ಕೌರವನಿಗೆ ಜೊತೆಯಾದ ನಟಿ ಅನು ಪ್ರಭಾಕರ್‌

Team Udayavani, Feb 7, 2017, 11:49 AM IST

ರಘು ಮುಖರ್ಜಿಯವರೊಡನೆ ಮದುವೆಯಾದ ನಂತರ ಅನು ಪ್ರಭಾಕರ್‌ ಮುಖರ್ಜಿ ಅಭಿನಯದಿಂದ ದೂರವೇ ಉಳಿದಿದ್ದು ಮತ್ತು ಅವರು ಇದೀಗ “ತ್ರಿವೇಣಿ ಸಂಗಮ’ ಧಾರಾವಾಹಿಯಲ್ಲಿ ನಟಿಸುವ ಮೂಲಕ ಅಭಿನಯಕ್ಕೆ ವಾಪಸ್ಸಾಗಿದ್ದಾರೆ ಎಂದುಕೊಂಡರೆ ಅದು ತಪ್ಪು. ಬಹಳಷ್ಟು ಜನರಿಗೆ ಗೊತ್ತಿಲ್ಲದ ವಿಷಯವೇನೆಂದರೆ, “ತ್ರಿವೇಣಿ ಸಂಗಮ’ಕ್ಕಿಂತಲೂ ಮೊದಲೇ ಅನು ಪ್ರಭಾಕರ್‌ ಮುಖರ್ಜಿ ಬಣ್ಣ ಹಚ್ಚಿದ್ದಾರೆ ಎಂದು.

ಹೌದು, ಅನು ಪ್ರಭಾಕರ್‌ ಅವರು “ತ್ರಿವೇಣಿ ಸಂಗಮ’ ಧಾರಾವಾಹಿಯಲ್ಲಿ ನಟಿಸುವುದಕ್ಕಿಂತ ಮುನ್ನ, ಎಸ್‌. ಮಹೇಂದರ್‌ ನಿರ್ದೇಶನದ “ಒನ್ಸ್‌ ಮೋರ್‌ ಕೌರವ’ ಚಿತ್ರದಲ್ಲಿ ಅತಿಥಿ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ನರೇಶ್‌ ಗೌಡ ಮತ್ತು ಅನೂಷಾ ನಾಯಕ-ನಾಯಕಿಯಾಗಿ ಅಭಿನಯಿಸಿರುವ ಈ ಚಿತ್ರದಲ್ಲಿ ಒಂದು ಪ್ರಮುಖ ಅತಿಥಿ ಪಾತ್ರವಿತ್ತಂತೆ. ಅದನ್ನು ಯಾರಿಂದ ಮಾಡಿಸಬೇಕು ಎಂದು ನಿರ್ದೇಶಕ ಮಹೇಂದರ್‌ ಮತ್ತು ಛಾಯಾಗ್ರಾಹಕ ಕೃಷ್ಣ ಕುಮಾರ್‌ ತಲೆಗೆ ಹುಳ ಬಿಟ್ಟುಕೊಂಡಾಗ, ಹೊಳೆದ ಹೆಸರು ಅನು ಪ್ರಭಾಕರ್‌ ಅವರದ್ದು.

ಈ ಹಿಂದೆ ಮಹೇಂದರ್‌ ನಿರ್ದೇಶನದ “ಸ್ನೇಹ ಲೋಕ’ ಚಿತ್ರದಲ್ಲಿ ಅನು ನಾಯಕಿಯಾಗಿ ನಟಿಸಿದ್ದರು. ಅದೇ ಸ್ನೇಹದ ಮೇಲೆ ಕೇಳಿಕೊಂಡಾಗ, ಅನು ಸಹ ಒಪ್ಪಿಕೊಂಡಿದ್ದಾರೆ. ಸುಮಾರು ಏಳು ದಿನಗಳ ಕಾಲ ಸದ್ದಿಲ್ಲದೆ ಅಭಿನಯಿಸಿ ಬಂದಿದ್ದಾರೆ. “ಆ ಪಾತ್ರವನ್ನು ನಾನೇ ನಿರ್ವಹಿಸಬೇಕು ಎಂದು ಮಹೇಂದರ್‌ ಮತ್ತು ಕೃಷ್ಣ ಕುಮಾರ್‌ ಅವರು ಹೇಳಿದರು. ಹಾಗಾಗಿ ಅಭಿನಯಿಸಿದೆ. ಒಳ್ಳೆಯ ಅನುಭವವಾಯಿತು. ಮುಂದೆ ಸಹ ಒಳ್ಳೆಯ ಪಾತ್ರಗಳು ಸಿಕ್ಕರೆ, ನಟಿಸುವ ಬಗ್ಗೆ ಯೋಚಿಸುತ್ತೇನೆ’ ಎನ್ನುತ್ತಾರೆ ಅನು ಪ್ರಭಾಕರ್‌ ಮುಖರ್ಜಿ.