ಕಾಫಿ ಡೇಯಲ್ಲಿ ಭೇಟಿ…ಪೊಲೀಸ್‌ ಅಧಿಕಾರಿ ಮಗಳನ್ನೇ ಪ್ರೀತಿಸಿ, ವರಿಸಿದ್ದ ಚಿನ್ನಾರಿ ಮುತ್ತ..

Team Udayavani, Aug 7, 2023, 11:56 AM IST

ಬೆಂಗಳೂರು:  ಸ್ಯಾಂಡಲ್‌ ವುಡ್‌ ನಟ ವಿಜಯ್‌ ರಾಘವೇಂದ್ರ ಅವರ ಪತ್ನಿ ಸ್ಪಂದನಾ ಹೃದಯಾಘಾತದಿಂದ ನಿಧನರಾಗಿದ್ದಾರೆ. ಈ ಸುದ್ದಿ ಸ್ಯಾಂಡಲ್‌ ವುಡ್‌ ಗೆ ದೊಡ್ಡ ಆಘಾತವನ್ನು ನೀಡಿದೆ. ಅಪ್ಪು ಅವರನ್ನು ಕಳೆದುಕೊಂಡ ದುಃಖದಲ್ಲೇ ಇರುವ ಚಂದನವನ ಈಗ ಸ್ಪಂದನಾ ಅವರನ್ನು ಕಳೆದುಕೊಂಡು ದುಃಖದಲ್ಲಿ ಮುಳುಗಿದೆ.

ಪೊಲೀಸ್‌ ಅಧಿಕಾರಿಯ ಮಗಳನ್ನು ಪ್ರೀತಿಸಿ ಮದುವೆ ..

ಸ್ಪಂದನಾ ಅವರು ಮೂಲತಃ ದಕ್ಷಿಣ ಕನ್ನಡದ ಬೆಳ್ತಂಗಡಿ ಮೂಲದವರು ದಕ್ಷ ಸಹಾಯಕ ಪೊಲೀಸ್ ಆಯುಕ್ತ ಬಿ.ಕೆ.ಶಿವರಾಂ ಅವರ ಮಗಳಾಗಿರುವ ಸ್ಪಂದನಾ 2004 ರಲ್ಲಿ ಮೊದಲ ಬಾರಿಗೆ ಬೆಂಗಳೂರಿನ ಕಾಫಿ ಡೇಯಲ್ಲಿ  ವಿಜಯ್‌ ರಾಘವೇಂದ್ರ ಅವರನ್ನು ಭೇಟಿಯಾಗಿದ್ದರು. 2007 ರಲ್ಲಿ ಮತ್ತೆ ಭೇಟಿಯಾಗಿದ್ದ ವೇಳೆ ಅವರಿಬ್ಬರಲ್ಲಿ ಸ್ನೇಹ ಹುಟ್ಟಿತು. ಈ ಸ್ನೇಹ ಪ್ರೀತಿಗೆ ಬದಲಾಗಿ ಅದೇ ವರ್ಷದ ಆಗಸ್ಟ್‌ 26 ರಂದು ವಿವಾಹವಾಗಿದ್ದರು. ಗುರು ಹಿರಿಯರ ಸಮ್ಮುಖದಲ್ಲಿ ವಿವಾಹ ಸಮಾರಂಭ ನಡೆದಿತ್ತು.

ನಮ್ಮ ಮೊದಲ ಭೇಟಿಯಲ್ಲೇ ಸಂಗೀತದ ವಿಚಾರದಲ್ಲಿ ಗಲಾಟೆ ನಡೆಯುವಂತೆ ಸಂಭಾಷಣೆ ನಡೆದಿತ್ತೆಂದು ಟಿವಿ ಕಾರ್ಯಕ್ರಮದಲ್ಲಿ ಚಿನ್ನಾರಿ ಮುತ್ತ ತಮ್ಮ ಪ್ರೇಮಕಥೆಯನ್ನು ಹೇಳಿದ್ದರು. ಎರಡನೇ ಭೇಟಿಯಲ್ಲಿ ಸ್ಪಂದನಾ ಅವರನ್ನು ಆತ್ಮೀಯವಾಗಿ ಮಾತನಾಡಿಸಿದ್ದೆ ಎಂದು ವಿಜಯ್‌ ಈ ಹಿಂದಿನ ಸಂದರ್ಶನವೊಂದರಲ್ಲಿ ಹೇಳಿದ್ದರು.

