ಟ್ವೆಂಟಿ ಟ್ವೆಂಟಿಗೆ ಕೋಮಲ್‌ ರೆಡಿ

Team Udayavani, Nov 3, 2020, 1:01 PM IST

ನಟ ಕೋಮಲ್‌ ಹೊಸ ಸಿನಿಮಾ ಒಪ್ಪಿಕೊಂಡಿರುವ ವಿಚಾರವನ್ನು ನೀವು ಈ ಹಿಂದೆ ಇದೇ ಬಾಲ್ಕನಿಯಲ್ಲಿ ಓದಿರುತ್ತೀರಿ. ಆದರೆ, ಆಗ ಆ ಚಿತ್ರಕ್ಕೆ ಟೈಟಲ್‌ ಇಟ್ಟಿರಲಿಲ್ಲ. ಈಗ ಚಿತ್ರಕ್ಕೆ ಟೈಟಲ್‌ ಅಂತಿಮವಾಗಿದೆ. ಅದು “ಟ್ವೆಂಟಿ ಟ್ವೆಂಟಿ’. ಹೀಗೊಂದು ವಿಭಿನ್ನ ಶೀರ್ಷಿಕೆಯ ಮೂಲಕ ಕೋಮಲ್‌ ಮತ್ತೆ ತೆರೆಮೇಲೆ ಬರಲು ಸಿದ್ಧರಾಗಿದ್ದಾರೆ.

“ಟ್ವೆಂಟಿ ಟ್ವೆಂಟಿ’ ಎಂಬ ಟೈಟಲ್‌ ಕೇಳಿದ ಕೂಡಲೇ ಇದು ಕ್ರಿಕೆಟ್‌ಗೆ ಸಂಬಂಧಿಸಿದ ಸಿನಿಮಾನಾ ಎಂಬ ಸಂದೇಹ ಬರಬಹುದು. ಖಂಡಿತಾ ಇದು ಕ್ರೀಡೆಗೆ ಸಂಬಂಧಪಟ್ಟ ಸಿನಿಮಾವಲ್ಲ. ಬದಲಾಗಿ ಔಟ್‌ ಅಂಡ್‌ ಔಟ್‌ ಕಾಮಿಡಿ ಸಿನಿಮಾ. ಕೆ.ಎಲ್‌. ರಾಜಶೇಖರ್‌ ಈ ಚಿತ್ರದ ನಿರ್ದೇಶಕರು. ಈ ಹಿಂದೆ ಸಿನಿಮಾ, ಕಾಮಿಡಿ ಶೋಗಳಿಗೆ ಡೈಲಾಗ್‌ ಬರೆದು, ಸೈ ಎನಿಸಿಕೊಂಡಿರುವ ರಾಜಶೇಖರ್‌ ಈಗ “ಟ್ವೆಂಟಿ ಟ್ವೆಂಟಿ’ ಚಿತ್ರದ ಮೂಲಕ ಸ್ವತಂತ್ರ ನಿರ್ದೇಶಕರಾಗುತ್ತಿದ್ದಾರೆ. ಮೊದಲ ಸಿನಿಮಾದಲ್ಲೇ ಪ್ರೇಕ್ಷಕರನ್ನು ನಗಿಸಲು ಮುಂದಾಗಿದ್ದಾರೆ.

ಕೋಮಲ್‌ ಕೂಡಾ ಕಥೆ ಕೇಳಿ ಫಿದಾ ಆಗಿದ್ದಾರೆ. ಈ ಚಿತ್ರವನ್ನು ಕ್ರಿಸ್ಟಲ್‌ ಪಾರ್ಕ್‌ ಸಿನಿಮಾಸ್‌ನಡಿ ಟಿ.ಆರ್‌.ಚಂದ್ರಶೇಖರ್‌ ನಿರ್ಮಿಸುತ್ತಿದ್ದಾರೆ. ಈಗಾಗಲೇ ಕನ್ನಡದಲ್ಲಿ ಹಲವು ಯಶಸ್ವಿ ಚಿತ್ರಗಳನ್ನು ನಿರ್ಮಿಸಿರುವ ಚಂದ್ರಶೇಖರ್‌ ಅವರಿಗೆ ಈ ಸಿನಿಮಾ ಮೇಲೆ ಸಿಕ್ಕಾಪಟ್ಟೆ ವಿಶ್ವಾಸವಿದೆ. ಸದ್ಯ ಚಂದ್ರಶೇಖರ್‌ ನಿರ್ಮಾಣದ “ಬುದ್ಧಿವಂತ 2′ ಹಾಗೂ “ಶೋಕಿವಾಲ’ ಚಿತ್ರಗಳು ತೆರೆಗೆ ಸಿದ್ಧವಾಗಿವೆ. ಈ ನಡುವೆಯೇ ಹೊಸ ಚಿತ್ರವನ್ನು ಅನೌನ್ಸ್‌ ಮಾಡಿದ್ದಾರೆ.

ಕೋಮಲ್‌ ಕಾಮಿಡಿ ನಟರಾಗಿ, ನಾಯಕರಾಗಿ ಬೇಡಿಕೆಯಲ್ಲಿದ್ದವರು. ಆದರೆ, ಕೋಮಲ್‌ ಸ್ವಲ್ಪ ಸಮಯ ಕಾಮಿಡಿ ಬದಿಗಿಟ್ಟು, ಆ್ಯಕ್ಷನ್‌ನತ್ತ ವಾಲಿದ್ದರು. ಈಗ ಮತ್ತೆ ತಮ್ಮ ಮೂಲಸ್ಥಾನಕ್ಕೆ ಮರಳಿದ್ದಾರೆ. ಈ ಮೂಲಕ ಮತ್ತೆ ಪ್ರೇಕ್ಷಕರಿಗೆ ಕಾಮಿಡಿ ಉಣಬಡಿಸಲಿದ್ದಾರೆ.