ಮಾನ್ವಿತಾ ಡಯೆಟ್‌ ವರ್ಕೌಟ್: ತೂಕ ಇಳಿಸಿಕೊಂಡ ‘ಟಗರು ಪುಟ್ಟಿ’

Team Udayavani, Apr 7, 2021, 8:25 AM IST

ಸಾಮಾನ್ಯವಾಗಿ ಹೀರೋಯಿನ್ಸ್‌ ತಮ್ಮ ಫಿಟ್ನೆಸ್‌ ಕಡೆಗೆ ಹೆಚ್ಚು ಗಮನ ಕೊಡುತ್ತಾರೆ ಅನ್ನೋದು ಎಲ್ಲರಿಗೂ ಗೊತ್ತಿರುವ ವಿಷಯ. ಬಹುತೇಕ ನಟಿಯರು ದಿನದ ಹೆಚ್ಚಿನ ಭಾಗವನ್ನು ಜಿಮ್‌, ಯೋಗ, ವರ್ಕೌಟ್‌, ಡಯೆಟ್‌ ಅಂತಲೇ ತಲೆಕೆಡಿಸಿ ಕೊಂಡಿರುತ್ತಾರೆ. ಇನ್ನು ನಟಿ ಮಾನ್ವಿತಾ ಕಾಮತ್‌ ಕೂಡ, ತಮ್ಮ ಫಿಟ್ನೆಸ್‌ ಕಡೆಗೆ ಹೆಚ್ಚಿನ ಮಹತ್ವ ಕೊಡುತ್ತಾರೆ. “ಟಗರು’ ಸಿನಿಮಾದ ಬಳಿಕ ಮಾನ್ವಿತಾ ಕೊಂಚ ದಪ್ಪ ಆಗಿದ್ದಾರೆ ಅನ್ನೋದು ಅವರನ್ನು ಹತ್ತಿರದಿಂದ ಬಲ್ಲವರ ಮಾತು.

ಇದೇ ಮಾತನ್ನು ಚಾಲೆಂಜ್‌ ಆಗಿ ತೆಗೆದುಕೊಂಡಿರುವ ಮಾನ್ವಿತಾ, ಲಾಕ್‌ ಡೌನ್‌ನಿಂದ ವರ್ಕೌಟ್ ಮತ್ತು ಡಯೆಟ್‌ ಶುರು ಮಾಡಿದ್ದರು. ಸುಮಾರು ಎಂಟು ತಿಂಗಳ ವರ್ಕೌಟ್ ಮತ್ತು ಡಯೆಟ್‌ ಬಳಿಕ ಮಾನ್ವಿತಾ ಕಾಮತ್‌ ಅಂದುಕೊಂಡಂತೆ, ಈಗ ತೆಳ್ಳಗೆ ಆಗಿದ್ದಾರೆ.

ಅಂದಹಾಗೆ, ಸ್ವತಃ ಮಾನ್ವಿತಾ ಅವರೇ, ಈ ವಿಷಯವನ್ನು ಸೋಶಿಯಲ್‌ ಮೀಡಿಯಾ ಮೂಲಕ ಹಂಚಿಕೊಂಡಿದ್ದಾರೆ.

“ಕಳೆದ ಎಂಟು ತಿಂಗಳಿಂದ ಡಯಟ್‌ ಮಾಡಿ ಈಗ ಫ‌ಲಿತಾಂಶ ಹೀಗೆ ಬಂದಿದೆ. ತೂಕ ಇಳಿಸುವ ತರಬೇತಿ. ಡಯಟ್‌ ಮತ್ತು ಫ‌ಲಿತಾಂಶ ಹೇಗಿದೆ ನೋಡಿ’ ಎಂದು ಬರೆದುಕೊಂಡಿರುವ ಮಾನ್ವಿತಾ, ಬ್ಲ್ಯಾಕ್‌ ಡ್ರೆಸ್‌ನಲ್ಲಿರುವ ತಮ್ಮ ಇತ್ತೀಚಿಗಿನ ಫೋಟೋವನ್ನು ಶೇರ್‌ ಮಾಡಿದ್ದಾರೆ.

ಇನ್ನು ಮಾನ್ವಿತಾ ಕಾಮತ್‌ ಹೊಸ ಲುಕ್‌ ಸೋಶಿಯಲ್‌ ಮೀಡಿಯಾದಲ್ಲಿ ಸಿನಿಪ್ರಿಯರು ಮತ್ತು ಸಿನಿಮಂದಿಯ ಗಮನ ತೂಕ ಇಳಿಸಿಕೊಂಡ ಟಗರು ಪುಟ್ಟಿ ಸೆಳೆಯುತ್ತಿದೆ.

ನಟಿಯರಾದ ಆಶಿಕಾ ರಂಗನಾಥ್‌, ಹಿತಾ ಸೇರಿದಂತೆ ಅನೇಕರು ಮಾನ್ವಿತಾ, ವರ್ಕೌಟ್ ಗೆ ಮೆಚ್ಚುಗೆ ಸೂಚಿಸಿ ಕಾಮೆಂಟ್ಸ್‌ ಮಾಡುತ್ತಿದ್ದಾರೆ. ಸದ್ಯ ಮಾನ್ವಿತಾ ಚೊಚ್ಚಲ ತೆಲುಗು ಸಿನಿಮಾ “ಮಲ್ಲಿ ಮೊದಲೈಂದಿ’ಯಲ್ಲಿ ಬಿಝಿಯಾಗಿದ್ದು, ಇತ್ತೀಚಿಗಷ್ಟೆ ಈ ಚಿತ್ರದ ಮುಹೂರ್ತ ನೆರವೇರಿದ್ದು, ಚಿತ್ರತಂಡ ಶೂಟಿಂಗ್‌ಗೆ ರೆಡಿಯಾಗುತ್ತಿದೆ.