ಯಾನರೀಸಂ ಅನ್ನು ಅನುಕರಿಸೋದು ನಿಜಕ್ಕೂ ಸವಾಲಿನ ಕೆಲಸ. ಅಂಬರೀಶ್‌ ಆಗೋದು ಎಷ್ಟು ಕಷ್ಟವೆಂದು ಮನವರಿಕೆಯಾಯಿತು. ಹಾಗಾಗಿ, ನನ್ನದೇ ಶೈಲಿಯಲ್ಲಿ ಪಾತ್ರ ನಿರ್ವಹಿಸಿದ್ದೇನೆ’ ಎಂದು ಹೇಳುವ ಅಂಬಿ ಪಾತ್ರದ ಹೇಳಿದ್ದಾರೆ. ಚಿತ್ರವನ್ನು ಜಾಕ್‌ ಮಂಜು ನಿರ್ಮಿಸುತ್ತಿದ್ದಾರೆ.  ಈ ಚಿತ್ರವನ್ನು ಗುರುದತ್‌ ಗಾಣಿಗ ನಿರ್ದೇಶನ ಮಾಡುತ್ತಿದ್ದಾರೆ. ಈ ಹಿಂದೆ ಸುದೀಪ್‌ ಅವರ ಜೊತೆ ಸಹಾಯಕ ನಿರ್ದೇಶಕರಾಗಿದ್ದ ಗುರುದತ್‌ ಅವರಿಗೆ ನಿರ್ದೇಶಕರಾಗಿ ಇದು ಚೊಚ್ಚಲ ಸಿನಿಮಾ.  

ಚಿತ್ರದಲ್ಲಿ ಸುದೀಪ್‌ಗೆ ಜೋಡಿಯಾಗಿ ಶ್ರುತಿ ಹರಿಹರನ್‌ ನಟಿಸಿದ್ದಾರೆ. ಅರ್ಜುನ್‌ ಜನ್ಯಾ ಸಂಗೀತ, ಜೆಬಿನ್‌ ಜಾಕೋಬ್‌ ಛಾಯಾಗ್ರಹಣ ಚಿತ್ರಕ್ಕಿದೆ. ಇತ್ತ ಕಡೆ ಸುದೀಪ್‌ ಹಾಗೂ ಶಿವರಾಜಕುಮಾರ್‌ ಕಾಂಬಿನೇಶನ್‌ನಲ್ಲಿ ಬರುತ್ತಿರುವ “ದಿ ವಿಲನ್‌’ ಚಿತ್ರದ ಚಿತ್ರೀಕರಣ ಮುಗಿದಿದ್ದು, ಸದ್ಯದಲ್ಲೇ ಟೀಸರ್‌ ಬಿಡುಗಡೆಯಾಗಲಿದೆ. ಇನ್ನು, ಸುಮಾರು 15 ದಿನಗಳ ಕಾಲ “ಪೈಲ್ವಾನ್‌’ ಚಿತ್ರದ ಚಿತ್ರೀಕರಣ ಕೂಡಾ ನಡೆದಿದೆ. ಇತ್ತ ಕಡೆ “ಕೋಟಿಗೊಬ್ಬ-3′ ಚಿತ್ರೀಕರಣಕ್ಕೆ ಅಣಿಯಾಗಿದೆ.