ಆದರ್ಶ ದಂಪತಿ:  ವಿಜಯ್‌ ರಾಘವೇಂದ್ರ – ಸ್ಪಂದನಾ ಅವರ ದಾಂಪತ್ಯ ಜೀವನ ಇತರರಿಗೆ ಆದರ್ಶವಾಗುವಂತಿತ್ತು. ವಿಜಯ್‌ ರಾಘವೇಂದ್ರ ಅವರು ಬಿಗ್‌ ಬಾಸ್‌ ನಲ್ಲಿ ಭಾಗಿಯಾಗಿದ್ದ ವೇಳೆ ಪತ್ನಿಯನ್ನು ಸದಾ ನೆನೆಯುತ್ತಿದ್ದರು. ಪತಿಯ ಚಿತ್ರಕ್ಕೆ ಪ್ರೋತ್ಸಾಹ ಜೊತೆಗೆ ಅವರ  ಸೋಲು – ಗೆಲುವಿಗೆ ಬೆನ್ನಲುಬಾಗಿ ನಿಲ್ಲುತ್ತಿದ್ದರು. ಶೀಘ್ರದಲ್ಲಿ ತೆರೆಗೆ ಬರಲಿರುವ ಸುಹಾಸ್‌ ಕೃಷ್ಣ ಅವರ ʼಕದ್ದ ಚಿತ್ರʼ ಚಿತ್ರದ ಪ್ರಚಾರದಲ್ಲಿ ಸ್ಪಂದನಾ ಪತಿ ಜೊತೆ ಭಾಗಿಯಾಗಿದ್ದರು. ಈ ದಂಪತಿಗೆ ಶೌರ್ಯ ಎಂಬ ಮಗನಿದ್ದಾನೆ.

ಅತಿಥಿ ಪಾತ್ರದಲ್ಲಿ ನಟಿಯಾಗಿ ಬಣ್ಣದ ಲೋಕದಲ್ಲಿ..

ಪತಿಯ ಎಲ್ಲಾ ಸಿನಿಮಾಗಳಿಗೆ ಸದಾ ಸಹಕಾರ ನೀಡುತ್ತಿದ್ದ ಸ್ಪಂದನಾ ತಾವೂ ಕೂಡ ಬಣ್ಣದ ಲೋಕದಲ್ಲಿ ನಟಿಸಿದ್ದಾರೆ. 2016 ರಲ್ಲಿ ತೆರೆಗೆ ಬಂದ ಕ್ರೇಜಿಸ್ಟಾರ್‌ ರವಿಚಂದ್ರನ್‌ ಅವರ ʼಅಪೂರ್ವʼ ಚಿತ್ರದಲ್ಲಿ ನಟಿಸಿದ್ದರು.

ವಿವಾಹ ವಾರ್ಷಿಕೋತ್ಸವಕ್ಕೆ ಕೆಲವೇ ದಿನ ಬಾಕಿ…

ವಿಜಯ್‌ ರಾಘವೇಂದ್ರ ಅವರು ಪತ್ನಿಯನ್ನು ತುಂಬಾ ಪ್ರೀತಿಸುತ್ತಿದ್ದರು. ಅವರೊಂದಿಗೆ ಸುತ್ತಾಟದ ಕ್ಷಣಗಳನ್ನು,ಹಬ್ಬದ ದಿನದ ವಿಶೇಷತೆಯನ್ನು ಪತ್ನಿಯೊಂದಿಗಿನ ಫೋಟೋವನ್ನು ಹಂಚಿಕೊಂಡು ಸಂಭ್ರಮಿಸಿ, ಅಭಿಮಾನಿಗಳಿಗೆ ಶುಭಾಶಯವನ್ನು ಕೋರುತ್ತಿದ್ದರು. ʼಬೇರೆ ಏನು ಬೇಕು ನೀನು ಇರುವಾಗʼ ಎಂದು ಎಂಗೇಜ್ ಮೆಂಟ್‌ ಆದ ದಿನಕ್ಕೆ ಪತ್ನಿಯೊಂದಿಗಿನ ಫೋಟೋವನ್ನು ಈ ಹಿಂದೆ ಹಂಚಿಕೊಂಡಿದ್ದರು. ಆಗಸ್ಟ್‌ 26 ರಂದು 16ನೇ ವರ್ಷದ ವಿವಾಹ ವಾರ್ಷಿಕೋತ್ಸವ. ಈ ಸಂಭ್ರಮಕ್ಕೆ ಇನ್ನು 19 ದಿನಗಳು ಬಾಕಿಯಿದೆ. ಪ್ರತಿ ವರ್ಷದಂತೆ ಈ ವರ್ಷವೂ ವಿಶೇಷವಾಗಿ ಮದುವೆ ವಾರ್ಷಿಕೋತ್ಸವ ಆಚರಿಸಬೇಕೆಂದುಗೊಂಡಿದ್ದ ದಂಪತಿಯ ಬಾಳಲಿ ವಿಧಿ ಬೇರೆಯೇ ಆಟವನ್ನಾಡಿದೆ.